საარჩევნო სიის დახვეწის მიზნით, 1 მარტიდან პირადობის მოწმობის უფასოდ გაცემის მორიგი აქცია დაიწყო, რომელიც 1 ნოემბრამდე გაგრძელდება.
აღნიშნულმა საკითხმა საზოგადოების დიდი ინტერესი გამოიწვია.
ვის შეუძლია პირადობის დამადასტურებელი მოწმობის უფასოდ აღება, შეძლებენ თუ არა აქციით სარგებლობას მოქალაქეები, რომელთაც პირადობის მოწმობა დაკარგული აქვთ? _ ამ საკითხზე „გურია ნიუსს“ სამოქალაქო რეესტრისა და მოსახლეობის რეგისტრაციის სამსახურის უფროსის მოვალეობის შემსრულებელი, მირანდა არაბიძეს ესაუბრა.
მისი თქმით, აქციით სარგებლობა სხვადასხვა სეგმენტს მოიცავს, აქციით სარგებლობა კი იმ მოქალაქეებს შეუძლიათ, რომელთაც პირადობის დამადასტურებელი არანაირი დოკუმენტი არ გააჩნიათ, ან რეგისტრაციის მისამართიდან მოხსნილები არიან.
„აქცია სხვადასხვა სეგმენტს მოიცავს, თუ პირი არის რეგისტრაციიდან მოხსნილი, ან აქვს ვადაგასული დოკუმენტი და მის სახელზე არ ფიქსირდება სხვა არცერთი მოქმედი პირადობის დამადასტურებელი დოკუმენტი, პირადობის მოწმობა ან პასპორტი, მაშინ მას შეუძლია ისარგებლოს აქციით;
აქციით სარგებლობა, ასევე, შეუძლიათ იმ მოქალაქეებს, ვის პირადობის მოწმობის დამადასტურებელ დოკუმენტსაც ვადა გასდის 1-ელ ნოემბრამდე.
აქციით ისარგებლებს, ასევე, რეგისტრაციიდან მოხსნილი პირიც, შესაძლებელია სხვადასხვა პირობით ხვდებოდეს ამ აქციაში, ამიტომ კონკრეტული შემთხვევა არის მნიშვნელოვანი. თუ მას გაუქმებული აქვს ყველანაირი დოკუმენტი, მას ეხება ეს აქცია, თუ მოქალაქემ ზუსტად არ იცის, აქვს თუ არა გაუქმებული დოკუმენტი და არის რეგისტრაციიდან მოხსნილი, ასეთ შემთხვევაში მას შეიძლება შეეხოს ეს აქცია, თუკი დარეგისტრირდება კონკრეტულ მისამართზე და მას სჭირდება ახალი დოკუმენტის მიღებაც.
აქცია რომ შეეხოს პირს, ყველა მისი მოქმედი დოკუმენტი უნდა იყოს გაუქმებული. მაგალითად: შესაძლოა დაკარგა პირადობის მოწმობა, მაგრამ აქვს პასპორტი, რომელსაც ვადა 1 ნოემბრამდე არ გასდის, ასეთ შემთხვევაში აქცია არ შეეხება პირს, მაგრამ თუ ყველა დოკუმენტი არის გაუქმებული ან ვადა ეწურება 1 ნოემბრამდე, მაშინ მას შეეხება აქია.
იმ შემთხვევაში თუ პირს არ აქვს პასპორტი და დაკარგული აქვს პირადობის დამადასტურებელი მოწმობა, ამ შემთხვევაში დამოკიდებულია, როდის გაუქმდა დოკუმენტი. თუ ამჟამად ეს დოკუმენტი არ არის ჩვენთან გაუქმებული და მოქალაქე განაცხადებს დაკარგვის შესახებ, ასეთ შემთხვევაში უფასოდ არ ეკუთვნის დოკუმენტი თუ სხვა პირობა არ არსებობს აქციით სარგებლობის“, _ ამბობს მირანდა არაბიძე.
როგორც დღეს აქციის პირობებთან დაკავშირებით, იუსტიციის მინისტრმა, თეა წულუკიანმა იუსტიციის სამინისტროში ბრიფინგზე განაცხადა:
პირადობის მოწმობის საფასურის გადახდისგან გათავისუფლდებიან:
„საქართველოს ის სრულწლოვანი მოქალაქეები, რომელთა სახელზე ამ დრომდე არ იყო გაცემული საქართველოს მოქალაქის პირადობის დამადასტურებელი არცერთი დოკუმენტი; ასევე, არასრულწლოვანი მოქალაქეები, რომელთაც აქციის დასრულებამდე, 1 ნოემბრამდე, უსრულდებათ 18 წელი;
მოქალაქეები, რომელთა პირადობის დამადასტურებელი დოკუმენტების ფოტოსურათები გამოუსადეგარია (უხარისხოა), ან არ ინახება სააგენტოს მონაცემთა ელექტრონულ ბაზაში;
რეგისტრაციიდან მოხსნილი პირები, თუ ისინი დარეგისტრირდებიან კორექტულ მისამართზე;
მისამართის გარეშე რეგისტრირებული მოქალაქეები, თუ ისინი გაივლიან რეგისტრაციას კორექტულ მისამართზე;
მოქალაქეები, რომელთაც არ აქვთ იურიდიული ძალის მქონე არც ერთი დოკუმენტი
ის პირები, რომლებიც რეგისტრირებული არიან საქართველოს ოკუპირებულ ტერიტორიაზე და არ ფლობენ იძულებით გადაადგილებული პირის სტატუსს; ამასთან, გაუქმებული აქვთ პირადობის მოწმობა. აღნიშნული პირები აქციით ისარგებლებენ იმ შემთხვევაში, თუ ისინი დარეგისტრირდებიან საქართველოს არაოკუპირებულ ტერიტორიაზე არსებულ კონკრეტულ მისამართზე“,_განაცხადა წულუკიანმა.
ბაზებში მოქალაქეთა მონაცემების სიზუსტე კვლავაც აქტუალურია, რადგან 2018 წელს საქართველოში კვლავ არჩევნებია და საარჩევნო სია მუდმივად უნდა იხვეწებოდეს.
2014 წლიდან საქართველოში ფოტოსურათიანი საარჩევნო სია მოქმედებს და ის ბიომეტრიულ დოკუმენტებს ეფუძნება. შესაბამისად, ბიომეტრიული დოკუმენტის ქონა უზრუნველყოფს პრინციპს − „ერთი ამომრჩეველი − ერთი ხმა“ და გამორიცხავს არჩევნების დღეს საარჩევნო უბანზე ე. წ. „კარუსელს“.
იუსტიციის მინისტრის ინიციატივით გახორციელებული ღონისძიებების შედეგად უკანასკნელი 4 წლის განმავლობაში პოტენციურ ამომრჩეველთა ბაზები მნიშვნელოვნად გაუმჯობესდა; 2 400 000-ზე მეტ მოქალაქეზე გაიცა ელექტრონული პირადობის მოწმობა; აქედან 1 400 000-მდე პირადობის მოწმობა, საქართველოს იუსტიციის მინისტრის გადაწყვეტილებით − უფასოდ ან შეღავათიან ფასად. მოქალაქეები მთლიანად ან ნაწილობრივ გათავისუფლდნენ როგორც დოკუმენტის, ისე ფოტოსურათის გადაღების საფასურის გადახდისაგან.
დღეის მდგომარეობით, საქართველოს საარჩევნო უფლების მქონე 2 500 000-ზე მეტი მოქალაქე პირადობის ელექტრონულ მოწმობას ფლობს, ხოლო დამატებით 250 000-მდე მოქალაქე − საქართველოს მოქალაქის ბიომეტრიულ პასპორტს, რაც სერვისების განვითარების სააგენტოს ბაზებში 2 700 000- მეტი ზუსტი და უტყუარი მონაცემის არსებობას ნიშნავს. თუ მივიღებთ მხედველობაში, რომ დღეის მდგომარეობით ბაზაში 3 506 573 პოტენციური ამომრჩეველია, შეიძლება ითქვას, რომ საარჩევნო მონაცემების უდიდესი ნაწილი დაზუსტებული და უტყუარია, რაც თავის მხრივ ხელს უწყობს არჩევნების სანდო პირობებში ჩატარებას.
რაც შეეხება მიმდინარე აქციით სარგებლობის მსურველ მოქალაქეებს, მათ უნდა მიმართონ იუსტიციის სახლებს, სახელმწიფო სერვისების განვითარების სააგენტოს ტერიტორიულ სამსახურებს ან საზოგადოებრივ ცენტრებს. აქციის ფარგლებში, დოკუმენტის გაცემისას მოქალაქეები გათავისუფლდებიან როგორც პირადობის მოწმობის, ისე ფოტოსურათის გადაღების საფასურისგან. აქციით სარგებლობა პირს მხოლოდ ერთხელ შეუძლია.
მოქალაქეებს, რომლებიც დაინტერესებულები არიან გადაამოწმონ პირადობის მოწმობა, რომელიც მათ აქვთ აქტიურია თუ არა, მათ ამის გაკეთება სახელმწიფო სერვისების განვითარების სააგენტოს ვებგვერდზე შეუძლიათ, ან შეუძლიათ სააგენტოს ცხელ ხაზზე: 0322 401010-ზე დარეკვა.
რაც შეეხებათ იმ მოქალაქეებს, ვისაც პირადობის დამადასტურებელ მოწმობას ვადა აქვს გასული და არ აქვთ მოქმედი პასპორტი, ან დაკარგული აქვთ პირადობის დამადასტურებელი მოწმობა, რომელსაც ვადა არ გასვლია, სხელმწიფო სერვისების განვითარების სააგენტოს ცნობით, პირადობის მოწმობის გაცემის ვადა და ღირებულება ასეთია: მე–10 სამუშაო დღეს 30 ლარი, მე-5 სამუშაო დღეს 40 ლარი, მე-3 სამუშაო დღეს 50 ლარი, მე-2 სამუშაო დღეს 60 ლარი, იმავე დღეს 65 ლარი.
