“უკან არავინ დავიხევთ, ოღონდ ამ პრობლემას ეშველოს და მოგვარდეს!”

სანიაღვრე არხების მოუწესრიგებლობა ერთ-ერთია იმ პრობლემებს შორის, რომლებიც ლანჩხუთში, სოფელ გრიგოლეთის მოსახლეობას აწუხებს და რომელთა მოგვარებასაც აქაურები უკვე წლებია, ითხოვენ. თუმცა, არა ერთი დაპირების მიუხედავად, კონკრეტული პასუხი ამ დრომდე არ აქვთ, როგორ და როდის მოგვარდება მათი პრობლემა. არადა, მცირე რაოდენობის ნალექის შემთხვევაშიც კი, ადგილობრივებსა თუ საკურორტო სეზონზე ჩამოსულ ადამიანებს გარკვეული დისკომფორტი ექმნებათ.

საუბარია დასახლების იმ ტერიტორიაზე, სადაც, თავის დროზე, გრიგოლეთის დაწყებითი სკოლა მდებარეობდა. სწორედ, სკოლის მიმდებარე ტერიტორიაზე გადის მთავარი სანიაღვრე არხი, რომელიც უკვე წლებია, წყალს ვერ ატარებს და მოსახლეობის ნაწილის მთავარ პრობლემადაა ქცეული.

“ყველაზე მეტად რაც მაწუხებს, ჩემი ეზოს უკან მდებარე სანიაღვრე არხის გაუმართაობაა. როგორც კი გაწვიმდება, მთელი ეზო მეტბორება, წყალი სახლამდეც კი მოდის. საკუთარ ნაკვეთს ვერაფერში ვიყენებ, ვერც ბოსტანს ვთესავ და ვერც ვერაფერს ვაკეთებ. რა უნდა დავთესო?! მაინც წყალი დატბორავს და წაიღებს. ადრე ამ ეზოში სიმინდი მომყავდა, მარა ახლა სრულიად გავერანებულია ყველაფერი. ყანა და ბოსტანი კი არა, დაჭაობებულია მთელი ეზო, ვერ ჩახვალ, ისეთი ამბავია.

წლებია, ამ დღეში ვარ. ბევრჯერ შევაწუხე ადგილობრივი ხელისუფლება, ბევრჯერ მოვიდნენ, ნახეს საკუთარი თვალით, რა მდგომარეობაცაა, მაგრამ საშველი მაინც არაა _ ვერ მოხერხდა პრობლემის აღმოფხვრა.

დროთა განმავლობაში აქ ტერიტორიები გაიყიდა ყოველგვარი დაგეგმარების გარეშე და კერძო საკუთრებაში მოექცა არხის გარკვეული ნაწილი. 20-30 მეტრი რომ იყოს გასაყვანი, ჩემი სახსრებით ვიქირავებდი ტრაქტორს და გავიყვანდი არხს. მაგრამ მე მარტო ვერ გავწვდები ამ პრობლემის მოგვარებას”, _ ამბობს “გურია ნიუსთან” საუბარში გრიგოლეთის მკვიდრი გოჩა ვოინაროვი, რომლის ეზოც სანიაღვრე არხის გაუმართაობის გამო დაჭაობდა და სასოფლო-სამეურნეო დანიშნულებისთვის სრულიად გამოუსადეგარი გახდა.

გოჩა ვოინაროვის გარდა, ზემოთ ნახსენები პრობლემის თაობაზე “გურია ნიუსთან” ის ადამიანებიც საუბრობენ, რომლებიც აღნიშნული ტერიტორიის სიახლოვეს აგარაკებსა თუ სასტუმროებს ფლობენ. მათი თქმით, მცირედი წვიმის დროსაც კი, აქაურობა წყლით იფარება და დამსვენებლებს მნიშვნელოვან პრობლემებს უქმნის.

“ჩვენი შემოსავლის წყარო აქ ჩამოსული დამსვენებელი არიან. რომელი ტურისტი და დამსვენებელი მოვა, თუ გამართული ინფრასტრუქტურა არ იქნა?! ზაფხულში აქ დამსვენებლები ვერ შემოდიან, ისე იტბორება ყველაფერი. მანქანას ელოდებიან, რომ შემოვიდნენ აქ.

სამი წელია, სასტუმრო მაქვს და ვცდილობ, საკუთარი ხელით მცირედით მაინც მოვაწესრიგო ყველაფერი _ გზაა თუ განათება, რომ დამსვენებელს გული არ გაუსკდეს აქაურობის დანახვაზე.

სირცხვილია, ასეთ მდგომარეობაში იყოს ეს ტერიტორია. თუ რამეს გაღება ჩვენგანაც იქნა საჭირო, უკან არავინ არ დავიხევთ, ოღონდ ამ პრობლემას ეშველოს და მოგვარდეს. რახან ვითმენ და ხმამაღლა არაფერს ვამბობთ, ეს იმას არ ნიშნავს, რომ თავზე ფეხი უნდა დაგვაბიჯონ. სხვაგან რომ იყოს ასეთი პრობლემა, გზასაც გადაკეტავდნენ და უბედურებასაც დაათენებდნენ, აქ კი ვართ ჩუმად და პატრონიც არავინაა.

საქმე ისაა, რომ ეს არხი ბოლოში, წესით, მილს უნდა შეუერთდეს, მაგრამ მილი არხს ზემოთაა მოქცეული და ბუნებრივია, არხში მომავალ წყალს ვერ ატარებს. ერთადერთი და მთავარი საშველი პრობლემის მოსაგვარებლად ისაა, რომ ის მილი, რომელიც კომპანია BP-ის ტერიტორიაზეა, უნდა ამოიღონ და დაბლა დაწიონ, მაგრამ ვერ თუ არ ხერხდება. ახლახანსაც გაიყიდა აქ მიწის ნაკვეთი და ისე გამოვიდა, რომ არხის ნაწილი კერძო საკუთრებაში მოექცა. რა თქმა უნდა, ესეც პრობლემას ქმნის, ამ მიწის მესაკუთრემ შეიძლება სულაც არ შეგვიშვას მის ტერიტორიაზე.

პატრონი არავინ არაა არჩევნებიდან არჩევნებამდე. საარჩევნოდ დაპირებებს მაინც გამოიმეტებენ ხოლმე”, _ ამბობენ ის ადამიანები, რომლებიც ვინც დასახლების ამ მონაკვეთში სააგარაკო ფართებს ფლობენ.

გრიგოლეთში არსებული ამ პრობლემის თაობაზე საუბრობს საკრებულოს ოპოზიციონერი წევრი ჯუმბერ ბლაგიძეც, რომელიც აქაურებს თანაფრაქციელებთან ერთად შეხვდა:

“მეც სუფსის ადმინისტრაციული ერთეულის მკვიდრი ვარ და კარგად ვიცი, ყველაზე მეტად რა აწუხებს ადგილობრივ მცხოვრებლებს.

წლებია, აქაური მოსახლეობა ხაზგასმით აღნიშნავს, რომ სოფლებში მწვავედ დგას მოუწესრიგებელი არხების პრობლემა. ფაქტია, ამ დასახლების რელიეფი საკმაოდ დაბალია და ნალექის მცირე რაოდენობის შემთხვევაშიც კი, სერიოზული დისკომფორტი იქმნება, მით უმეტეს, თუ არხი გამოსულია მწყობრიდან და წყალს ვერ ატარებს.

ეს არხი, გრიგოლეთის პიონერთა ბანაკი რომ იყო, იქამდე გადიოდა, ახლა კი აქვე წყდება. ეს ტერიტორია მუნიციპალიტეტის საკუთრებაა და სწორედ მან უნდა იზრუნოს ამ პრობლემის მოგვარებაზე. იმათ, ვინც აქ მხოლოდ ზღვის სეზონზე ჩამოდის ერთი-ორი თვით, ეს პრობლემა შეიძლება ნაკლებად აწუხებდეს, მაგრამ, ვისაც მუდმივად აქ უწევს ცხოვრება, მათთვის ძალიან მნიშვნელოვანია. თან ეს არაა ახალი პრობლემა _ წლებია არსებობს. ჩემი მაჟორიტარი დეპუტატობის დროსაც ბევრჯერ გამიჟღერებია ამის თაობაზე, შესაბამისი სამსახურების წინაშეც არაერთხელ დამიყენებია საკითხი, მაგრამ არაფერი შედეგი _ ვერანაირად ვერ მივიღე პასუხი, თუ როდის და როგორ უნდა მოგვარდეს ეს პრობლემა. ხელისუფლება კი ყელყელაობს, რომ ხალხზე ზრუნავს, მაგრამ ფაქტი სახეზეა.

როცა მერიის ინფრასტრუქტურის სამსახურში მოვიკითხე ეს ამბავი და ვეცადე, რაიმე კონკრეტული პასუხი მიმეღო, მითხრეს, რომ პრობლემა თავად მოსახლეობის მხრიდან მომდინარეობდა. თითქოსდა, არხს ანაგვიანებდნენ და სწორედ ამის გამო ვერ ატარებს წყალს. თუმცა, ფაქტი სახეზეა და კარგად ჩანს, რომ მოსახლეობა ამ კონკრეტულ შემთხვევაში არაფერ შუაშია, ფაქტობრივად, თავიდანაა არხი გასაყვანი. წლებია, არავის გაუწმენდია და თითქმის ამოვსებულია.

მოკლედ, აქ მცხოვრებ ადამიანებს სჭირდებათ კონკრეტული პასუხი, თუ როგორ და როდის მოგვარდება მათი პრობლემა”, _ ამბობს საკრებულოს ოპოზიციონერი წევრი ჯუმბერ ბლაგიძე, რომელიც წლების წინ სუფსის ადმინისტრაციული ერთეულის მაჟორიტარი დეპუტატი იყო.

პრობლემის თაობაზე, რომელიც გრიგოლეთის მოსახლეობის ნაწილის მთავარ საწუხარს წარმოადგენს, “გურია ნიუსი” მერიის ინფრასტრუქტურის სამსახურის უფროსს ლევან ჩხაიძეს ესაუბრა. პრობლემის არსებობას ჩხაიძეც ადასტურებს _ მისი თქმით, პრობლემის მოგვარებას აფერხებს ის ფაქტი, რომ არხი გარკვეულ მონაკვეთზე კერძო საკუთრებაში არსებულ ტერიტორიაზე გადის და სწორედ ამიტომ ვერ ხერხდება მისი გაწმენდა-მოწესრიგება:

“ამ არხმა უნდა გადაკვეთოს ტერმინალის ტერიტორია, შემდეგ კი პირდაპირ ვეჯახებით კერძო ნაკვეთებს. სწორედ ეს ქმნის პრობლემას. მეც ვარ ნამყოფი აქ და მართლაც მოსაწესრიგებელია. იგეგმებოდა კიდეც მისი გაწმენდა, მაგრამ ვერ მოხერხდა სწორედ იმის გამო, რომ კერძო საკუთრებაშია მოქცეული. მით უმეტეს, თუ კიდევ გაიყიდა და არხის რაღაც ნაწილი ისევ მოექცა კერძო საკუთრებაში, ეს კიდევ დამატებით პრობლემას შექმნის”, _ გვითხრა პასუხად ლევან ჩხაიძემ, რომელიც კონკრეტულს ვერაფერს ამბობს, თუ როდის მოუგვარდებათ გოჩა ვოინაროვსა და მის მეზობლებს პრობლემა, რომელიც წლებია, აწუხებთ…