ჩოხატაურის მუნიციპალიტეტის სოფელ გოგოლესუბანში მცხოვრები ლია სიხარულიძის სახლი რამდენიმე დღის წინ გაძარცვეს.
როგორც სახლის პატრონი ჩვენთან საუბრისას ამბობს, წაღებულია თანხა და ძვირფასეულობა.
“10 აგვისტო იყო. საღამო იყო, თხილს ვარჩევდი “კუხნის” წინ, თან ტელევიზორი მქონდა ჩართული. მძარცველები უკანა მხრიდან არიან შემოსული. ფანჯარაზე სარკმელი მქონდა ღია. იქედან გაუღიათ ფანჯარა და ბადე ჩაუჭრიათ.
წინა დღეებში თხილი ჩავაბარე, პენსია მქონდა აღებული. სულ 450 ლარი მქონდა სახლში. კარადაში მედო, ასევე, წაღებულია ოქროს და ვერცხლის სამკაულები და ჩანთა, რომელშიც საბუთები მედო..
ყველაფერი გადაბრუნებული იყო ოთახში _ კარადა, კომოდი, საწოლი. ეტყობა ორი იყვნენ. ერთი მდარაჯობდა არ შევსულიყავი.
ოთახის წინ ზარი მიყენია, სენსორულია, ვინმე რომ გაივლის, რეკავს თავისით. რამდენჯერმე კი დარეკა, მაგრამ ვიფიქრე, კატამ გაირბინა-მეთქი, ამას რას წარმოვიდგენდი.
შვილები უცხოეთში მყავს და წინა დღით ველაპარაკებოდი ინტერნეტით. ფულს გამოგიგზავნიო, _ მითხრა. შეიძლება ამას მოკრა ვინმემ ყური. ვიღაც დადარაჯებული რომ იყო, ფაქტია”, _ ამბობს ლია სიხარულიძე.
მისი თქმით, ძარცვა იმისი ჩადენილია, ვინც მისი სახლი და სახლთან მისასვლელი “უკანა გზა” კარგად იცის. თუმცა, კონკრეტულად ვინ შეიძლება ყოფილიყო, პასუხის გაცემა უჭირს.
“აქ, ამ გზით უცხო ვერ მოვიდოდა. ეს იმის გაკეთებულია, ვინც იცის, როდის რას ვაკეთებ და სახლში შემოსასვლელ უკანა მხარეს კარგად იცნობს. თუმცა, ასე ხელაღებით ავდგე და ვინმეზე ვიფიქრო, რომ ეს ჩაიდენდა ამას, არ შემიძლია. ვერც ვფიქრობ, ვინ შეიძლება ყოფილიყო, _ ამბობს ლია სიხარულიძე და ჯანმრთელობის შესახებ პრობლემებზე საუბრობს.
ჩანთაში მქონდა ყველა საბუთი პირადობის მოწმობის ჩათვლით. დავრჩი ყველაფრის გარეშე. ჯანმრთელობის პრობლემები მაქვს. გლაუკომა მაქვს, ექიმთან ვარ წასასვლელი და იმის გამო, რომ პირადობის დამადასტურებელი მოწმობა არ მაქვს, ვერ მივდივარ.
ლია სიხარულიძის თქმით, ფაქტის შესახებ მაშინვე აცნობა პოლიციას.
“10 საათსა და 15 წუთზე შევედი ოთახში, მაშინვე დავრეკე პოლიციაში. 11 საათზე მოსული იყვნენ პოლიციის წარმომადგენლები. შემდეგ ძაღლიც ჰყავდათ მოყვანილი, მაგრამ კვალს, ჯერჯერობით, ვერ მიაგნეს. გუშინაც ვიყავი პოლიციის ჩოხატაურის განყოფილებაში უფროსთან, გიგლა მოსიძესთან. მითხრა, რომ მიმდინარეობს გამოძიება. შეიძლება დამნაშავე ერთ დღეში ვიპოვოთ, ერთ თვეში, რამდენიმე თვეში, შეიძლება ვერ ვიპოვოთო (?) _ ამბობს ლია სიხარულიძე.
აღნიშნულ ფაქტთან დაკავშირებით შინაგან საქმეთა სამინისტროს პრესსამსახურს დავუკავშირდით.
უწყების ინფორმაციით, საქმე 177-ე მუხლით აღიძრა.
“საქმე აღძრულია 177-ე მუხლით, რაც ქურდობის გულისხმობს. ინტენსიურ რეჟიმში მიმდინარეობს საგამომძიებლო მოქმედებები”, _ ნათქვამია უწყების კომენტარში.
