გასული 24 საათის განმავლობაში ოზურგეთში კორონავირუსით ინფიცირების 10 შემთხვევა დაფიქსირდა. ინფიცირების 10 შემთხვევიდან 8 სოფელ შრომაში გამოვლინდა. ამის შესახებ „გურია ნიუსს“ ოზურგეთის საზოგადოებრივი ჯანდაცვის ცენტრში განუცხადეს.
„სოფელ შრომაში მივდივართ და ვატარებთ მასიურ ტესტირებას ადგილობრივ უბნის ექიმებთან ერთად“,_ გვითხრა ოზურგეთის საზოგადოებრივი ჯანდაცვის ცენტრის ეპიდემიოლოგმა ელზა სიმონიშვილმა.
სულ ოზურგეთში დადასტურებულია 3398 ინფიცირების შემთხვევა, გამოჯანრთელებულია 3301 ადამიანი და გარდაცვლილია 34.
შეგახსენებთ, რომ კოვიდდადებითი პაციენტების გახშირებული შემთხვევების გამო, სასწავლო პროცესი 2 კვირის ვადით შეჩერდა შრომაში, როგორც სკოლაში, ისე სკოლამდელი აღზრდის დაწესებულებაში.
ლანჩხუთში გასული 24 საათის განმავლობაში კორონავირუსით ინფიცირების 3 შემთხვევა დაფიქსირდა.
„გუშინ ჩატარდა მასობრივი ტესტირება ჩოჩხათში. ტესტირების შედეგად დადებითი შემთხვევები არ გამოვლენილა, დღეს ტარდება ნიგოითში და ვნახოთ რა შედეგები გვექნება“,_ გვითხრა ლანჩხუთის საზოგადოებრივი ჯანდაცვის ცენტრის დირექტორმა ნატო მენაღარიშვილმა.
შეგახსენებთ, რომ კოვიდინფიცირების გახშირებული შემთხვევების გამო, სასწავლო პროცესი 2 კვირის ვადით შეჩერდა ნიგოითის, ჩოჩხათის და ნიგვზიანის სკოლებსა და ბაღებში,
სულ ლანჩხუთში დადასტურებულია კორონავირუსით ინფიცირების 1854 შემთხვევევა, გამოჯანმრთელებულია 1688, გარდაცვლილია 20 ადამიანი.
რაც შეეხება ჩოხატაურს, რომელიც ცოტა ხნის წინ „სიმწვანისკენ“ მიდიოდა, ამ დროისთვის კოვიდინფიცირების 7 შემთხვევა ფიქსირდება, მათგან 3 გასულ 24 საათში გამოვლინდა. ბოლო 24 საათში, დაინფიცირებულებს შორის არის სტომატოლოგი, რომლის კონტაქტებიც ამ დროისთვის იზოლაციაში იმყოფება.
როგორც ჩვენთვის ცნობილია, ინფიცირების შემთხვევები ოჯახურ-მეზობლური კონტაქტებია.
სულ ჩოხატაურში კორონავირუსით ინფიცირების 1127 შემთხვევა იყო დაფიქსირებული, მათგან 13 გარდაიცვალა, 1114 ადამიანი კი გამოჯანმრთელდა.
ჯანდაცვის ცენტრში ამბობენ, რომ აუცილებელია კორონავირუსის საწინააღმდეგოდ შემუშავებული რეკომენდაციების დაცვა, რომ არ მოხდეს არსებული ეპიდვითარების გაუარესება.
