10 მაისს სოფელ ბახვიდან დაგვიკავშირდნენ და გვითხრეს, რომ სოფელში ოზურგეთის მუნიციპალიტეტის გამგებლის მოვალეობის შემსრულებელი, კოტე შარაშენიძე აპირებდა ჩასვლას და მოსახლეობა თავისი პრობლემების შესახებ ისაუბრებდა. გვითხრეს ისიც, რომ ახალ რწმუნებულს კაბინეტში არ უშვებდნენ.
_ დანიშნული ვარ და ველოდები, რომ ოთახში შევიდე. ბრძანება ჩემი დანიშვნის შესახებ უკვე დაწერილია. _ განგვიცხადა იური ვაშალომიძემ.
_ ბატონო იური, რა გიშლით ხელს, რატომ არ შედიხართ ოთახში?
_ ველოდები ოზურგეთის მუნიციპალიტეტის გამგებლის მოვალეობის შემსრულებელს, კოტე შარაშენიძეს.
_ ჩვენს მიერ მოპოვებული ინფორმაციით, თქვენ არ შეგიშვეს შენობაში.
_ კარები ღიაა, ორივე მოადგილე აქ არის და ამობრძანდიო მეუბნებიან, მაგრამ ერთმა ახალგაზრდამ სამართლიანად ბრძანა, მოვიდეს გამგებელი და შეგიყვანოსო და ქე, ვარ აგერ.
_ რატომ არ შეხვიდეთო, არ გიკითხავთ?
_ სხვათაშორის, ასე არ ჩავწვდომივარ… ჩემი სურვილი იყო ერთი, პატარა, რიგითი თანამშრომელი გამგეობიდან მოსულიყო და შევსულიყავი. მე წესი ვიცი, ერთ დროს ვმუშაობდი პარტიაში და კაცი როდესაც მიმყავდა დასანიშნავად მივიდოდი, შევუძღვებოდი და გავაცნობდი ხალხს.
_ რომელ პარტიაში “მუშაობდით“?
_ ოო, პარტიის რაიკომში.
_ მოქალაქეთა კავშირის წევრიც იყავით?
_ რა თქმა უნდა, როგორც მიშა სააკაშვილი იყო ფრაქციის თავმჯდომარე.
_ ისიც გავიგეთ, რომ “ერთიანი ნაციონალური მოძრაობის” მხარდამჭერი იყავით და სოფლის ერთ ნაწილს ამის გამო არ სურს თქვენი რწმუნებულობა?
_ ერთი რამ მინდა გითხრათ: კაცო, ცხრა წელი მართეს ნაციონალებმა ქვეყანა და 80-90 % მხარს უჭერდა.
_ ბატონო იური, თქვენი კანდიდატურა ვინ წარადგინა რწმუნებულის პოსტზე?
_ ჩემი თავი გამგეობას წარუდგინა ჩემმა გაკეთებულმა საქმეებმა, რაიონში მოღვაწეობამ და მაჟორიტარი-დეპუტატის ბიუროში მუშაობამ.
_ იქნებ კონკრეტულად გვითხრათ თქვენი საქმიანობის შესახებ.
_ გითხარით პარტიული საქმიანობა, შემდეგ მშვიდობაურის აგროკომბინატი იყო, ჩაის ფაბრიკა და მისი თავმჯდომარე ვიყავი 10 წელი. ზურაბ ჩხაიძის დეპუტატობის დროს ვიყავი ბიუროს უფროსი და შემდეგ მაკარ ნიკოლაიშვილის დეპუტატობის დროსაც გავაგრძელე იქ მუშაობა. _ გვითხრა იური ვაშალომიძემ.
სოფელ ბახვის მკვიდრის, მალხაზ ქურასბედიანის თქმით, კარგი იქნებოდა, რომ რწმუნებულის დანიშვნის დროს სოფლის მოსახლეობის აზრი მოესმინა ახალ ხელისუფლებას:
_ როდესაც კანდიდატების დანიშვნა ხდება, ეს არ არის მოსახლეობასთან შეთახმებული. ადამიანები ხომ ვართ, ამ ხნის განმავლობაში არავინ არაფერს ეკითხებოდა ხალხს და შეიცვალა მთავრობა, ახლა ხომ უნდა მოხდეს ისე, როგორც ხალხს უნდა? სოფლის აზრი უნდა გაიზიარონ. ჩემი გულისტკივილია ეს და ნუ გაიგებ ისე, რომ ვინმეს ვეწინააღმდეგები. ოთხი შვილის მამა ვარ და არავინ ვმუშაობთ სახლში. _ თქვა ჩვენთან საუბრის დროს მალხაზ ქურასბედიანმა.
_ მე ერთი ჩვეულებრივი ადამიანი ვარ და მთავარია, რომ ძველი რწმუნებული არ ჰყავს სოფელს. ეს არის ჩემი პოზიცია. ძველმა რწმუნებულმა სიტყვიერი შეურაცხყოფაც მომაყენა, რადგან “ქართული ოცნების” მხარდამჭერი ვიყავი. _ გვითხრა ქეთევან თევზაძემ.
ბახვის მკვიდრი, ნაირა მელქაძე ამბობს, რომ იური ვაშალომიძე წესიერი ადამიანია. მისივე თქმით, კარგი იქნებოდა სოფელში საკადრო ცვლილებების დროს ის ხალხი დასაქმებულიყო, რომლებიც არჩევნების დროს აქტიურად უჭერდნენ მხარს “ქართულ ოცნებას”.
სოფელ ბახვში იმ დღეს კოტე შარაშენიძე არ ასულა. მისი თქმით, მას მოსახლეობასთან შეხვედრა სოფელ ბახვში არ ჰქონდა დაგეგმილი. მან ასევე ჩვენთან საუბრის დროს ახალდანიშნულ რწმუნებულზეც გააკეთა კომენტარი.
კოტე შარაშენიძე: “ბატონი იური ვაშალომიძე არის გამოცდილი ადამიანი და კეთილსინდისიერად შეასრულებს თავის მოვალეობას, მას ვიცნობ პირადად, ოჯახსაც ვიცნობ. საერთოდ რწმუნებულის დანიშვნის საკითხი რომ გაჭინაურდა ბახვში, ეს საზოგადოებასთან არის შეთახმებული. იური ვაშალომიძე, არის ბახვის საზოგადოების წევრი. ვიღაცას არ მოსწონს და რაღაც ინტერესი აქვთ, ეს ასე არ არის. იმაზე რატომ არავინ არ საუბრობს, რანაირი გამგებელი ჰყავდა ბახვს ამდენი წელიწადი?
_ იური ვაშალომიძე რამდენიმე საათით ვერ შევიდა ადმინისტრაციულ შენობაში.
_ არა, არა ასეთი რამ არ მომხდარა. ის სამთვიანი ვადით არის დანიშნული და თუ ვერ შეასრულებს დაკისრებულ მოვალეობას, შესაბამისად ვიმოქმედებთ. ვისაც აზროვნება აქვს სოფელ ბახვში, კარგად შეხვდა იური ვაშალომიძის კანდიდატურას.
მოგვიანებით, სოციალურ ქსელში შინაგან საქმეთა მინისტრის ყოფილმა მოადგილემ, ზურა ჩხაიძემ ბახვში განვითარებულ მოვლენებზე კომენტარი გააკეთა:
“ამ სოფელში ყველა ადამიანს ძალიან დიდ პატივს ვცემ და დიდად ვაფასებ. ასეთი ტრადიციების სოფელს ხელმძღვანელიც შესაფერისი სჭირდება,ახალგაზრდა,ნიჭიერი,პატიოსანი,განათლებული,ბიზნესის გამოცდილებით და ასე შემდეგ”.
