ერთი თვიდან 16 წლამდე ასაკის ბავშვებში მწვავე ჰეპატიტის სულ მცირე 169 შემთხვევა გამოვლინდა ეპიდემიის დროს. ამის შესახებ განაცხადა ჯანდაცვის მსოფლიო ორგანიზაციამ (who).
ორგანიზაციის ინფორმაციით, მწვავე ჰეპატიტის შემთხვევები 11 ქვეყანაშია დაფიქსირებული. მათ შორის შემთხვევების უმრავლესობა – 114 – დაფიქსირდა გაერთიანებულ სამეფოში. 13 შემთხვევა ესპანეთში, 12 ისრაელში, 9 შეერთებულ შტატებში, ხოლო შემთხვევების მცირე რაოდენობა დაფიქსირდა დანიაში, ირლანდიაში, ნიდერლანდებში, იტალიაში, ნორვეგიაში, საფრანგეთში, რუმინეთსა და ბელგიაში.
ჯანდაცვის მსოფლიო ორგანიზაციის ინფორმაციით, მწვავე ჰეპატიტის შედეგად სულ მცირე, ერთი ბავშვი გარდაიცვალა და 17 ბავშვს ღვიძლის გადანერგვა დასჭირდა.
“კლინიკური სინდრომი “იდენტიფიცირებულ შემთხვევებს შორის არის მწვავე ჰეპატიტი (ღვიძლის ანთება) ღვიძლის ფერმენტების საგრძნობლად მომატებული აქტივობით”, – ნათქვამია განცხადებაში. ბევრ შემთხვევაში აღინიშნა კუჭ-ნაწლავის სიმპტომები, როგორიცაა მუცლის ტკივილი, დიარეა.
დაფიქსირებული შემთხვევების უმეტესობას არ ჰქონდა სიცხე, თქვა ჯანმო-მ, და გავრცელებული ვირუსები, რომლებიც იწვევენ მწვავე ვირუსულ ჰეპატიტს – როგორიცაა ჰეპატიტის ვირუსები A, B, C, D და E – არცერთ ამ შემთხვევაში არ გამოვლენილა.
