ხელისუფლების მიერ ამ დღეებში წარმოდგენილმა ანტიკრიზისულმა გეგმამ, რომელიც ფერმერთა დახმარებას ისახავს მიზნად, საკმაო ბუნდოვანობა წარმოშვა. ფაქტია, რომ ეს გეგმა ერთგვარად დაგვიანებულიცაა, რამეთუ ძირითადი სასოფლო სამუშაოები უკვე ჩავლილია, მაგრამ ვინაიდან ლანჩხუთის მუნიციპალიტეტის ტერიტორიაზე არსებული მიწების უმეტესი ნაწილი, ჯერაც დაუმუშავებელია, გლეხისთვის თუ ფერმერისთვის ნაგვიანები დახმარებაც კი დიდი შეღავათი იქნება.
ანტიკრიზისული გეგმის მიხედვით, პროგრამაში მონაწილეობის მიღება შეუძლია საჯარო რეესტრის ეროვნულ სააგენტოში რეგისტრირებული სასოფლო-სამეურნეო დანიშნულების 0.25 და მეტი ჰექტარი მიწის ნაკვეთის მფლობელ ყველა ფიზიკურ და იურიდიული პირს.
მართალია, გეგმის პრეზენტაცია კი ვიხილეთ, მაგრამ რეალურად, ვის რა დახმარება ერგება, ამის ზუსტი მონაცემები ჯერ კიდევ უცნობია. როგორც ირკვევა, ამ ეტაპზე ბენეფიციართა ზუსტი რიცხვის დადგენის პროცესი მიმდინარეობს და სავარაუდოდ, 20 მაისისთვის გახდება ცნობილი თუ რამდენი ლანჩხუთელი ფერმერი მოხვდება მონაცემთა ბაზაში.
“დღესდღეობით, არაფერია ცნობილი, მიმდინარეობს მონაცემთა დამუშავება, რომელსაც საჯარო რეესტრი აწარმოებს და უახლოეს დღეებში გვეცოდინება დახმარების მიმღებ ბენეფიციართა ზუსტი რაოდენობა. მანამდე კონკრეტულ ინფორმაციას ვერავინ მოგაწვდით”, _ გვითხრეს ადგილობრივ სახელისუფლო დონეზე.
ანტიკრიზისულ გეგმასთან დაკავშირებით მეტი ინფორმაციის მისაღებად პარლამენტში ლანჩხუთისა და ჩოხატაურის მაჟორიტარ დეპუტატს, ნინო წილოსანს დავუკავშირდით, რომელმაც, თავის მხრივ, საკუთარ სადეპუტატო ბიუროებში გადაგვამისამართა, სადაც, ასევე, კონკრეტული არაფერი იციან აღნიშნული საკითხის შესახებ.
“სამწუხაროდ, ჯერ სიღრმისეულად არ ვარ ჩახედული ამ საკითხში, გავეცნობი დეტალურად ამ ორ დღეში და თავად დაგიკავშირდებით”, _ გვიპასუხა ლანჩხუთის ბიუროს წარმომადგენელმა ნია კობახიძემ.
რაც შეეხება ფერმერთა ნაწილს, რომლებიც იჯარით სარგებლობენ, ისინი სრულ გაუგებრობაში არიან და ვერ გაუგიათ ეკუთვნით თუ არა შეღავათები და თუ არ ეკუთვნით, რატომ, რა მიზეზით.
“მთავრობის მიერ წარმოდგენილი გეგმის მიხედვით, შეღავათები არ გვეკუთვნის იმ ადამიანებს, რომლებსაც ათეული ჰექტრობით მიწა იჯარით გვაქვს აღებული, კანონის შესაბამისად ყველა გადასახადს ვიხდით, მაგრამ რატომღაც, დიდი ალბათობით, იგნორირებულნი ვრჩებით. რა, ჩვენ არ გვეკუთვნის დახმარება? რა, ჩვენ არ დავზარალდით? ვინმე გაგვაგებინებს რა ხდება?” _ გვითხრა ფერმერმა, რომელმაც ვინაობის საჯაროდ გამხელა არ ისურვა.
საკმაოდ ბუნდოვანია, ასევე, უბრალო გლეხთა მდგომარეობაც, რომელთა ნაწილმა საკუთრებაში არსებული მიწის ნაკვეთები უკვე დახნეს, მაგრამ ტექნიკის დეფიციტის გამო, მიწის დამუშავების ხარისხი საკმაოდ დაბალია. სოფლებში შემორჩენილი დაბალი გამავლობის მოძველებული ტექნიკით მეტის გაკეთება შეუძლებელი იყო.
„გურია ნიუსთან“ საუბარში რამდენიმე ადგილობრივმა მექანიზატორმა წუხილი გამოთქვა, რომ მათ სურდათ იჯარით ესარგებლათ იმ ტექნიკით, რომლებიც სოფელ მერიის მომსახურების ცენტრში უნდა ყოფილიყო, თუმცა, მათი თქმით, ამის საშუალება არ მიეცათ.
როგორც მექანიზატორებმა გვითხრეს, ადგილზე მისულებს ტექნიკის ნაწილი დაშლილი დახვდათ, ხოლო რაც ვარგისი იყო გაყიდული.
“ადგილზე მისულებს ტექნიკის ნაწილი მწყობრიდან გამოსული დაგვხვდა, უმეტესი ნაწილი კი გასხვისებული. როგორც გვითხრეს, კახეთში გაუყიდიათ. არადა, რეალურად იმდენად ძველი ტექნიკით ვმუშაობთ, ამას წვალება ქვია და მეტი არაფერი“, – ამბობენ ლანჩხუთელი მექნიზატორები.
ტექნიკის ნაწილი რომ მართლაც გასხვისდა, „გურია ნიუსთან“ საუბარში ადასტურებს გურიის სერვისებისა და ლოჯისტიკის (ყოფილი შპს „მექანიზატორი“) ცენტრის ხელმძღვანელი ბესიკ გოგიტიზეც.
მისი თქმით, ცენტრში თავდაპირველად 47 ერთეული ტექნიკა ირიცხებოდა, ამ ეტაპზე კი მხოლოდ რვა ერთეულია, აქედან ორი მუხლუხებიანი ტრაქტორი.
„სულ რვა ტრაქტორი გვყავს, აქედან ოთხი ერთეული ლანჩხუთს ემსახურება, ჩოხატაურში კი საერთოდ არ გვაყვს. ფაქტია, რომ ტექნიკის ეს რაოდენობა საკმარისი არაა, რადგან სამუშაო მოკლე ვადებშია მოსასწრები. ამიტომ ვცდილობთ, მენეჯმენტი წარვმართოთ ისე, რომ ჯერ ხვნის პროცესი დავასრულოთ და შემდეგ თესვის ეტაპზე გადავიდეთ. ამ ეტაპზე მხოლოდ ერთი ტრაქტორია მწყობრიდან გამოსული და ისიც ოზურგეთის მუნიციპალიტეტის საკუთრებაა. რაც შეეხება გასხვისებულ ტექნიკას, ვადასტურებ, რომ თავიდან ჩვენს დაქვემდებარებაში 47 ტრაქტორი იყო, თუმცა, ეკონომიკის სამინისტრომ 39 ერთეული გაასხვისა“, _ გვითხრა ბესიკ გოგიტიძემ.
