არაბთა გაერთიანებული საემიროების დეველოპერული კომპანია Eagl Hills, უძრავი ქონების მსხვილი საერთაშორისო დეველოპერი, საქართველოში უპრეცედენტო მასშტაბის საინვესტიციო პროექტის გახორციელებას გეგმავს.
პროექტის ჯამური საინვესტიციო ღირებულება 6.5 მილიარდ აშშ დოლარს აღემატება და ითვალისწინებს თბილისთან ახლოს საცხოვრებელი და კომერციული კომპლექსების, სასტუმროებისა და რეკრეაციულ სივრცეების დაახლოებით 600 ჰექტარზე გაშენებას, გარდა ამისა, გონიოში პრემიუმკლასის საკურორტო კომპლექსის მოწყობას.
პროექტის შესახებ არსებობს მოლოდინი, რომ შეიქმნება 30 000-ზე მეტი სამუშაო ადგილი. საქართველოს სახელმწიფო გახდა ერთობლივი საწარმოს 33%-ის თანამფლობელი, რაც იმას ნიშნავს, რომ სახელმწიფო, ასევე, მიიღებს დივიდენდებსა და შემოსავალს.
ინვესტორთან გაფორმებული შეთანხმება მთავრობის ბრძანებით კომერციულ საიდუმლოდ გამოცხადდა, რასაც საპროტესტო აქცია მოჰყვა დედაქალაქში.
აქციის ერთ-ერთი ორგანიზატორის კონსტიტუციონალისტ, ვახუშტი მენაბდის თქმით, “ქართულმა ოცნებამ” უნდა გაასაჯაროოს Eagle Hills-თან დადებული შეთანხმება და საზოგადოებას მიაწოდოს სრული ინფორმაცია მიწის გადაცემის პირობებზე:
“ქართულმა ოცნებამ” გადაწყვიტა, რომ უფლება აქვს 1000 ჰექტრამდე ტერიტორია _ ტყე, მიწა, მდინარე, რომელიც ეკუთვნის ქართველ ხალს, გადასცეს ერთ კერძო კომპანიას.
“ქართულმა ოცნებამ” ეს გადაწყვეტილება ქართველ ხალხთან ყოველგვარი კონსულტაციების გარეშე მიიღო.
ეს აჩვენებს იმას, რომ “ქართული ოცნება” არ არის ძალა, რომლისთვისაც ქართველი ხალხის აზრის მნიშვნელოვანია.
ეს არის რეჟიმი, რომელიც უზურპაციას უკეთებს არა მხოლოდ ძალაუფლებას, არამედ ჩვენ სიმდიდრეს _ ქართველ ხალხს ართმევს საკუთარ სივრცეს და აძლევს კერძო კომპანიას.
მეორე არგუმენტი არის სოციალური. ეს ნიშნავს იმას, რომ ამ მიწაზე უნდა აშენდეს ორი ქალაქი _ თბილისთან და ბათუმთან, რაც შეცვლის ქალაქის იერსახეს, ცხოვრების სტილს და განაშენიანებას.
ამასთან, ხელშეკრულება სრულად გასაიდუმლოებულია, რადგან ის არის ქართველი ხალხის საწინააღმდეგოდ დადებული ხელშეკრულება, თან გვეუბნებიან, რომ ეს არის ქართველი ხალხის სასიკეთო ინვესტიცია“, _ განაცხადა ვახუშტი მენაბდემ.
EAGL HILSS-ის საქართველოში შემოსვლის შეფასება გურიაში ოპოზიციონერ პოლიტიკოსებს ვთხოვეთ.
ჩოხატაურის საკრებულოს წევრი პარტია “ლელოდან” მამუკა ცინცაძე გვპასუხობს, რომ თუ პროექტი გახორციელდა, ქვეყნისთვის კატასტროფა იქნება.
_ ცუდად და უარყოფითად ვაფასებ. მე მგონი, ქართველები ვერ შეძლებენ იქ ბინის შეძენას. მამუკა კაციტაძის არ იყოს, დავით გარეჯი საქართველოაო რომ იძახდნენ, კრწანისი და გონიო არ არის საქართველო? შეიძლება სულაც პიარი იყოს. აბა, ხელშეკრულება გასაიდუმლოებული რატომ არის? თუ დაიწყო ამ პროექტის გახორციელება, ეს საქართველოსთვის კატასტროფა იქნება. ქართველები წასულები არიან ქვეყნიდან და სხვები შემოვლენ.
“ერთიანი ნაციონალური მოძრაობის” ლანჩხუთის ორგანიზაციის თავმჯდომარე კახა ასკურავა:
_ მე პროექტს არ ვიცნობ. კომერციული საიდუმლოება არისო და მე კი არა, სპეციალისტები არ იცნობენ, ამიტომ შემიძლია მხოლოდ პოლიტიკური შეფასება გავაკეთო. გემახსოვრებათ ჩინელების და თურქების ქსენოფობიური პროპაგანდა თვითონ “ოცნების” მხრიდან, როცა ამბობდნენ რომ მიხეილ სააკაშვილმა ბათუმი თურქებს მისცა და თბილისი _ ჩინელებს. ახლა უფრო მგონია, რომ ეს არაბული ექსპანსიაა საქართველოში და არა ინვესტიცია. წლებმა დაამტკიცა რომ არანაირი არც თურქული და არც ჩინური საფრთხეები 2003-2012 წლებში არ არსებობდა და “ოცნების” მიერ მოგონილი პროპაგანდა იყო თავიდან ბოლომდე. რადგან კომერციულ საიდუმლოს ადებენ იმის გამო რომ არ გახმაურდეს და არ გაიგოს მოსახლეობამ, ბიძინა ივანიშვილის “სიკეთე” მგონია. ის არაფერს არ აკეთებს ამ ქვეყანაში ხალხის სასარგებლოდ. აკეთებს პირადი სარგებლის მიზნით და, ალბათ, პირად სარგებელს ღებულობს ქვეყნის გაყიდვის ხარჯზე. რუსებს თუ მიყიდა ქვეყანა, არაბებს ვერ მიყიდის?
პარტია “ახალის” ჩოხატაურის ორგანიზაციის ხელმძღვანელი, ბაჩო ახალაძე გვეუბნება:
_ თბილისის სამხრეთით 590 ჰექტარი მიწის გადაცემა არაბულ დეველოპერულ კომპანიაზე, განხილვისა და საზოგადოებრივი ჩართულობის გარეშე, მხოლოდ ინვესტიციის მოზიდვად არ შეიძლება ჩაითვალოს _ ეს არის სახელმწიფოსა და ეროვნული ინტერესების ღალატი.
საუბარია ტერიტორიაზე, რომელიც მოიცავს კრწანისის ტყე–პარკის ნაწილსაც _ ერთ–ერთ ყველაზე მნიშვნელოვან ეკოლოგიურ ზონას დედაქალაქის სამხრეთით. ამის მიუხედავად, ხელისუფლებამ აირჩია მემორანდუმის გაფორმება დახურულ კარს მიღმა, საზოგადოებისა და სპეციალისტების აზრის გარეშე.
მთავრობამ თითქოს “ინვესტიციის მოზიდვის” სახელით, მთლიანი ტერიტორია უცხო ქვეყნის კერძო კომპანიას გადასცა, თითქოს ეს სახელმწიფო საკუთრება კი არა, კერძო ქონება იყოს. საზოგადოებას არ აქვს პასუხი _ რა ფასად, რა პირობებით და ვისი ინტერესებისთვის ხდება ეს მიწის გადაცემა.
Eagle Hills-ის მსგავსი პროექტები, სადაც დომინირებს სუპერ–ელიტური, გამიჯნული საცხოვრებელი ზონები, მხოლოდ ამძაფრებს სოციალურ უთანასწორობას. ამ ტიპის პროექტები ქმნის იზოლირებულ “სასტუმრო–საქართველოს“, სადაც უბრალო მოქალაქეს ადგილი აღარ აქვს _ არც საცხოვრებლად, არც დასასვენებლად.
მიუხედავად იმისა, რომ პროექტი $6 მილიარდიან ინვესტიციად არის გამოცხადებული, გაუგებარია, რა ბენეფიტს მიიღებს ქართული საზოგადოება, გარდა სამშენებლო ნებართვებისა და მიწის დაკარგვისა.
ეს ყველაფერი ხდება იმ ფონზე, როცა საქართველო არ ფლობს მკაფიო მიწის პოლიტიკას, გარემოსდაცვითი და ურბანული რეგულაციები ფორმალურია, ხოლო სახელმწიფო ორგანოები ფაქტობრივად უცხო ინვესტორის ინტერესების გამტარად იქცნენ.
თუ სახელმწიფოს მიწა, ტყე, მდინარის სანაპირო და ბუნებრივი ზოლები ასე მარტივად შეიძლება “ინვესტიციად” შეიფუთოს და გაიყიდოს, მაშინ რაღაა დარჩენილი ეროვნული ინტერესებიდან?
ეს აღარ არის ეკონომიკური თანამშრომლობა _ ეს არის საერთო სივრცის, რესურსებისა და იდენტობის გადაცემა, რომელსაც ვერაფრით ვუწოდებთ განვითარებას, _ ამბობს ახალაძე.
“ჩვენ ვკარგავთ მწვანე ტერიტორიას, რომელიც შთანთქავს თბილისის გამონაბოლქვს“, _ ამბობს გარემოს დაცვის ყოფილი მინისტრი ნინო ჩხობაძე.
მისი აზრით, პროექტი ყველაზე დიდ პრობლემას თავად თბილისს შეუქმნის. ეს ტერიტორია _ “ჭალის ტყე”, დედაქალაქის რეკრეაციულ ზონად ითვლება და ის პრაქტიკულად ერთადერთი მტკვრისპირა ტყეა, ბუნებრივი რეკრეაციული ზონა, რომელიც ხელუხლებელი შემორჩა ქალაქს.
ოფიციალური ინფორმაციით, ეკონომიკისა და მდგრადი განვითარების მინისტრი მასშტაბურ პროექტზე საუბრისას, ამბობს, რომ Eagle Hills-ის საინვესტიციო პროექტის მიმართ საქართველოს ოპოზიციური სპექტრი თავიდანვე ნეგატიურად იყო განწყობილი.
ირაკლი კობახიძე კი ამბობს, რომ ეს არის ერთ-ერთი ყველაზე გამორჩეული პროექტი, რაც ეკონომიკური კუთხით ხორციელდება ქვეყანაში და ინვესტირება ბინადრობას არ ნიშნავს:
“ინვესტიციის კუთხით არის უპრეცედენტო თავისი მასშტაბით _ 6,5 მილიარდ დოლარზეა საუბარი. ასეთ დროს, როდესაც ახერხებენ სპეკულირებას, ეს არის ყველაფერზე მეტყველი ფაქტი. თავიდან “ლელომ” ასწია ეს კამპანია, მეორე არის “ალტ ინფო“. ჯერ ვიფიქრე, რომ “ლელო” დაეშვა “ალტ ინფოს” დონეზე, მერე ვიფიქრე, რომ “ალტ ინფო” დაეშვა “ლელოს” დონემდე. საბოლოო ჯამში მივედი იმ დასკვნამდე, რომ ორივე არის ფსკერზე. ასეთია ამ ადამიანების რეალური სახე. ძალიან მძიმეა მათი მდგომარეობა, 6,5 მილიარდ დოლართან დაკავშირებითაც ახერხებენ სპეკულირებას, გარკვეულ ეტიკეტებს იყენებენ ამასთან დაკავშირებით, თითქოს უცხოელების ქალაქები შენდება საქართველოში და ა. შ. ყველაფერი არის ცარიელი სპეკულაციები.
რაც შეეხება ბინის რეალიზაციას უცხოელებზე, ეს არ ნიშნავს იმას, რომ უცხოელი ავტომატურად იღებს საქართველოში ცხოვრების უფლებას. ბოლო წლების განმავლობაში საშუალოდ წლიურად 15 ათასი ბინა იყიდება უცხოელებზე, თუმცა, ერთია ბინების რეალიზაცია, რაც ძალიან მნიშვნელოვანია ეკონომიკის განვითარებისთვის, განსაკუთრებით ამ კონკრეტული მშენებლობის სექტორის განვითარებისთვის და მეორეა, ვინ იღებს და ვინ არ იღებს საქართველოში ბინადრობის ნებართვას“, _ განაცხადა ირაკლი კობახიძემ.
ავტორი
