ჩოხატაურის მუნიციპალიტეტის მერს დაბა ბახმაროში ახალი წარმომადგენელი ჰყავს. დავით ჟღენტი აღნიშნულ თანამდებობას მაისიდან იკავებს.
„გურია ნიუსი“ ჟღენტს ესაუბრა იმის შესახებ, თუ რა დახვდა გაკეთებული და რის გაკეთებას გეგმავს:
„დაბა ბახმაროში მერის წარმომადგენლად დავინიშნე მაისში. დღეის მდგომარეობით, ბახმაროში მიმდინარეობს მნიშვნელოვანი პროექტების გახორციელება, კონკრეტულად, აქტიურ ფაზაშია ელექტრომომარაგების ქსელის მშენებლობა, რომ ბახმაროს უახლოეს პერიოდში ჰქონდეს მაღალი ხარისხის ელექტრომომარაგება.
მიმდინარეობს, ასევე, მუშაობა წყალმომარაგების პრობლემის გადასაჭრელად.
ჩემი კომპეტენციებიდან გამომდინარე აქტიურად ჩავები ყველა იმ პრობლემის გადაწყვეტაში, რომელიც ბახმაროში ამოსულ დამსვენებელს აქვს, რათა მუნიციპალიტეტმა დროულად და ეფექტურად შეძლოს პრობლემის აღმოფხვრა რა თქმა უნდა შესაძლებლობის ფარგლებში“, _ გვიპასუხა ჟღენტმა.
რაც შეეხება ინფორმაციას, თუ სად მოღვაწეობდა დავით ჟღენტი მერის რწმუნებულად დანიშვნამდე ასე გამოიყურება:
1992 წელს დავამთავრე 1-ლი საშუალო სკოლა, იმავე წელს ჩავაბარე თბილისის აზიისა და აფრიკის ინსტიტუტში, დავამთავრე 1997 წელს ისტორიისა და საერთაშორისო ურთიერთობების ფაკულტეტი. 1998 წელს მოვიხადე სამხედრო-სავალდებულო სამსახური, შემდეგ არ მახსოვს ზუსტად წელი, მაგრამ ერთი პერიოდი თქვენს რედაქციაშიც ვმუშაობდი.
2006 წლიდან საჯარო სამსახურში ვმუშაობ. სამოქალაქო რეესტრის ეროვნული სააგენტოს ჩოხატაურის სამმართველოს მთავარ სპეციალისტად ვმუშაობდი 2006 -07 წლებში, 2007 წლიდან 2010 წლამდე ვმუშაობდი სამხედრო პოლიციის აჭარის დეპარტამენტის რეგიონულ სამმართველოში.
2010 წლიდან 13 წლის ნოემბრამდე ვმუშაობდი ჩოხატაურში პრობაციის ოფიცრად, 2014 წლიდან ამ წლის მაისამდე ვმუშაობდი ჩოხატაურში, დაბის ადმინისტრაციულ ერთეულში სპეციალისტად. მანამდე ერქვა გამგებლის წარმომადგენლებთან ურთიერთობის განყოფილების სპეციალისტი, შემდეგ როცა გამგებელი გაუქმდა და მერი დაერქვა, გადავედი მერის წარმომაგენლებთან ურთიერთობის განყოფილების სპეციალისტად დაბის ადმინისტრაციულ ერთეულში. მყავს მეუღლე და 2 შვილი“.
