“გახარიამ ტყუილები ილაპარაკა და „ევროპული საქართველო“ არ შეარჩენს არც ერთ ტყუილს, რადგან ეს არის ადამიანი, რომელსაც არა უბრალოდ წარმოდგენა არ აქვს ქვეყნის მართვაზე, არამედ არის ქრონიკული მატყუარა. ყველა ის ტყუილი, რაც ამ გაფუყულმა მატყუარამ გუშინ, გუშინწინ და ნებისმიერ დღეს დაახეთქა, იქნება ყოველდღიურად შეფასებული ჩვენს მიერ”, _ განაცხადა “ევროპული საქართველოს” წევრმა ზურაბ ჭიაბერაშვილმა.
მისივე თქმით, “ბიძინა ივანიშვილის მთავრობა არის პუტინის მსახური რეჟიმი“, რისი დასტურიც ისაა, რომ გახარიას ტრიბუნიდან უკრაინა არ უხსენებია:
„დღეს, უკრაინის არ ხსენება ამ ტრიბუნიდან, არის ცალსახად რევერანსი პუტინის მიმართ, რადგან პუტინმა შეიძლება აიტანოს ეს რიტორიკა, გახარიას მიმართ,რადგან იცის, რომ ბიძინა ივანიშვილის პირობებში საქართველოს სვლა ევროპული და ევროატლანტიკური ინტეგრაციისკენ პრაქტიკულად გაჩერებულია. პუტინი აიტანს თუნდაც ნატო-ს და ევროკავშირის ხსენებას, მაგრამ უკრაინის არ ხსენება, იმ პირობებში, როდესაც „ქართული ოცნების“ დროს უმდაბლეს დონეზეა კონტაქტი კიევსა და თბილისს შორის, ეს არის ცალსახა განაცხადი და რევერანსი პუტინის მიმართ. ეს კიდევ ერთხელ ადასტურებს, რომ ბიძინა ივანიშვილის მთავრობა არის პუტინის მსახური რეჟიმი“, _ განაცხადა ზურაბ ჭიაბერაშვილმა და აღნიშნა, რომ “გიორგი გახარიამ ტყუილები ილაპარაკა ეკონომიკის მიმართულებითაც”
„ჩვენ თუ ავიღებთ მეორე კვარტლის მონაცემებს, ის ადასტურებს სრულიად საპირისპიროს, რაც ბატონმა გახარიამ ილაპარაკა. კერძოდ, ქვეყანაში თვითდასაქმებულთა რაოდენობა გაიზარდა, დაქირავებით დასაქმებულთა რაოდენობა შემცირდა. ქვეყანაში არის უპერსპექტივობის განცდა და ადამიანებმა სამუშაოს შოვნის იმედი დაკარგეს. ჩვენ ამ ტრიბუნიდან კიდევ ბევრ ტყუილს მოვისმენთ, მაგრამ „ევროპული საქართველო“ არ შეარჩენს არც ერთ ტყუილს, რადგან ეს არის ადამიანი, რომელსაც არა უბრალოდ წარმოდგენა არ აქვს ქვეყნის მართვაზე, არამედ არის ქრონიკული მატყუარა“, _ განაცხადა ჭიაბერაშვილმა.
