დადგენილია, რომ ხანმოკლე, მაგრამ რეგულარული ვარჯიშები არანაკლებ სასარგებლო და ეფექტურია, ვიდრე ხანგრძლივი და სერიოზული დროისა და ენერგიის ხარჯვა. მაგრამ, როგორ ვაიძულოთ თავი, სისტემატურად შევასრულოთ თუნდაც ყველაზე ხანმოკლე ვარჯიში?
უპირველესად, წინასწარ დაუთქვით საკუთარ თავს, როდის მოიცლის საამისოდ და ამით განწყობა შეიქმენით; მეორე – გაიხალისეთ ის რამდენიმე წუთი რიტმული მუსიკით (შეგიძლიათ, იცეკვოთ კიდეც) და ამის მერე წავარჯიშება ნამდვილად აღარ დაგეზარებათ.
აიღეთ 2 ცალი ჰანტელი (თითო – 1,5 კილოგრამი). დადექით სწორად. ფეხები გაშალეთ მხრების სიგანეზე, განზე გაშალეთ ჰანტელებიანი ხელები და ნელ-ნელა ასწიეთ ზემოთ. „შუა გზაზე“ რამდენიმე წამს შეჩერდით, მერე ისევ ნელი მოძრაობით აიტანეთ ჰანტელები თავს ზემოთ, იქაც შეყოვნდით და ბოლოს ნელ-ნელა დაუბრუნდით საწყის მდგომაერეობას. ვარჯიში გაიმეორეთ 10-ჯერ.
აიღეთ სახტუნაო. ნახევარი წუთის განმავლობაში იხტუნავეთ ნელა, შემდეგ კი თანდათან მოუმატეთ ტემპს (ხანგრძლივობა – 5-10 წუთი).
წარმოიდგინეთ, რომ მოკრივე ხართ და რინგზე გახვედით. ალბათ, ერთხელ მაინც გაქვთ ნანახი მოკრივეთა ორთაბრძოლა. ჰოდა, მიჰბაძეთ მათ (არა უშავს, თუ მთლად პროფესიონალის შთაბეჭდილებას ვერ დატოვებთ) და, რაც შეიძლება აქტიურად „შეუტიეთ“ თქვენს უხილავ მოწინააღმდეგეს. ყოველი მუშტის მოქნევა მაქსიმალური ძალით უნდა მოახდინოთ. ამ ვარჯიშისთვის 5 წუთიც საკმარისია.
თუ გაქვთ საშუალება, ითამაშოთ მაგიდის ჩოგბურთი ან დიდი ჩოგბურთი, ხელიდან არ გაუშვათ შესაძლებლობა, თუნდაც თქვენი მეწყვილე თქვენზე უარესად მოთამაშე, ან, სულაც, პატარა ბავშვი იყოს.
ველოსიპედით პარკში ან ტყეში თხუთმეტწუთიანი გასეირნებაც კი საოცარი ენერგიით აგავსებთ, ხოლო, თუ კვირაში ერთხელ ან ორჯერ ცურვისთვისაც მოიცლით (თუ ცურვა არ იცით, არ შეგრცხვეთ, კამერა გამოიყენეთ), ჩათვალეთ, რომ სულაც აღარ ხართ ზარმაცი.
ავტორი
