კიევის მერი, ახლო წარსულში ცნობილი მოკრივე ვიტალი კლიჩკო ამერიკულ „CNN“-ს ესაუბრა და განაცხადა, რომ კიეველები შეიძლება დაიღუპონ, მაგრამ უკრაინის დედაქალაქს რუს მოძალადეებს არ დაუთმობენ.
„რუსებს ჰქონდათ გეგმა, რომ კიევი აეღოთ. ამის გაკეთება 3 კვირის წინ სურდათ. მაგრამ ჩვენმა ბიჭებმა ამაში ხელი შეუშალეს. როგორც ქალაქის მერი, ყველას გასაგონად ვამბობ – რუსები ქალაქში ვერ შემოვლენ, მოვკვდებით, მაგრამ კიევს მტერს არ ჩავაბარებთ.“
უკრაინის ნაკრების ყოფილმა მცველმა, არტემ ფედეცკიმ, ნაკრების ყოფილი კაპიტნის – ანატოლი ტიმოშჩუკის ქმედება შეაფასა, რომელსაც მიმდინარე ომის და სამხედრო ინტერვენციის მიუხედავად, სანკტ პეტერბურგის „ზენიტში“ დაკავებული თანამდებობა არ დაუტოვებია.
„რუსეთთან ომი მორჩება და უკრაინა აუცილებლად გაიმარჯვებს. ამ სირცხვილით ცხოვრებას როდემდე აპირებ ანატოლი? მას ალბათ არც გული აქვს, არც ნამუსი. ცარიელი კაცია, რომელმაც ფული საკუთარ ხალხზე და სამშობლოზე მაღლა დააყენა. გული მიკვდება ამ ყველაფერს რომ ვამბობ. მას ბავშვობიდან ვიცნობ და პატარაობიდანვე ვმეგობრობდით. არ მესმის ამას რატომ აკეთებს, რატომ ყიდის თავის თავს პირველ რიგში. წარმოდგენაც არ მინდა იმის, თუ რას ფიქრობს მამამისი რომელიც ლუცკიდანაა.“
ლუგანსკის „ზორიაში“ ქართველი ფეხბურთელი ჯაბა ლიპარტიას ყოფილმა თანაგუნდელმა მაქსიმ ბელიმ, რუსეთის აგრესიაზე საუბრისას, ლუგანსკში 2014 წლის მოვლენები გაიხსენა და ის საუბარი, როდესაც ლიპარტია მოსალოდნელ ომზე აფრთხილებდა.
„მახსოვს 2014 წლის მოვლენები, როგორ დაიწყო ყველაფერი. მაშინ ლუგანსკში ვცხოვრობდი და ზორიაში ვთამაშობდი. თამაშის შემდეგ გვიან ღამით შინ ვბრუნდებოდით, როდესაც ქუჩაში ხალხი დავინახე, რომლებსაც ხელში ჯოხები ეჭირათ. დაიწყო უწესრიგობები, ქუჩებში ალაგებდნენ საბურავებს. თავიდან ეს ყველაფერი სისულელე მეგონა, მაგრამ ჩემმა ქართველმა თანაგუნდელმა ჯაბა ლიპარტიამ მითხრა, რომ 2008 წელს საქართველოშიც ასე დაიწყო ყველაფერი. ის ჯერ კიდევ მაშინ ამბობდა, რომ დიდი ალბათობით, ოკუპაცია მოხდებოდა. ამას ვერ ვიჯერებდი, მაგრამ როდესაც სეპარატისტებმა ჩემს ფანჯრებთან სროლა დაიწყეს, მივხვდი, რომ რაღაც ისე მართლა არ იყო. ერთი თვის შემდეგ ზაპოროჟიეში გადავედით, რადგან ლუგანსკში ცხოვრება უკვე შეუძლებელი გახდა,“ – გაიხსენა მაქსიმ ბელიმ.
რამდენიმე დღის წინ უკრაინელმა ყოფილმა ჩოგბურთელმა სტახოვსკიმ როჯერ ფედერერი და რაფაელ ნადალი გააკრიტიკა, რომლებსაც უკრაინაში მიმდინარე მოვლენებზე საკუთარი შეხედულება დაფიქსირებული არ ჰქონდათ.
გუშინ ცნობილი გახდა რომ როჯერ ფედერერმა დუმილი დაარღვია. შვეიცარიელი უკრაინელ ბავშვებს დაეხმარება და შემოწირულობას გაუწევს საქველმოქმედო ორგანიზაცია „War Child Holland“-ს, რომელიც ძალადობისა და შეიარაღებული კონფლიქტის შედეგად დაზარალებული ბავშვების კეთილდღეობის გასაუმჯობესებლად მუშაობს.
„მე და ჩემი ოჯახი შეძრწუნებული ვართ უკრაინაში მიმდინარე ომის კადრების ნახვით და გულგატეხილი ვარ უდანაშაულო ადამიანების გამო, რომლებიც ასე საშინლად დაზარალდნენ. ჩვენ მშვიდობის მომხრე ვართ. დახმარებას გავუწევთ უკრაინელ ბავშვებს, რომლებსაც ზრუნვა სჭირდებათ. დაახლოებით 6 მილიონი უკრაინელი ბავშვი ამჟამად არ სწავლობს და ძალიან კრიტიკული დროა განათლებაზე ხელმისაწვდომის უზრუნველსაყოფად. ამიტომ, მსურს, მხარი დავუჭიროთ მათ ამ უკიდურესად ტრავმული გამოცდილების გადალახვაში. როჯერ ფედერერის ფონდის მეშვეობით „War Child Holland“-ს 500 000 ამერიკულ დოლარს შემოწირულობის სახით გადავცემთ, რომ უკრაინელი ბავშვებისთვის სწავლის გაგრძელება შესაძლებელი იყოს,“ – განაცხადა როჯერ ფედერერმა.
ახლო წარსულში ცნობილი გერმანელი ველომრბოლელი იან ულრიხი კი უკრაინელი ბავშვების დასახმარებლად თავის განსაკუთრებულ ველოსიპედს ყიდის. აქციისთვის „Ein Herz für Kinder“ 48 წლის ულრიხმა აუქციონზე 1998 წლის „ტურ დე ფრანსის“ ველოსიპედი გამოიტანა.
„უკრაინაში მიმდინარე საშინელი ომი, უკრაინელი ხალხის, ოჯახების და ბავშვების დაუჯერებელი მწუხარება ახლა მთელ მსოფლიოს აღელვებს. ყველა ნორმალური ადამიანი შოკირებულია და ჩემი გულიც სისხლისგან იცლება. გადავწყვიტე, უკრაინელ ბავშვებს დავეხმარო და ამისათვის ჩემს ერთ-ერთ ისტორიულ ველოსიპედს ვყიდი, მიღებულ თანხას კი საქველმოქმედო ფონდში გადავრიცხავ. ვოცნებობ, რომ უკრაინაში მალე დაბრუნდეს მშვიდობა და ბედნიერება,“ – განაცხადა იან ულრიხმა.
ულრიხის ველოსიპედის შესაძენ აუქციონში მონაწილეობა ყველას შეუძლია. აუქციონი 6 აპრილს დასრულდება. ველოსიპედის სავარაუდო ღირებულება 40 000 ევროა.
