საქართველოს სამოციქულო მართლმადიდებელ ეკლესიას წმინდა სინოდი მართავს; მღვდელმთავართა კრებას 47 წევრი ჰყავს, მათგან 45 ეპარქიის მმართველია; წმინდა სინოდს კათოლიკოს-პატრიარქი, ილია II ხელმძღვანელობს.
ოფიციალურ ინფორმაციაზე დაყრდნობით ირკვევა, რომ ქონებას არ ფლობს სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და მიტროპოლიტი ბიჭვინთისა და ცხუმ-აფხაზეთისა, წმინდა სინოდის თავმჯდომარე ილია II.
ილია II, ერისკაცობაში ირაკლი ღუდუშაური-შიოლაშვილი, დაიბადა 1933 წლის 4 იანვარს, ორჯონიკიძეში; 1952-1956 წლებში სწავლობდა მოსკოვის სასულიერო სემინარიაში; 1956-1960 წლებში კი _ მოსკოვის სასულიერო აკადემიაში; 1957 წელს აღიკვეცა ბერად; 1960 წელს იღუმენის წოდება მიენიჭა; 1961 წლიდან არის არქიმანდრიტი; 1963 წლიდან _ ბათუმ-შემოქმედელი ეპისკოპოსი; 1967 წლიდან კი ცხუმ-აფხაზეთის ეპისკოპოსი.
1969 წელს მიტროპოლიტის წოდება მიენიჭა; 1977 წლიდან დღემდე არის კათოლიკოს-პატრიარქი.
სინოდის კიდევ ერთი უქონელი წევრი ადიშელი მთავარეპისკოპოსი დავითია. ერისკაცობაში _ გიორგი ტიკარაძე.
იგი დაიბადა 1963 წლის 1 მაისს, ლანჩხუთში. 1995 წელს აღიკვეცა ბერად; 1996 წელს ეკურთხა დიაკვნად და მღვდლად; 1998 წლიდან ეპისკოპოსია. 2006 წელს ებოძა მთავარეპისკოპოსობა.
საჯარო რეესტრის მონაცემებით არც ქონებას და არც ბიზნეს არ ფლობს მარნეულისა და ჰუჯაბის ეპისკოპოსი გიორგი (მარნეულისა და ჰუჯაბის ეპარქიაში შედის ქალაქი მარნეული და მარნეულის მუნიციპალიტეტი, კათედრა და რეზიდენცია მარნეულში). ერისკაცობაში ლერი ჯამდელიანი დაიბადა 1981 წლის 1 ოქტომბერს, დაბა მესტიაში; 2006 წელს აღიკვეცა ბერად და ეკურთხა დიაკვნად; 2007 წლიდან მღვდელია; 2013 წელს ეკურთხა ეპისკოპოსად.
დოკუმენტების თანახმად, ასევე, უქონელია დმანისისა და აგარაკ-ტაშირის, დიდი ბრიტანეთისა და ირლანდიის მთავარეპისკოპოსი ზენონი, ერისკაცობაში – იმედა იარაჯული.
იგი დაიბადა 1972 წლის 17 მარტს, თბილისში; 1993 წელს აღიკვეცა ბერად, ეკურთხა დიაკვნად და მღვდლად; 2003 წლიდან ეპისკოპოსია; 2011 წელს ებოძა მთავარეპისკოპოსობა.
საჯარო რეესტრში არსებული მონაცემების თანახმად, არც ქონება გააჩნია და არც ბიზნესი მეუფე ლუკას _ საგარეჯოსა და ნინოწმინდის მთავარეპისკოპოს, ერისკაცობაში _ ვაჟა ლომიძეს. იგი დაიბადა 1966 წლის 14 სექტემბერს, თბილისში; 1997 წელს აღიკვეცა ბერად; 1998 წელს ეკურთხა დიაკვნად; 1998 წელიდან მღვდელია; 2003 წელს ეკურთხა ეპისკოპოსად; 2011 წელს ებოძა მთავარეპისკოპოსობა.
მეექვსე უქონელი მთავარეპისკოპოსი სინოდის 47 წევრიდან მეუფე ექვთიმეა _
გურჯაანისა და ველისციხის მთავარეპისკოპოსი, ერისკაცობაში _ თეიმურაზ ლეჟავა. იგი დაიბადა 1953 წელს 25 იანვარს, თბილისში; 1990 წელს აღიკვეცა ბერად; 1991 წელს ეკურთხა დიაკვნად და მღვდლად; 2003 წლიდან ეპისკოპოსია; 2011 წელს ებოძა მთავარეპისკოპოსობა.
გამოყენებულია sapatriarqoskapitali.documenti.ge-ს მონაცემები.
ამავე თემაზე: ბინები, მიწები თბილისსა და კახეთში _ რა ქონებას ფლობენ მეუფე კალისტრატე და მეუფე გრიგოლი
მეუფე იოსების პირად საკუთრებაში არსებული მილიონზე მეტად შეფასებული ქონება
