8 ივნისს, ოზურგეთის ფოლკლორის ცენტრში დასაქმების ფორუმი გაიმართა.
მრავალი ათეული წელია, ჩვენს ქვეყანაში დასაქმების პრობლემა არ გადაჭრილა, პირიქით, ქვეყნიდან სწორედ დასაქმების მიზნით, უამრავი მოქალაქე მიდის. მათი უმეტესობა ახალგაზრდებია, რაც შემაშფოთებელია.
დასაქმების ფორუმის უპირველესი მიზანიც, როგორც ღონისძიებაზე ითქვა, ახალგაზრდებისთვის, ნებისმიერი ასაკის ადამიანისთვის სამუშაო ადგილის შექმნაა, მისთვის ხელსაყრელი პირობების შეთავაზებით.
ფორუმი პროექტის დირექტორმა, თამარ ღლონტმა გახსნა.
შეხვედრას ესწრებოდა ოზურგეთის მუნიციპალიტეტის მერი ავთანდილ თალაკვაძე:
_ ჩემი საარჩევნო კამპანიის ერთი მთავარი პრიორიტეტი სწორედ დასაქმება იყო. ასე იქნება ახლაც და მომავალშიც გავაგრძელებ ამაზე ზრუნვას, _ თქვა მან.
სამწლიანი პროექტი, რომელიც ევროკავშირის დაფინანსებით ტარდება, სახელმწიფოსა და სამოქალაქო სექტორს შორის აქტიურ თანამშრომლობას და დასასაქმებელ და დამსაქმებელს შორის, მჭიდრო კომუნიკაციას ითვალისწინებს.
_ მოგიწოდებთ, დღესვე თუ არ იქნება დასაქმების შესაძლებლობა, ნუ იფიქრებთ, რომ მომავალშიც არ გექნებათ შანსი. ეს არ ნიშნავს, რომ დღევანდელი ფორუმი არის კარგი მაგალითი, თუ როგორ უნდა მოხდეს ეს. გავეცნოთ ყველა ვაკანსიას და ვიფიქროთ, ამ წუთს მოცემულობა როგორია, იპოვით თუ არა საკუთარ თავს არსებულ ვაკანსიებზე, _ უთხრა შეხვედრის მონაწილეებს, ღონისძიების ერთ-ერთმა ორგანიზატორმა ლიკა მგელაძემ.
ფორუმზე გამოსულმა ორგანიზატორებმა თუ დასაქმების მსურველებმა, ისაუბრეს, რომ ფორუმის უპირველესი მიზანი არის, დიდი დროის განმავლობაში უმუშევარ პირთა დასაქმება.
ფოლკლორის ცენტრის ფოიეში, წარმოდგენილი იყო ოცდაათამდე კომპანია, რომლებიც მოსულ სამოქალაქო პირებს ვაკანსიებს სთავაზობდნენ.
დამსაქმებლები იყვნენ ისეთი ცნობილი ორგანიზაციები, როგორებიცაა: „ლიბერთი ბანკი“, „თი ბი სი ბანკი“, „კრედო ბანკი“, კომპანია „სანდომი“, ჯინსების სამკერვალო საწარმო, შპს „გზამშენი 18“, ანასეულის ჩაის ფაბრიკა, ვაკიჯვრის საკალმახე მეურნეობა, მაღაზია „ლიბრე“ „ჯიბე“ და სხვები.
სულ ამ ფორუმზე 30-მდე მცირე და საშუალო კომპანიებმა წარმოადგინეს ვაკანსიები.
სამუშაოს მაძიებლები ინტერესდებოდნენ, თუ რა პოზიციაზე დასაქმებას სთავაზობდნენ მათ და როგორი იქნებოდა პირობები, ანაზღაურება…
მაგალითად: შპს „ლურჯი ველი“ ტექნოლოგის და მუშების ადგილს, „ვასაძის პური“ ელექტრიკოსის და მცხობელის (კონდიტერის), სასტუმრო „პარაგრაფი“ მიმტანის, ბარმენის, მზარეულის პოზიციაზე მუშაობას სთავაზობდნენ მსურველებს.
მაღალანაზღაურებადი სხვადასხვა სახის ვაკანსიები წარმოადგინა საქართველოს იუსტიციის სამინისტროს სპეციალურმა პენიტენციალურმა სამსახურმა.
_ 2022 წლის ბოლოს დაბა ლაითურში იხსნება სპეციალური პენიტენციალური დაწესებულება, რომელიც იქნება საერთაშორისო სტანდარტების შესაბამისი, თანამედროვე ინფრასტრუქტურით აღჭურვილი დაწესებულება, სადაც გვაქვს ვაკანსიები: უსაფრთხოების განყოფილების ინსპექტორები, ინსპექტორ-კონტროლიორები, ფსიქოლოგი, ექსკორტის ოფიცერი და ა.შ. _ თქვეს მათ.
მოსულ სამუშაოს მაძიებელთა შორის, უმეტესობა ახალგაზრდები იყვნენ.
კომპანია „სანდომის“ წარმომადგენლები ჩვენი იქ ყოფნისას მათთან დასაქმების მსურველებს გაესაუბრნენ.
მაია ქავთარაძე, 40 წლის: „სანდომის“ წარმომადგენლებმა დიასახლის- კონსულტანტის ვაკანსია შემომთავაზეს. მე დავინტერესდი, თუ როგორი ანაზღაურება მექნებოდა. კომპანიის წარმომადგენლებმა მითხრეს, რომ თვიური ანაზღაურება 600-ლარიდან 800 ლარამდე იქნება, რაც ჩემთვის მისაღებია.
ნინო გუჯაბიძე, ახალგაზრდა დედა: მოვედი, ძალიან მომწონს ასეთი ღონისძიება, თუმცა, ჩემი პროფესიის საჭიროება ვერსად აღმოვაჩინე. მე მცენარეთა დაცვის ტექნიკოსი ვარ. ახლა ვფიქრობ, რომ ისეთი პროფესია შევარჩიო, რომელიც ჩემს მოტივიაციასთან ახლოს იქნება. ვიპოვი თუ არა სამუშაო ადგილს, ახლო მომავალში გაირკვევა. ასპროცენტიანი იმედი არ მაქვს, თუმცა, ასეთი ღონისძიება მართლაც კარგია და მისასალმებელია. როგორც დაიწყო, თუ ასე გაგრძელდება, ალბათ, შედეგი დადგება, _ გვითხრა ქალბატონმა ნინომ.
_ 21 წლის ვარ. შევავსე განაცხადი. იმედია, დავსაქმდები, _ გვითხრა დვაბზუს მცხოვრებმა მარიამ ტრაპაიძემ.
კესო წულაძე, 36 წლის, ოზურგეთის მკვიდრი: დავამთავრე პროფესიული კოლეჯი. ვფლობ უცხო ენებს. საოფისე პროგრამას ავირჩევ, უფრო. კარგად არ ვარ დარწმუნებული, რომ სამუშაოს ვიპოვი. თუმცა, შინ ხომ არ დავჯდები. უნდა ვცადო, რომ გამომივიდეს, _ გვითხრა მან.
დამსაქმებელთა შორის, ყველაზე მეტი ვაკანსია „ლიბერთი ბანკს“ ჰქონდა წარმოდგენილი:
_ გვჭირდება მოლარე ოპერატორები. ასევე, კონსულტანტები. ჩვენ თვითონ გადავამზადებთ განცხადებით შემოსულ ადამიანებს. საწყისი ხელფასი 650 ლარი იქნება. დიჯითალ-კონსულტანტის სამუშაო დღე, გვაქვს აგრეთვე 4-საათიანი ანუ ნახევარი დროით. თუ მეტი განცხადება შემოვა, მოლარე-ოპერატორებს მეტი რაოდენობითაც დავასაქმებთ, _ გვითხრა „ლიბერთი ბანკის“ ოზურგეთის წარმომადგენელმა ლაშა ასათიანმა.
საწარმო „ანასეულის ვოდკა“ დასაქმების მაძიებლებს აგრონომის, ტექნოლოგის, არყის გამომხდელის პოზიციაზე სთავაზობდა ადგილებს. თუმცა, აქ ბევრი განცხადება არ შესულა. არადა, აგრონომის პროფესიის მქონე სპეციალისტები უკვე სანთლით საძებარია.
_ რამდენიმე ვაკანსია გვაქვს. უპირველესი აგრონომია, რომელიც სოფლის მეურნეობის ღერძს წარმოადგენს. აგრონომებს კი უშვებს აგრარული უნივერსიტეტი, მაგრამ ახალგაზრდები დედაქალაქში დარჩენას არჩევენ და იქ ეძებენ სამუშაოს. ძალიან მჭირდება სამაცივრე მეურნეობის ტექნიკოსიც, _ გვითხრა საწარმოს წარმომადგენელმა გია ხუჭუამ.
მკერავისა და მკერავის დამხმარის სპეციალისტის ვაკანსიას სთავაზობდა სამუშაოს მძებნელებს ოზურგეთში მდებარე ტექსტილის სამკერვალო ფაბრიკა, რომელიც თურქ ინვესტორს ეკუთვნის.
კითხვაზე, რომ დღეისთვის საწარმოში არსებული ხელფასით მუშები უკმაყოფილო არიან, „გურია ნიუსს“ ფაბრიკის წარმომადგენელმა, დირექტორის თანაშემწემ ასეთი პასუხი გასცა:
_ ტექსტილის სფეროში ძალიან მაღალი ხელფასი არ არის. სექტემბრის თვიდან იგეგმება წინსვლისკენ ნაბიჯის გადადგმა. პანდემიის პირობებშიც ძალიან შეგვეშალა ხელი. თუმცა, ჩვენ მუდამ გვაქვს სურვილი, ჩვენთან დასაქმებულ ადამიანებს კომფორტული პირობები შევუქმნათ, როგორც დასაქმების გარემოს, ისე ხელფასი მხრივ, _ გვითხრა მან.
დღის განმავლობაში სამასზე მეტმა ადამიანმა შეავსო განაცხადი, ვაკანტურ ადგილზე დასასაქმებლად.
მათ ჰქონდათ შესაძლებლობა, პირისპირ გაცნობოდნენ დამსაქმებელს, გამოევლინათ საკუთარი უნარები.
შეხვედრაზე იყვნენ ისეთი დამსაქმებლებიც, რომლებმაც განაცხადეს, რომ პროფესიული უნარების დაუფლებაში და გადამზადებაში არ იღებდნენ მონაწილეობას. ხარატის და შემდუღებლის პროფესია, რის ვაკანსიაც მათ ჰქონდათ, აუცილებლად მიღებული უნდა ჰქონდეს პირს მანამ, ვიდრე საწარმოში განცხადებას შეიტანს.
ფორუმზე დასაქმების სურვილით შშმ პირი თამუნა ლურსმანაშვილი მოვიდა, თუმცა, ის იმედგაცრუებული დარჩა.
_ ძალიან დამწყდა გული. სიხარულით მოვედი. მეგონა, რომ ჩვენთვისაც იქნებოდა რაიმე გათვალისწინებული. თუმცა, შშმ პირებისთვის ვაკანსია აქ მოსულ არცერთ კომპანიას არ შეუთავაზებია, _ თქვა თამუნა ლურსმანაშვილმა.
ფორუმზე მოსული დამსაქმებლები, ძირითადად, მცირე და საშუალო ბიზნესის წარმომადგენლები იყვნენ, რომლებიც, როგორც ერთ-ერთმა დარგის სპეციალისტმა თქვა, ძლიერ კონკურენციაში არიან პრივილეგირებულ დიდი ბიზნესის წარმომადგენლებთან. გასათვალისწინებელია, რომ დღგ-ს გადასახადით არც დიდი სავაჭრო ქსელის წარმომადგენლები იბეგრებიან (ცალკე თემაა ქეშ-ბექი), რადგან მათი მეპატრონეებისაგან ჩადებული თანხა ინვესტიციად ითვლება… ასეთი უსამართლო დამოკიდებულებით კი მცირე და საშუალო ბიზნესი იჩაგრება, რაც, საბოლოოდ, დასაქმებულთა ხელფასებში აისახება.
ეს ცალკე სამსჯელო თემაა, მაგრამ მაინც მნიშვნელოვანია, რომ ფორუმზე მისულთაგან უკვე არაერთი ადამიანი დასაქმდა.
დასაქმების ფორუმის მეორე ნაწილი კონფერენციას დაეთმო, სადაც სექტორთა შორის თანამშრომლობის როლზე, დასაქმების შესაძლებლობის გაუმჯობესების მიმართულებით კარგი პრაქტიკები გაუზიარეს ერთმანეთს.
ავტორი
