“უკრაინა რომ NATO-ს წევრი ყოფილიყო, რუსეთი მის წინააღმდეგ ომს არ დაიწყებდა” – ამის შესახებ ფინეთის პრემიერ-მინისტრმა, სანა მარინიმ დავოსში, მსოფლიო ეკონომიკურ ფორუმზე სიტყვით გამოსვლისას თქვა.
მარინის თქმით, ეს გახდა მისი ქვეყნისთვის ჩრდილო ატლანტიკურ ალიანსში გაწევრიანების მოტივაცია.
,,ჩვენ უნდა გადავხედოთ ჩვენს ისტორიას და დავუსვათ ჩვენს თავს კითხვა – უკრაინა NATO-ს წევრი უკვე უნდა ყოფილიყო? ამ შემთხვევაში, უკრაინაში ომი არ დაიწყებოდა და ამიტომაც მოახდინეს ფინეთმა და შვედეთმა NATO-ში გაწევრიანების რატიფიცირება”, – თქვა ფინეთის პრემიერმა.
მისივე თქმით, 2014 წელს, როდესაც რუსეთი თავს ყირიმს დაესხა, ევროპასა და მოკავშირეებს უფრო ძლიერად უნდა ემოქმედათ.
სანა მარინის აზრით, ახლა ერთადერთი გზავნილი უნდა იყოს, რომ ევროპა უკრაინას დაეხმარება მანამ, სანამ ეს საჭირო იქნება, თუნდაც 15 წელი.
“ჩვენ ამ დღისგან უნდა ვისწავლოთ. ჩვენ გვინდა NATO-ს წევრი გავხდეთ, რადგან ფინეთში ომი აღარასდროს გვსურს”, – აღნიშნა სანა მარინმა.
ცნობისთვის, შვედეთისა და ფინეთის NATO-ში გაწევრიანებისთვის საჭიროა ყველა წევრი ქვეყნის თანხმობა. თანხმობის რატიფიცირება ამ დრომდე მხოლოდ თურქეთსა და უნგრეთს არ მოუხდენიათ.
ბუდაპეშტში განაცხადეს, რომ მხარს დაუჭერდნენ სამხედრო ბლოკის გაფართოებას და თანხმობას ხელს მალე მოაწერდნენ, თუმცა თურქეთისგან მსგავსი გზავნილი ამ დრომდე არ ყოფილა. თურქეთის პრეზიდენტი, რეჯეფ თაიფ ერდოღანი პროცესს შვედეთის გამო აყოვნებს, რადგან ქვეყანას ქურთების დაჯგუფებებთან თანამშრომლობაში ადანაშაულებს და მათ წინააღმდეგ გარკვეულ მოთხოვნებს უყენებს.
“პრობლემები არ იქნება, პირადად ველაპარაკე პრეზიდენტ ერდოღანს და ის მითხრა, რასაც საჯაროდაც ამბობს, რომ ფინეთთან დაკავშირებით დიდი პრობლემები არ არსებობს, ალბათ შვედეთთან უფრო, მაგრამ ჩვენი თვალთახედვით, ძალიან მნიშვნელოვანია, რომ ფინეთი და შვედეთი NATO-ში ერთად შევიდნენ, რადგან საერთო უსაფრთხოებას ვიზიარებთ”, – თქვა ფინეთის პრემიერ-მინისტრმა.
