უკანონო მშენებლობების შედეგი ბახმაროში და პრობლემის გადაჭრის გზები

ზამთარში უხვმა თოვლმა და ზვავმა დაბა ბახმაროში 20-ამდე სახლი დაანგრია. სტიქიის შედეგი კი, ცნობილი მოგვიანებით, თოვლის დადნობის შემდეგ გახდა.

თავდაპირველად ფოტოები სოციალური ქსელით გავრცელდა. უხვი თოვლისა და ჩამოწოლილი ზვავებისგან გზის გახსნის შემდეგ ადგილზე ჩოხატაურის მუნიციპალიტეტის მერიის თანამშრომლებიც იმყოფებოდნენ.

რამდენი სახლი გაანადგურა თოვლმა და დაეხმარება თუ არა მერია სტიქიის შედეგად დაზარალებულებს _ ამ საკითხის შესახებ ჩოხატაურის მუნიციპალიტეტის მერს, დავით შარაშიძეს ვესაუბრეთ.

როგორც მერი ამბობს, ადგილი, სადაც სახლები დაინგრა ზვავსაშიში ზონაა და შესაბამისად, უკვე განადგურებული სახლებიც უკანონოდ და მერიის ნებართვის გარეშე იყო აშენებული.

“დაზარალებულია 20-მდე ოჯახი. მათ შორის არის უკანონო და ნაწილობრივ, კანონიერი სახლები, რომლებიც არც ერთი მერიასთან შეთანხმებული არ იყო, ასევე, გენერალურ გეგმაში ეგ ადგილი შეტანილია, როგორც ზვავსაშიში ზონა, სადაც სამშენებლო სამუშაოები კატეგორიულად დაუშვებელია. შესაბამისად, მერია ვერანაირ დახმარებას ვერ გაუწევს.

კანონის მიხედვით, ჩვენ რაშიც შეგვიძლია დახმარება, ერთი ეგ არის, რომ შეგვიძლია, დარეგისტრირებულ მიწებს ადგილმონაცვლეობა შევთავაზოთ უსაფრთხო სამშენებლო ზონაში, სადაც შეეძლებათ კანონის მიხედვით მშენებლობის წარმოება”, _ გვითხრა შარაშიძემ.

_ ვის უნდა მიმართონ ადგილმონაცვლეობისთვის?

_ ადგილმონაცვლეობისთვის უნდა მიმართონ მუნიციპალიტეტის მერიას.

დაბა ბახმაროში მიწების მიტაცებისა და სახლების უკანონოდ აშენების საკითხი, წლებია, რაც აქტუალური პრობლემაა _ ყოფილმა მერმა და საკრებულოს ამჟამინდელმა თავმჯდომარემ, ირაკლი კუჭავამ, რამდენიმე თვის წინ, “გურია ნიუსს” ინტერვიუში განუცხადა, რომ უკანონო სახლების აშენება ბახმაროში მაშინ დაიწყო, როცა კურორტს არც დაბის სტატუსი ჰქონდა და არც მერის წარმომადგენელი ჰყავდა:

“უკანონო მიწებს რაც შეეხება, ასეთი 900-ზე მეტი შენობა არის დაფიქსირებული და იმიტომ იწოდება უკანონოდ, რომ მაშინდელმა მერიამ და ზედამხედველობის სამსახურმა ეს დააფიქსირა. უბრალოდ, ჩვენ არ გვეყო იმის რესურსი, რომ დემონტაჟი მოგვეხდინა, თორემ ჯარიმები დაწერილია”, _ ამბობდა კუჭავა, როდესაც ჩვენ მას მიწების უკანონოდ მითვისების შესახებ დაწყებულ გამოძიებაზე ვკითხეთ.

შეგახსენებთ, რომ საქართველოს პროკურატურამ 2022 წლის 9 სექტემბერს გაავრცელა განცხადება, სადაც ნათქვამია, რომ “2018 წელს, ბრალდებულები საცხოვრებელი სახლის ყალბი ტექნიკური პასპორტის გამოყენებით და ჩოხატაურის მუნიციპალიტეტის მერიის ზედამხედველობის სამსახურის სპეციალისტის მიერ არაჯეროვნად შედგენილი დათვალიერების ოქმის საფუძველზე, თაღლითურად დაეუფლნენ ჩოხატაურის მუნიციპალიტეტში, დაბა ბახმაროში მდებარე 95 000 ლარის ღირებულების სამ მიწის ნაკვეთს. შედეგად, სახელმწიფოს დიდი ოდენობით ქონებრივი ზიანი მიადგა”, თუმცა ბათუმის საქალაქო სასამართლომ ხუთივე პირს გირაო შეუფარდა.

_ რა კეთდება დღეს კურორტის უკანონო მშენებლობებისგან დასაცავად? _ ეს კითხვა ამჟამინდელ მერს, დავით შარაშიძეს დავუსვით.

“ჩვენ წარვადგინეთ ახალი მერის წარმომადგენელი ბახმაროში. შესაბამისად, ყოველდღიურ რეჟიმში ზედამხედველობის სამსახურთან ერთად ვმუშაობთ, რომ ბახმარო დავიცვათ უკანონო მშენებლობებისგან. ასევე, მინდა, საზოგადოებას მოვუწოდო კანონის და წესრიგის დაცვისკენ. ჩვენ არ გვინდა და ჩვენი თვითმიზანი არ არის ვინმეს ჯარიმები ვუწეროთ.

ჩვენ გვინდა, ბახმაროში წესრიგი და გვინდა, ყველაფერი მოექცეს კანონის ჩარჩოში, ამიტომ მარტო ხელისუფლება ვერაფერს იზამს, თუ საზოგადოებამ ხელი არ შეგვიწყო. მოვუწოდებ ყველა იმ ადამიანს, ვინც ბახმაროთი დაინტერესებულია, რომ თითოეული დეტალი გავიაროთ მერიის შესაბამის სამსახურებთან”, _ ამბობს შარაშიძე.