დღეს, ოზურგეთში, სასტუმრო „ოზურგეთი პლაზას“ საკონფერენციო დარბაზში ფართო მასშტაბის სემინარი გაიმართა, რაც პროექტ „გურიის ეროვნული პარკის“ გაცნობას დაეთმო. პროექტი ხორცილდება შვედეთის საერთაშორისო განვითარების სააგენტოს მიერ.
ღონისძიებაზე საქართველოს მთავრობის წარმომადგენლობა გურიის რეგიონის, მუნიციპალიტეტების ხელმძღვანელ პირებს, სახელმწიფო მოხელეებს, ასევე საზოგადოების წარმომადგენლებს შეხვდა.
გურიის ეროვნული პარკის დაარსების პროექტის კოორდინატორმა გიორგი ცინცაძემ ისაუბრა პროექტის მნიშვნელობაზე და აღნიშნა, რომ დღევანდელი შეკრების უმთავრესი მიზანი, გურიის წარმომადგენლებთან ერთად, პროექტის გახორციელებაზე შეჯერება იყო.
გურიის სახელმწიფო რწმუნებულის მოადგილემ, ქეთი მოისწრაფიშვილმა გამოთქვა თავისი პოზიტიური განწყობა და რწმენა იმისა, რომ გურიის ეროვნული პარკის შექმნა ხელს შეუწყობს და დიდ შესაძლებლობას მისცემს ადგილობრივ მოსახლეობას, რეგიონის განვითარებას და ტურიზმის აღმავლობას.
_ მნიშვნელოვანია დაცული ტერიტორიების ქსელის გაფართოება. პარლამენტი მტკიცედ უჭერს მხარს გარემოს დაცვას, დაცული ტერიტორიებთან დაკავშირებულ საკითხებს. გურიას აქვს უნიკალური გარემო-ბუნება და აქედან გამომდინარე, აქვს შესაძლებლობები, ხალხისთვის უკეთესი პირობები შეიქმნას, გაჩნდეს თანაბარი განვითარების პირობები, _ განაცხადა შეხვედრაზე გარემოს დაცვის კომიტეტის თავმჯდომარის მოადგილემ პარლამენტში, ხატია წილოსანმა.
გარემოს დაცვის და სოფლის მეურნეობის მინისტრის მოადგილემ, ნინო თანდილაშვილმა თავის გამოსვლაში, პროექტის მასშტაბურ მნიშვნელობაზე ისაუბრა და თქვა, რომ გურიაში კიდევ ერთი ახალი დაცული ტერიტორია შეიქმნება და რომ ეროვნული პარკის შექმნა ნიშნავს, ახალი მიზიდულობის ცენტრის შექმნას რეგიონისთვის!
_ მართალია, ეს არ არის პირველი. კიდევ გვაქვს კოლხური პარკი, რომელიც იუნესკოს ბუნებრივი მემკვიდრეობის ქვეშ მალე მოხვდება და მსოფლიო ბუნებისთვის საუკეთესოთა ნუსხაში 21 ივლისს გამოცხადება. ეს არის უმნიშვნელოვანესი მოვლენა _ იუნესკოს მსოფლიო რუკაზე დატანა. ჩვენ გვაქვს მაგალითები, თუ რა კონკრეტული სიკეთეები მოაქვს დაცულ ტერიტორიებს. რა თქმა უნდა, ბუნებისთვის მაქსიმალური ყურადღების მოპყრობით მოხდება ყოველივე. დაცული ტერიტორიების რეჟიმს ადგენს დაცული ტერიტორიების სააგენტო. დღეს უდიდესი მადლობა მინდა, გადაგიხადოთ ყველას, რეგიონის ხელმძღვანელობას, ამ შემადგენლობით წარმოდგენისთვის, _ უთხრა მან დარბაზში მსხდომთ.
_ რაც მთავარია, ეს გურიიდან წამოსული იდეაა. ეს იყო პირველი შემთხვევა, როცა რეგიონიდან შემოვიდა მომართვა. ამიტომ, ყოველნაირად ვეცადეთ, გვემოქმედა დიდი მხარდაჭერით. პარლამენტის მხრიდან გაჩნდა დიდი ინტერესი. პარკის დაარსებას რამდენიმემილიონიანი ინვესტიცია სჭირდება. ამ ეტაპზე მიმდინარეობს დაგეგმარება. მეცნიერები მუშაობენ რვა მიმართულებით, რათა ყოველმხრივ შეისწავლონ ბიომრავალფეროვნების თუ სხვა საკითხები. ერთ-ერთი უმნიშვნელოვანესია ბახმაროს ტყის 30 ათასი კვ.მ. ტერიტორია, რომელიც, ფაქტობრივად, დაუცველია. აქ დღეს ერთობლივად უნდა გადაწყდეს, რომ გურიაში დაარსდეს დაცული ტერიტორია! _ განაცხადა გიორგი ცინცაძემ.
შეხვედრის მსვლელობისას არაერთხელ გამოითქვა აზრი, რომ დაცული ტერიტორიები უამრავი სიკეთის მომტანია ადგილობრივი მოსახლეობისთვის და ასევე, საუკეთესო საშუალებაა ქვეყნის პოპულარიზაციისთვის.
შეხვედრაზე დამსწრეებს სლაიდების მეშვეობით გააცნეს საქართველოს, როგორც ბიომრავალფეროვნების ცხელი წერტილის არსებობა. ისაუბრეს, რომ უპირველესია დაცული ტერიტორიების არსებობა, როგორც ბიომრავალფეროვნების შენარჩუნებისთვის, რაც სჭირდება ყველა ცოცხალ ორგანიზმს. პირველ რიგში, ეს არის ბუნებრივი სიმდიდრე, დღევანდელი და მომავალი თაობების არსებობის საფუძველი.
შეხვედრაზე, ასევე, ისაუბრეს ეკოტურიზმის განვითარების საუკეთესო შესაძლებლობებზე, მონაწილეებს გააცნეს დაცული ტერიტორიების კატეგორიები, როგორ ხდება ბუნებრივი რესურსებით სარგებლობა დაცულ ტერიტორიებზე…
უმთავრესი კი, რაც შეხვედრის ლაიტმოტივად შეიძლება ჩაითვალოს, მკვეთრი ხაზგასმით ითქვა, რომ დაცული ტერიტორიები არის გარანტი ჯანსაღ გარემოში ცხოვრებისა, რომლის გარეშეც აზრი ეკარგება ადამიანის ფენომენის სრულფასოვნად არსებობას!
შეხვედრის მონაწილეები შემდეგ სადისკუსიო რეჟიმში გადავიდნენ.
ავტორი: მარინა ჩიხლაძე
