“უზომოდ მადლიერი ვარ საქართველოს უნივერსიტეტის სამართლის სკოლის”

ყოველივე ამის გათვალისწინებით, საქართველოს უნივერსიტეტის სამართალმცოდნეობის პროგრამაზე მოხვედრა საკმაოდ კონკურენტულია. ჩვენთან საუბრისას ანა ცინაძემ, სამართლის სკოლის პირველკურსელმა სტუდენტმა, დეტალურად გაგვიზიარა საკუთარი შთაბეჭდილებები, პროგრამაზე ჩარიცხვიდან _ დღემდე.

_ ანა, თუ შეიძლება გაგვიზიარეთ, რატომ გადაწყვიტეთ საქართველოს უნივერსიტეტის სამართლის სკოლაში ჩაბარება?

_ სკოლის ასაკიდანვე გაცნობიერებული მქონდა, რომ სამართალმცოდნეობაზე ჩამებარებინა. დავიწყე ინფორმაციების მოძიება სად რა ისწავლება და როგორ შეიძლება მიმეღო თეორიულ ცოდნასთან ერთად პრაქტიკული გამოცდილება, როგორც სტუდენტს, რაც კონკურენტუნარიანს გამხდიდა სხვა უნივერსიტეტის სტუდენტებთან შედარებით. როდესაც გავეცანი საქართველოს უნივერსიტეტის შესაძლებლობებს, ჩემთვის არჩევანის გაკეთება უფრო მარტივი გახდა. აუცილებლად მინდა აღვნიშნო, რომ ჩემთვის ძალიან მნიშვნელოვანია ის ფაქტი, რომ სამართლის სკოლა აქტიურად მონაწილეობს როგორც ეროვნულ, ისე ყველაზე პოპულარულ საერთაშორისო შეჯიბრებებში.

_ როგორც ვიცით, თქვენ უკვე გქონდათ საერთაშორისო გამოცდილების მიღების  შესაძლებლობა, რამდენად გაამართლა მოლოდინი?

_ დიახ, მხოლოდ ერთი კვირა იყო გასული UG-ში ( საქართველოს უნივერსიტეტი-UG) სწავლის დაწყებიდან, რომ სამართლის სტუდენტებისთვის ორგანიზებულ ”Welcome Picnic”-ზე მიგვიწვია სკოლამ და სწორედ ამ დღეს გავიგე, ჩემი ეროვნულ გამოცდებზე მიღებული ქულების რეიტინგიდან გამომდინარე საქართველოს უნივერსიტეტის სამართლის სკოლის სრული დაფინანსებით კულტურულ-შემეცნებითი ვიზიტის ფარგლებში ქალაქ სტრასბურგს ვეწვეოდი. არასდროს დამავიწყდება ის განსაკუთრებული დღე და ემოციების ზღვა. განსაკუთრებული სწორედ ის ფაქტი იყო, რომ პირველივე კურსზე მომეცა შესაძლებლობა ამ პრაქტიკული გამოცდილების მიღების.

_ შეგიძლიათ უფრო დეტალურად გაგვიზიაროთ რას ითვალისწინებდა ეს კულტურულ-შემეცნებითი ვიზიტი?

_ ვიზიტის ფარგლებში ვესტუმრე ისეთ დაწესებულებებს, როგორებიცაა ევროპარლამენტი, ევროსაბჭო, ადამიანის უფლებათა ევროპული სასამართლო, გარდა ამისა შესაძლებლობა მქონდა დავსწრებოდი კონფერენციებს, რომელთა საშუალებით მივიღე ინფორმაცია მათ როლსა და გადაწყვეტილებების მიღების პროცედურაზე. გამორჩეულად კარგად მახსენდება სტრასბურგის სასამართლოს მოსამართლის, ბატონი ლადო ჭანტურიას, ლექცია, რომელიც ადამიანის უფლებების დაცვას, სტრასბურგის სასამართლოს სტრუქტურასა და სარჩელის დასაშვებობას ეხებოდა. ვიზიტი ასევე, ითვალისწინებდა კელში, შტუტგარტსა და ბაზელში მოგზაურობას. ამ შემეცნებითი ვიზიტის პირობებში ვესტუმრე ჩემთვის უსაყვარლეს გერმანიასა და შვეიცარიასაც. უზომოდ მადლიერი ვარ საქართველოს უნივერსიტეტის სამართლის სკოლის, რადგან მისი დამსახურებით მივიღე მნიშვნელოვანი გამოცდილება და ცოდნა, რომლებიც, ვფიქრობ, სამომავლოდ გამომადგება. გავხდი უფრო დამოუკიდებელი, დავაგროვე საოცარი მოგონებები, გავიცანი საინტერესო ადამიანები  და შევიძინე ახალი მეგობრები. რა თქმა უნდა, ბევრად მოტივირებული გავხდი და მეტად ფართო პრიზმიდან შევძელი არჩეული პროფესიის დანახვა და შედარება.

_ როგორც ვიცით, თქვენ ეროვნულ გამოცდებზე მიღებული შედეგის მიხედვით საქართველოს უნივერსიტეტის 100 000 ლარიანი ფონდის გამარჯვებულიც ხართ, რომ გვიამბოთ ამის შესახებაც?

_ საქართველოს უნივერსიტეტი ნამდვილად ნიშნავს შესაძლებლობებს და ამაში მე აქ მოსვლის დღიდან დავრწმუნდი. პირველი იყო ეს შემეცნებითი ვიზიტი და მეორე დიდი სიხარული სწორედ 100 000 ლარიანი ფონდის გამარჯვებას უკავშირდება. საგრანტო ფონდის შესახებ ინფორმაციას სკოლის პერიოდშივე მქონდა უნივერსიტეტის სოციალური ქსელებიდან. შემდეგ მახსოვს, უნივერსიტეტის ღია კარის დღეს დავესწარი, სადაც ამ გრანტის შესახებ დეტალურად ვითხოვე ინფორმაცია, თუ რა პირობით და რა შემთხვევაში დასაჩუქრდებოდა პირველკურსელი.

როცა მიხსნიდნენ, რომ საჭირო იყო მქონოდა მაღალი ქულები ერთიან ეროვნულ გამოცდებზე და ამ კუთხით შეირჩეოდნენ პირველკურსელები, მართლა ვერ წარმოვიდგენდი, რომ მე გავხდებოდი ერთ-ერთი გამარჯვებული და ჩემი შრომის საფასურად უნივერსიტეტისგან ფონდიდან თანხას, განსაკუთრებით კი 10 000 ლარს დავიმსახურებდი.