ლიბიას შტორმი დანიელი დაატყდა თავს.
როგორც BBC იუწყება, აღმოსავლეთ ლიბიის მთავრობის მეთაურმა, რომელიც საერთაშორისო დონეზე არ არის აღიარებული, განაცხადა, რომ დაღუპულთა რიცხვმა 2000-ს გადააჭარმა და ათასობით დაკარგულ ადამიანს ეძებენ.
ჯალელ ჰარჩაუიმ, ლიბიის სპეციალისტმა, განუცხადა BBC-ს, რომ დაღუპულთა რიცხვი შეიძლება მიაღწიოს “რამდენიმე ათას” ადამიანს.
ქარიშხალი დანიელი კვირას ამოვარდა, რის გამოც ხელისუფლებამ გამოაცხადა უკიდურესი საგანგებო მდგომარეობა.
ლიბიის არმიის შვიდი თანამშრომელი დაიკარგა მიმდინარე სამაშველო სამუშაოების დროს.
აღმოსავლეთში ოფიციალურმა პირებმა დააწესეს კომენდანტის საათი, ხოლო სკოლებსა და მაღაზიებს დაევალათ დახურვა.
დაზარალდა აღმოსავლეთის ქალაქები ბენღაზი, სუსი, დერნა და ალ-მარჯი.
დაღუპულთა რიცხვის ზრდასთან ერთად, ლიბიის წითელი ჯვრის განცხადებით, სულ მცირე 150 სახლი განადგურდა.
წითელი ნახევარმთვარის ჰუმანიტარული ქსელის ხელმძღვანელმა განაცხადა, რომ სულ მცირე 150 ადამიანი დაიღუპა მხოლოდ დერნაში.
დერნაში ორი კაშხალი, სადაც დაახლოებით 100,000 ადამიანი ცხოვრობს, ჩამოინგრა, ტერიტორიის დიდი ნაწილი წყალში ჩავარდა და ზოგიერთი მაცხოვრებელი დაიხრჩო. შედეგად, ხელისუფლებამ პორტი “სტიქიის ქალაქად” გამოაცხადა.
აღმოსავლეთის პრემიერ- მინისტრმა ოსამა ჰამადმა განუცხადა ლიბიურ ტელეარხს: ”დაკარგულები ათასობით არიან, ხოლო დაღუპულები 2000-ს აჭარბებენ… დერნას მთელი უბნები გაუჩინარდა, მათ მოსახლეობასთან ერთად… წყალმა წაიღო”.
ჰამადს არ უთქვამს თავისი მონაცემების წყარო.
აღმოსავლეთით მდებარე ტერიტორიებთან ერთად, წყალდიდობის შედეგად დაზარალდა დასავლეთის ქალაქი მისრატა.
ინტერნეტში გავრცელდა ქარიშხლის გადაუმოწმებელი ვიდეო, მათ შორის კლიპი, სადაც ჩანს, რომ წყალდიდობის ნიაღვარი აშორებს ადამიანებს. სხვა კადრებში ჩანს, რომ მძღოლები თავიანთი მანქანის სახურავებზე არიან გამომწყვდეულები.
სკოლებისა და მაღაზიების გარდა, ქარიშხლის გამო დაიხურა ნავთობის ოთხი ძირითადი პორტი.
მაშინ, როცა ბენღაზის ადმინისტრაცია ამუშავებს საკითხებს ქვეყნის აღმოსავლეთით, კონკურენტი, საერთაშორისოდ აღიარებული მთავრობა დედაქალაქ ტრიპოლიშიც ჩაერთო.
მისმა პრემიერ- მინისტრმა, აბდულჰამიდ დბეიბამ კვირას განაცხადა, რომ მან ყველა სახელმწიფო უწყებას დაავალა „დაუყოვნებლივ გაუმკლავდნენ“ ზარალს და წყალდიდობას, ხოლო ლიბიაში გაერომ განაცხადა, რომ იგი ყურადღებით აკვირდება ქარიშხალს და „გაუწევს სასწრაფო დახმარებას ადგილობრივ და ეროვნულ დონეზე“.
ლიბია ორ მეტოქე ადმინისტრაციას შორის იყოფა 2014 წლიდან, 2011 წელს დიდი ხნის ლიდერის მუამარ კადაფის მკვლელობის შემდეგ.
ორივე მთავრობამ სამდღიანი გლოვა გამოაცხადა შტორმის დანიელის შემოტევის შემდეგ.
გასულ კვირას შტორმმა დაარტყა საბერძნეთს, თურქეთსა და ბულგარეთს, სადაც დაიღუპა ათზე მეტი ადამიანი.
ორშაბათს ეგვიპტე ემზადებოდა ქარიშხალ დანიელისთვის და საღამოს, ქვეყნის მეტეოროლოგიურმა ორგანიზაციამ განაცხადა, რომ წვიმის ღრუბლები მომრავლდა ჩრდილო-დასავლეთ სანაპიროზე.
