რამდენიმე დღის წინ, იტალიელმა ჟურნალისტმა ჩირო ტროიზემ განაცხადა, რომ ვიქტორ ოსიმენს საუდის არაბეთის კლუბთან პირადი შეთანხმება მიღწეული აქვს და ძალიან მაღალი ხელფასის გამო დიდ ცდუნებას განიცდის.
„არაბულ კლუბს ფეხბურთელთან შეთანხმება აქვს სეზონში 40 მილიონი ევროს ხელფასის ოდენობაზე. ოსიმენი ძლიერ ცდუნებას განიცდის და რუდი გარსიას სიტყვებიც ადასტურებს, რომ „ნაპოლისთან“ არსებობს დისტანცია და პრობლემა. მალე ოსიმენის ტრანსფერში 200 მილიონიც არ იქნება საკმარისი, რადგან ნიგერიელის შეცვლას დრო სჭირდება“, – განაცხადა ჩირო ტროიზემ.
ამ თემას გუშინ გაგრძელება მოჰყვა. ნიგერიულმა გამოცემამ „Soccernet.ng“ დაწერა რომ ვიქტორ ოსიმენი „ალ ჰილალის“ შეთავაზებას დათანხმდა და მზადაა კარიერა არაბეთის ლიგაში გააგრძელოს. მართალია ოსიმენი „ალ ჰილალის“ წინადადებით მოხიბლულია, თუმცა ნეაპოლური კლუბის პრეზიდენტთან, აურელიო დე ლაურენტისთან შეთანხმება ჯერჯერობით ვერ ხერხდება. კინოპროდიუსერი ნიგერიელი ფორვარდის სანაცვლოდ 200 მილიონ ევროს ითხოვს.
გუშინ, ბრიტანელმა ჟურნალისტმა პოლ ბრაუნმა ხვიჩა კვარაცხელიას შესახებ ისაუბრა.
„კვარაცხელია „არსენალში“? თუ კლუბმა ეს ტრანსფერი განახორციელა, ძალიან სარისკო იქნება. ამას მიხაილო მუდრიკის მაგალითიც ადასტურებს. ქართველს პრემიერლიგაში თამაშის გამოცდილება არ აქვს. ყველამ ვნახეთ, რა მოხდა, როცა მუდრიკი „ჩელსიში“ გადავიდა, ამ ტრანსფერმა არ იმუშავა. მიხაილომ ინგლისში საკუთარი თავი ჯერ კიდევ ვერ იპოვა.
დარწმუნებული ვარ, „არსენალში“ ამ ყველაფერს კარგად გააანალიზებენ და კვარაცხელიას სანაცვლოდ დიდი თანხის გადახდას მოერიდებიან, თუმცა, თუ გარიგება შედგა და ხვიჩამ ისე ითამაშა, როგორც ამას „ნაპოლიში“ აკეთებს, ვფიქრობ, „არსენალის“ გულშემატკივრები ამით აღფრთოვანდებიან“, – განაცხადა პოლ ბრაუნმა.
ქართველი ფეხბურთელის შესახებ ილაპარაკა ვეტერანმა იტალიელმა ფეხბურთელმა ანტონიო კასანომაც.
„მე არასდროს მინახავს ჯორჯ ბესტი, მაგრამ დღეს კვარაცხელია მარცხენა ფლანგზე ყველაზე ძლიერი ფეხბურთელია. გაცილებით ძლიერი, ვიდრე გრილიში, კომანი, მას ყველგან შეუძლია თამაში. ერთადერთი ეჭვი, რაც მაქვს, ჩემპიონთა ლიგას უკავშირდება, სადაც მინდა ვნახო, რომ სტაბილურად ითამაშებს.
გასულ სეზონში მან რაღაც სიგიჟეები გააკეთა, თუმცა, ვნახოთ მომდევნო ორ-სამ წელიწადში როგორ ითამაშებს. კვარაცხელია ლეაუზე ბევრად ძლიერია, „მილანის“ ფეხბურთელზე მეტი რაღაცის გაკეთება იცის. მინდა, რომ კვარაცხელიამ ისევ „ნაპოლიში“ ითამაშოს, მაგრამ მეშინია, რომ მოვლენ და ვერტმფრენით წაიყვანენ, იქ შეუძლია თამაში, სადაც მოესურვება. ფენომენალურია“, – განაცხადა ანტონიო კასანომ.
„ნაპოლის“ მთავარმა მწვრთნელმა რუდი გარსიამ კლუბის მზადების შესახებ ისაუბრა.
„ამხანაგური მატჩები მნიშვნელოვანია ექსპერიმენტების ჩასატარებლად, ამ დროს უნდა გაიგო ყველაფერი, გამოცადო სხვადასხვა რაღაცები. მაგალითად, დღეს ზოგიერთმა ფეხბურთელმა განსხვავებულ პოზიციაზე ითამაშა, ოსტიგორი ნახევარდაცვაში კარგი გამოცდა იყო. კარგი მატჩიც გამოვიდა ისეთი გუნდის წინააღმდეგ, როგორიც „აუგსბურგია“, რომელიც ამ თამაშს ოფიციალურივით მიუდგა. ბედნიერი ვარ, რადგან ამ შეხვედრამ უფრო მკაფიო ნიშნები მომცა იმის შესახებ, თუ რა შემიძლია გავაკეთო ამ შემადგენლობასთან.
შარშანდელისგან განსხვავებით, როცა მოსამზადებელი ეტაპი გათვლილი იყო 4 თვეზე, რადგან წინ მსოფლიოს ჩემპიონატი იყო, ახლა ჩვენ უნდა მოვემზადოთ უწყვეტი სეზონისთვის, ამიტომ ვცდილობთ ყველას სწორად მართვას. გუნდში ორი რეალური ტრავმირებულია, მარიო რუი და ანგისა, სხვების პრობლემები მსუბუქია. რუი სამშაბათს ვარჯიშს დაიწყებს, ანგისა კი ალბათ პირველი ტურისთვის მზად იქნება. დანარჩენები გვყავს პრევენციის მიზნით დასვენებული ფეხბურთელები. ჟიელინსკი არაბეთში? თქვენ ჭკვიანი ბრძანდებით და მეტი სათქმელი არაფერი მაქვს. იმედი მაქვს, რომ „აპოლონთან“ გვეყოლება დაახლოებით ისეთი შემადგენლობა, რომლითაც სეზონს დავიწყებთ.
ოსიმენი არაბეთში? არსებობენ ფეხბურთელები, რომელთაც კარიერის ბოლო აქვთ და შეუძლიათ ასეთი შეთავაზება მიიღონ, მაგრამ თუ სრულყოფილი მოთამაშე ხარ, წინ გაქვს საუკეთესო წლები, ასეთ შეთავაზებებს არც კი უყურებ. თუმცა, მე ვიქტორი არ ვარ, ეს მას უნდა ჰკითხოთ. მთავარია, ყურადღება სპორტულ მხარეზე გავამახვილოთ და არა სატრანსფერო ბაზრის ჭორებზე.
ნატანი ბრაზილიელი მცველია, რომელიც „ფლამენგოში“ გაიზარდა და შემდეგ „რედ ბულ ბრაგანტინომ“ აიყვანა. კარგად ვიცი, როგორ თამაშობენ „რედ ბულის“ მფლობელობაში მყოფი გუნდები, ისინი პრესინგს თამაშობენ და ძალისმიერ ფეხბურთს. ჩვენთვის შესაფერისი ფეხბურთელია, მაგრამ დრო უნდა მივცეთ, რომ ჩვენს თამაშს მოერგოს. ამ საღამოს სპეციალური ვახშამი გვაქვს და ნეაპოლიტანურ პიცას შევჭამთ“, – თქვა რუდი გარსიამ.[
simple-author-box]
