,,ქართულმა ოცნებამ“ პრეზიდენტის ინსტიტუტი, შესაძლოა, ოპოზიციის კანდიდატს დაუთმოს ან დამოუკიდებელი დეპუტატის სალომე ზურაბიშვილის კანდიდატურას დაუჭიროს მხარი.
,,ქვეყნის დემოკრატიისთვის და სწრაფი განვითარებისთვის კარგი იქნება, რომ დამოუკიდებელ კანდიდატს თუ ღირსეული კანდიდატურა იქნება, დავუჭიროთ მხარი. თუ არავინ იქნება, ოპოზიციამ გაინაწილოს ეს ინსტიტუტი“,_აღნიშნული განცხადება პარტიის თავმჯდომარე ბიძინა ივანიშვილმა გააკეთა.
,,გურია ნიუსმა“ პოლიტიკის ექსპერტს, გია ხუხაშვილს ჰკითხა, რატომ მიდის ,,ქართული ოცნება“ ასეთ დათმობაზე მაშინ, როცა მთელი ხუთი წლის განმავლობაში მმართველი გუნდი გიორგი მარგველაშვილს განსხვავებული პოზიციების გამო აკრიტიკებდა?
_ კარგია, რომ ივანიშვილი საფრთხეს აცნობიერებს, ზედმეტი ძალაუფლება განსაკუთრებულად რყვნის და კატასტროფის წინაშე აყენებს ნებისმიერ ხელისუფლებას. მე ვფიქრობ, რომ სწორედ ამ გაგებით არის განპირობებული ის, რომ თუნდაც ერთი ინსტიტუტი გაყვანილ იქნას სახელმწიფოს კონტროლიდან. ივანიშვილი ამას ხვდება იმ ახალგაზრდა ტირანიებისგან განსხვავებით, რომლებიც მზად არიან ყველაფერი შეთქვლიფონ“, _განაცხადა ხუხაშვილმა.
ხუხაშვილი მიიჩნევს, რომ საპრეზიდენტო არჩევნებში, დიდი ალბათობით, ,,ქართული ოცნება“ სალომე ზურაბიშვილს დაუჭერს მხარს, თუმცა, ექსპერტის შეფასებით, ქვეყნისთვის სოლიდური საპრეზიდენტო კანდიდატი, რომელსაც, სასურველია, რომ ,,ქართულმა ოცნებამ“ მხარი დაუჭიროს ,,შენების მოძრაობის“ ლიდერი, დავით უსუფაშვილია.
,,სალომე ზურაბიშვილს ყველაზე მაღალი შანსი აქვს, მაგრამ ზურაბიშვილი არის ძალიან პოლიტიზირებული და მიუხედავად იმისა, რომ ის ფორმალურად არ არის ,,ქართული ოცნების“ წევრი, პარტიის გამორჩეული პროპაგანდისტია, ამიტომ მისი, როგორც დამოუკიდებელ კანდიდატად მოაზრება, რა თქმა უნდა, ძალიან კარგი გამოსავალია. ზურაბიშვილი საკუთარი ძალებით ნულოვანი შედეგის მიმღებია, მაგრამ შედეგს პარტიული რესურსი განსაზღვრავს.
თუ ,,ქართულ ოცნებას“ სურს პრეზიდენტის ინსტიტუტი დათმოს, მოხარული ვიქნებოდი, თუკი ,,ქართული ოცენება“ უსუფაშვილს დაუჭერდა მხარს. ეს იქნებოდა სახელმწიფოებრივად სწორი ნაბიჯი, იმიტომ, რომ უსუფაშვილის გამოყენება დღევანდელ სახელმწიფოში, სადაც სახელმწიფოებრივი აზროვნების დეფიციტია, იქნებოდა ოპტიმალური გადაწყვეტილება“, _ განაცხადა ხუხაშვილმა.
_ ბატონო გია, რამდენად სავარაუდოა, რომ ,,ქართულმა ოცნება“ უსუფაშვილის კანდიდატურას დაუჭიროს მხარი?
_ სამწუხაროდ, ნაკლებად სავარაუდოა, თუმცა, სასურველი.
ამ დრომდე უცნობია, რომელ ვერსიაზე შეჯერდება მმართველი გუნდი. ,,ქართულ ოცნებაში“ საპრეზიდენტო კანდიდატთან დაკავშირებით, ჯერჯერობით, ვერ თანხმდებიან.
