“გურია ნიუსის“ წყაროს ინფორმაციით, ოზურგეთის მუნიციპალიტეტის მერიის სოციალური და იურიდიულ სამსახურის 10 თანამშრომელს, პირად საქმეში, შესაძლოა, საყვედური გამოუცხადონ.
საქმე ეხება, სოციალური დახმარების გაცემის წესში შესულ ცვლილებას, რის მიხედვითაც მოქალაქეებზე დახმარების გაცემა ერთჯერადად 100 ლარი გახდა.აღნიშნული ცვლილება, საკანონმდებლო მაცნემ 2 მარტს, პარასკევს საღამოს 6 საათზე გამოაქვეყნა, დახმარებების გაცემა კი სოციალურმა სამსახურმა ორშაბათს, 5 მარტს დილიდან დაიწყო. ჩვენი წყაროს ინფორმაციით, ამ ფაქტზე მერიის შიდა აუდიტს მოკვლევა ჩაუტარებია და დარღვევები აღმოუჩენია. რის გამოც, ჩვენი წყაროს ინფორმაციით, აუდიტის სამსახურის თანამშრომელმა სოციალური სამსახურის თანამშრომლებს ახსნა-განმარტებების დაწერაც მოსთხოვა.
სოციალური სამსახურის უფროსის პოსტს თამარ დუმბაძე იკავებს. ჩვენი წყაროს ინფორმაციით, მას განცხადების დაწერაც მოსთხოვეს, თუმცა, აღნიშნულთან დაკავშირებით დუმბაძე “გურია ნიუსთან“ საუბრისას თავს იკავებს და გავრცელებულ ინფორმაციას არ ადასტურებს.
როგორც “გურია ნიუსისთვის“ ხდება ცნობილი, ასევე, თანამდებობა, შესაძლოა, დატოვოს ინფრასტრუქტურის, არქიტექტურის, სივრცითი მოწყობისა და კომუნალური სერვისების სამსახურის უფროსმა გოჩა აბაშმაძემ, რომლის პოსტზეც ამავე სამსახურის ერთ-ერთი განყოფილების უფროსი თემურ გიორგაძე მოიაზრება.
ინფორმაციას “გურია ნიუსთან“ ადასტურებს აბაშმაძე, ხოლო თანამდებობიდან წასვლის მიზეზად დაღლას ასახელებს:
_ამ წუთს სამსახურში ვარ, ვზივარ ჩემს სკამზე, კი, ვფიქრობ, რომ განცხადება დავწერო, გადავიღალე, მეც ადამიანი ვარ, დასვენება მინდა, _ ამბობს აბაშმაძე.
ოზურგეთის მუნიციპალიტეტის მერის მოადგილე ირაკლი სირაძე განმარტავს, რომ შიდა აუდიტის სამსახური არა მარტო სოციალურ სამსახურს, არამედ ინფრასტრუქტურის სამსახურსაც შეამოწმებს:
_ყველა სამსახურს შევამოწმებთ, მათ შორის ინფრასტრუქტურასაც. ეს ჩვეულებრივ მუშა პროცესია, დარღვევის გამოვლენის შემთხვევაში კი მოვახდენთ რეაგირებას. რაც შეეხება კონკრეტულ თემას, სოციალურ სამსახურთან დაკავშირებით, ჯერჯერობით, დასკვნა არ არის, თუ დარღვევის ფაქტი გამოვლინდება, შესაბამისად, გაფრთხილება იქნება თუ საყვედური მოუწევთ. ჩვენ გვაქვს შესაბამისი მუხლები, სადაც ხარვეზი აღმოჩნდა, წინასწარ როგორ გითხრათ, თუმცა, არ გამოვრიცხავ. ანგარიშს ვნახავთ შესაბამისი სამსახურის და ვიმოქმედებთ კანონით ადდგენილი წესით, _ამბობს სირაძე.
ოზურგეთის მუნიციპალიტეტის მერიის შიდა აუდიტის სამსახურის უფროსი “გურია ნიუსთან“ კომენტარს არ აკეთებს და აღნიშნვას, რომ ინფორმაციის გაცემის უფლება არ აქვთ:
_ შიდა აუდიტის სამსახური არის კონფიდენციალური, ხელმძღვანელის გარეშე ვერანაირ ინფორმაციას ვერ მოგაწოდებთ, პირდაპირ წერია კანონში ამის შესახებ, შეიძლება მქონდეს სურვილი, მაგრამ კანონი არ მაძლევს იმის საშუალებას, მოგაწოდოთ ინფორმაცია, ჯერ არავინ არაფერი არ იცის დაზუსტებით, ყველაფერი არის კონფიდენციალური ამ ეტაპზე. ახსნა-განმარტებები ვინ დაწერა _თქვან!
რაც შეეხება, იურიდიულ სამსახურს, უფროსის ლაშა თავაძის განმარტებით, აღნიშნულთან დაკავშირებით მოკვლევას აწარმოებს აუდიტის სამსახური, აქედან გამომდინარე, კომენტარს ის ვერ გააკეთებს:
_ მე არ ვიცი, რა ხდება, მაგისთვის არსებობს აუდიტის სამსახური, რომელიც აწარმოებს ამ საქმეს და ის თუ არ გეუბნებათ, მე საიდან უნდა გითხრათ? თავად არიან პასუხისმგებლები, კონკრეტულად ინსპექტირების განყოფილება, ესენი სწავლობენ და გითხრათ მათ, _ამბობს თავაძე.
“გურია ნიუსის“ წყაროს ინფორმაციით, საკადრო ცვლილებების გახორციელება ოზურგეთის მერიაში გაგრძელდება.
