სახელმწიფო უსაფრთხოების სამსახურის ანტიკორუფციული სააგენტოს და გარემოსა და ბუნებრივი რესურსების დაცვის სამინისტროს თანამშრომლებმა ერთობლივად ჩატარებული ოპერატიულ-სამძებრო და საგამოძიებო მოქმედებების შედეგად ქრთამის მიცემის ფაქტზე შპს “ლადი 2011”-ის დამფუძნებელი ვლადიმერ აბაშმაძე დააკავეს.
გამოძიების ინფორმაციით, ვლადიმერ აბაშმაძე დაუკავშირდა გარემოსა და ბუნებრივი რესურსების დაცვის სამინისტროს სახელმწიფო საქვეუწყებო დაწესებულება – გარემოსდაცვითი ზედამხედველობის დეპარტამენტის დასავლეთის სამმართველოს ინსპექტირების განყოფილების უფროს სპეციალისტს და შეატყობინა, რომ სურვილი ჰქონდა ლანჩხუთის რაიონში მდინარე სუფსას სანაპიროდან უკანონოდ მოეპოვებინა სასარგებლო წიაღისეული – ინერტული სამშენებლო მასალა შემდგომი რეალიზაციის მიზნით.
„ბრალდებულმა საჯარო მოხელეს სთხოვა აღნიშნულ საქმიანობაში სამსახურებრივი მფარველობა თავის ხელმძღვანელთან შეთანხმებით, რის სანაცვლოდ დაჰპირდა, რომ წინასწარ ქრთამის სახით მისცემდა მის მიერ ყოველთვიურად მოსაპოვებელი ქვიშა-ღორღის საფასურს, ერთ კუბზე 50 თეთრის ოდენობით” _ აღნიშნავენ უწყებაში.
მათივე ინფორმაციით, შპს “ლადი 2011”-ის დამფუძნებელმა აღნიშნულ საჯარო მოხელეს წინასწარ ქრთამის სახით გადასცა მოსაპოვებელი 8000 კუბი ქვიშა-ღორღის უკანონოდ მოპოვების საფასური _ 4000 ლარი, რა დროსაც იგი სუს-ის ანტიკორუფციული სააგენტოს თანამშრომლებმა ბრალდებულის სახით დააკავეს.
როგორც გურია ნიუსმა გაარკვია, შპს “ლადი 2011” 2016 წლის 12 იანვარსაა რეგისტრირებული.
კომპანიის იურიდიული მისამართი ლანჩხუთის მუნიციპალიტეტის სოფელი ღრმაღელეა. ჩვენი ინფორმაციით, ამავე სოფელში ცხოვრობს მისი 100%-იანი წილის მფლობელი, ქრთამის მიცემის ფაქტზე დაკავებული 60 წლის ვლადიმერ აბაშმაძე.
ჩვენი წყაროს თქმით, აბაშმაძე მარნეულის ყოფილი პროკურორის, მერაბ აბაშმაძის ძმაა.
თავად ვლადიმერ აბაშმაძეს სახელმწიფო სამსახურში არასდროს უმუშავია და სხვადასხვა სახის ბიზნეს საქმიანობით იყო დაკავებული.
დაკავებულ აბაშმაძეს 4-დან 7 წლამდე თავისუფლების აღკვეთა ემუქრება.
