საწავლო პროცესი დღეს ჩოხატაურის ყველა სკოლაში განახლდა.
რა სიახლეებით შეხვდა ჩოხატაური ახალ სასწავლო წელს, რა კეთდება ეპიდვითარებასთან გასამკლავებლად და როგორია დასწრება სასწავლო წლის პირველ დღეს- ამ საკითხების შესახებ ჩოხატაურის საგანმანათლებლო რესურსცენტრის ხელმძღვანელს შორენა სიხარულიძეს ვესაუბრეთ.
მისი თქმით, დღეს სკოლებში დასწრება თითქმის 100%-იანი იყო. სწავლა ყველა სკოლაში დაიწყო, თუმცა, ონლაინწავლებაზე კოხნარის საჯარო სკოლის მოსწავლეები რჩებიან. ამის მიზეზად კი რთული ეპიდვითარება სახელდება.
„აბსოლუტურად ყველა სკოლაში განვაახლეთ სასწავლო პროცესი. მანამდე ვემზადებოდით და ყველა სკოლაში შევიტანეთ სპეციალური საშუალებები, რომ ეპიდვითარებას გავმკლავებოდით რეგულაციების დაცვით. დღეს რამდენიმე სკოლა მოვინახულეთ, 4 სკოლაში ვიყავით და დასწრება თითქმის 100% გვაქვს. მოსწავლეებს მიეცათ საშუალება, რომ ონლაინ პლატფორმაზე დარეგისტრირდნენ და აირჩიონ ონლაინ სწავლების ფორმა. ძალიან ცოტა მოსწავლე გვყავს ონლაინსწავლებაზე.
კოხნარის მიმართულებით ცოტა რთული ეპიდვითარება გვაქვს. ამიტომ მშობლებმა გადაწყვიტეს, სანამ ეს ეპიდვითარება ცოტა მაინც არ დასტაბილურდება დარჩნენ ონლაინსწავლებაზე. პირველ;კლასელები კოხნარის საჯარო სკოლაშიც მივიღეთ. დანარჩენები ონლაინსწავლებაზე დარჩა. იმედია, ეს ვითარება დიდხანს არ გასტანს“,_ ამბობს შორენა სიხარულიძე.
რაც შეეხება სიახლეებს, წელს ჩოხატაურის მუნიციპალიტეტის 2 სოფლის მოსწავლეები ახალ სკოლებში წავიდნენ.
„სიახლე ისაა, რომ 2 სკოლის ახლადგახსნილი შენობა გვაქვს სოფელ გუთურსა და ერკეთში. სადაც პირველად დაიწყეს სასწავლო პროცესი. გუთურის საჯარო სკოლაში სწავლობს 84 მოსწავლე და 10 პირველკლასელი შევიდა წელს, ერკეთის საჯარო სკოლაში 51 მოსწავლე სწავლობს და 8 პირველკასელი მივიღეთ. შესაბამისად, ეს სკოლები მოინახულეს გუბერნატორმა და ადგილობრივი თვითმმართველობის წევრებმა“,_ ამბობს სიხარულიძე.
რაც შეეხება იმ რეგულაციებს, რისი დაცვაც მოსწავლეებსა და მასწავლებლებს სასწავლო პროცესის მიმდინარეობისას უწევთ, ასეთია:
„ყველა სკოლაში გვაქვს დეზობარიერი, მიმდინარეობს თერმოსკრინინგი, კონტროლდება უცხო პირების შესვლა-გასვლა, ყველას, მათ შორის პირველკლასელებს და მასწავლებლებსაც პირბადეები უკეთიათ. მასწავლებლების 80% აცრილია. არის სკოლები, სადაც აცრილი პედაგოგები პროცენტულად მეტია; არის სკოლები, სადაც ნაკლებია. ტესტირება სავალდებულოა და ყოველ 5 დღეში ერთხელ გაიტესტება ყველა მასწავლებელი. მობილიზებული გვყავს დამლაგებლები, რომ შესვენების პერიოდში სადეზინფექციო სამუშაობი ჩაატარონ, განსაკუთრებით სკოლის ისეთ ნაწილში, სადაც აქტიურად არიან ბავშვები. დეზინფექცია უტარდება კიბის მოაჯირებს, კარის სახელურებს, საპირფარეშოებს“,_ გვითხრა სიხარულიძემ.
[sexy_author_bio]
