ლანჩხუთში „ქართული ოცნების“ ათეულში აუცილებლად იქნებიან: საკრებულოს თავმჯდომარის მოადგილე ვერიკო კვირკველია, იურიდიული და ეთიკის კომისიის თავმჯდომარე გოგი ხელაძე, ფრაქციის თავმჯდომარის მოადგილე ლოლიტა ურუშაძე, პარტიის ახალგაზრდული ორგანიზაციის ხელმძღვანელი კარლო წილოსანი, „ხალხის ძალის“ კვოტით _ დარეჯან (მაცაცო) ბურჭულაძე და პარტიის მთავარი იდეოლოგი და პიარი _ ნინო მშვიდობაძე, _ ამ ინფორმაციას „გურია თუდეი“ ექსკლუზიურად ავრცელებს.
ჯერჯერობით, საბოლოოდ გადაწყვეტილი არაა, ვინ იქნება სიის პირველი ნომერი. დიდი ალბათობით, „ოცნების“ სიას სათავეში საჭადრაკო კლუბ „ლანჩხუთის“ პრეზიდენტი თენგიზ ხუხუნაიშვილი ჩაუდგება, თუმცა ასევე ითქვა, რომ შესაძლოა, წელს მიდგომა შეიცვალოს და პირველ ნომრად არა ახალი სახე, არამედ საკრებულოს თავმჯდომარეობის კანდიდატი ბესიკ ტაბიძე დასახელდეს.
ყველაფერი საბოლოოდ ორშაბათს უნდა გადაწყდეს, თუმცა ეს ფორმალური საკითხია _ ტაბიძე, რომელიც ყველა არჩევნებში 75%-ზე მაღალ მხარდაჭერას იღებს, დიდი ალბათობით, ამჯერადაც გაიმარჯვებს ნიგვზიანის სამაჟორიტარო ოლქში და შესაბამისად, პარტიული სიის სათავეშიც რომ იყოს, თავის ადგილს „გამოათავისუფლებს“ და შესაბამისად, სია აინაცვლებს.
კიდევ ერთი შესაძლო ვერსიით, სიის პირველი ნომერი ვერიკო კვირკველია იქნება, რომელიც გასულ ორ არჩევნებში სამეულში იყო და ეს პოზიცია ახლაც განაღდებული აქვს.
ვინ შეავსებს „ოცნების“ ათეულს და ვინ იქნება მეორე ათეულის პირველ ნომრებად, ამაზე დიდი ბჭობაა და მმართველ პარტიასთან დაახლოებული პირებიც ვერაფერს ამბობენ. აქვე შეგახსენებთ, რომ წინა ადგილობრივ არჩევნებში პარტიული სიით „ქართულმა ოცნებამ“ ლანჩხუთის საკრებულოში 12 წევრი შეიყვანა.
ძველი ათეულიდან გიორგი იმნაიშვილი შუხუთის მაჟორიტარობის კანდიდატია, ვლადიმერ ნანაძე, სავარაუდოდ, საკრებულოს თავმჯდომარის თანაშემწის პოზიციაზე გადავა, ხოლო გიორგი მორჩილაძე, ასევე სპარტაკ კვაჭაძე სიაში იქნებიან, მაგრამ ჯერ ვერავინ ამბობს, რომელ პოზიციაზე. სავარაუდოდ, ათეულში მოიაზრება ჩოჩხათის მოქმედი მაჟორიტარი რევაზ კვერენჩხილაძე.
ცნობილია, რომ საკრებულოს პირველ პირად ხელისუფლება ისევ ტაბიძეზე აკეთებს აქცენტს, მოადგილის თანამდებობებს შეინარჩუნებენ ვერიკო კვირკველია და გიორგი ჩახვაძე, მათგან შეირჩევა, სავარაუდოდ, ვინ იქნება „პირველი“, ხოლო კიდევ ერთი მოადგილის ვაკანსიაზე გიორგი ხელაძეს მოიაზრებენ, რომელიც „ქართული ოცნების“ პირველი მოგებული ადგილობრივი თვითმმართველობის არჩევნების შემდეგ საკრებულოს თავმჯდომარე იყო.
ეს პოზიცია ვაკანტური იმიტომ გახდება, რომ საკრებულოს თავმჯდომარის პირველი მოადგილე, ყველაზე სტაჟიანი მაჟორიტარი ემზარ თედორაძე საკანონმდებლო ორგანოში მოხვედრისთვის აღარ იბრძოლებს _ აცანის სამაჟორიტარო ოლქში მისი მეუღლის, მაია ლომთაძის კანდიდატურა დასახელდება.
