ამ ამბის გარკვევა ოზურგეთის მაჟორიტარ დეპუტატთან, ზვიად კვაჭანტირაძესთან ვცადეთ. რამაზ ნიკოლაიშვილი სწორედ მისი კონკურენტი იყო არჩევნების დროს.
_ მე და რამაზ ნიკოლაიშვილი პარლამენტში ერთმანეთში ვესალმებით ადამიანურად. ჩემი გადასახედიდან, მე რასაც ვამჩნევ, შემიძლია ერთი რამ გითხრათ, რომ ვიყავით ერთი დელეგაციის შემადგენლობაში ბრიუსელში. რამაზი არის თავდაცვის კომიტეტის წევრი უმცირესობიდან. ის ამ კვოტით მოხვდა დელეგაციაში. იქ, განხილვების და პოლემიკის დროს ნამდვილად ზოგად სახელმწიფოებრივ პოზიციას იცავდა. მაგალითად, მისი კოლეგის, თინა ბოკუჩავასგან განსხვავებით, რომელიც იწყებდა საუბარს დადებითზე და მერე დაამთავრებდა ახალი ხელისუფლების კრიტიკით, ნიკოლაიშვილის მხრიდან ნამდვილად არ მომისმენია არცერთი კრიტიკული სიტყვა “ქართული ოცნების”, მისამართით.
_ თქვენ კოაბიტაციაში ხართ მასთან?
_ პირადად მე , გარდა ნორმალური ურთიერთობისა, მის მიმართ არანაირი ზედმეტ კოაბიტაციაში არ ვარ. (?) აბა, სხვანაირად რა უნდა ვქნათ, (?) ადამიანური ურთიერთობები საჭიროა. დელეგაციის დროს ერთ სუფრაზეც კი ვისხედით!. . . ნახევარი ოზურგეთი რამაზ ნიკოლაიშვილს თვალებში უყურებდა და მე გამარჯობაც აღარ ვუთხრა? თუმცა, იქ ხაზგასმით აღნიშნავდა, როგორ წამაქციე, როგორ მომიგე, ბატონო ზვიადო! ერთ მომენტსაც გეტყვით, როცა სტამბულიდან მივფრინავდით ბრიუსელში, მეუბნება, რომ მე გასასვლელში მინდოდა ბილეთიო. მე ვუთხარი, რომ გასასვლელის ბილეთი გაქვს, ეს დიდი თვითმფრინავია-მეთქი. არაო, მითხრა, არ არსებობსო. არ დამიჯერა და სანაძლეო დავდეთ. რომ გადმოვედით ავტობუსიდან და ახედა თვითმფრინავს, მეუბნება, _ ხელს ვწევ, ძმაო, შენ რა მაგარი ხარ, ოზურგეთში რომ მომიგე მე, იმის მერე ხმა არ უნდა ამომეღოო. რატომ დაგენიძლავეო და ბევრი ვიცინეთ! აი, ასეთი ურთიერთობები არსებობს, რომელიც მე ყველაზე პირწავარდნილ “ნაციონალებთანაც” კი მაქვს. ამას რაც გინდათ, ის დაარქვით!
_ბატონო ზვიად, დავით ნარმანიამ “გურია ნიუსთან” განაცხადა, რომ რამაზ ნიკოლაიშვილის დროს სახელმწიფომ 10 მილიონი ლარით იზარალა. თუმცა, ამ განცხადების შემდეგ, გავიდა თვეები და ის პროკურატურაში არც არავის დაუბარებია. არაა საეჭვო ეს ამბავი?
_ ასე ფიქრობთ, რომ რამაზი პროკურატურაში არავის დაუბარებია? შეიძლება, ამის აფიშირება არ უნდოდათ. ვერ გეტყვით, რა! თუმცა, ის არის ინფორმაციის უდიდესი წყარო.
_ნიკოლაიშვილი არც 19 აპრილის აქციაზე ყოფილა. თუ დაიბარეს, რა იყო დასამალი? თუ რომელიმე უბრალო საჯარო პირის დაკითხვაზე დაბარება ხდება ცნობილი, ამ შემთხვევაში რა იყო დასამალი?
_ძალიან მიძნელდება დაჯერება.
_თუმცა ფაქტია, ბატონო ზვიად და ვერც თქვენ უარყოფთ, რომ ვერ ამჩნევდეთ კოაბიტაციას.
_შეიძლება, ეს ასე ჩანდეს. გულწრფელად გეტყვით, რამაზ ნიკოლაიშვილი დღემდე არ ყოფილა ჩემი ინტერესის სფერო. არჩევნების პერიოდშიც კი, ის როგორც პიროვნება, ნამდვილად არ ყოფილა ჩემი ინტერესის სფერო. არც დღეს არის. აწი დავუკვირდები მე ამ პროცესებს, დავინტერესდები რა ხდება ამასთან დაკავშირებით. მე ასე სიღრმისეულად არ შემიხედია ამ პრობლემისთვის მიუხედავად იმისა, რომ იყო სადღაც შეკითხვები და უცებ გაქრა კითხვები. ახლა ნამდვილად არ მაქვს პასუხი ამ შეკითხვებზე. ისე, ძალიან ბევრი კითხვები არსებობს, თუნდაც ქუთაისის პარლამენტის შენობასთან დაკავშირებით, რომელიც აშენებულია ბიუჯეტის გარეშე და ვის როგორ უხდიდნენ ფულს, ეს კიდევ აბსოლუტური უღრანი ტყეა. ყოველივე ეს გაუგებარი და გაურკვეველია. ნებისმიერი მშენებლობები, თუნდაც ოზურგეთში, ეს ყველაფერი კითხვებია, რომელიც მისი მისამართით არსებობს, _ გვითხრა კვაჭანტირაძემ.
