ჩვენი წყაროს ინფორმაციით, “ადიტტი” კავშირშია ასევე ებრაულ კომპანია “აიჰოპთან”, რომელსაც სახელმწიფოსთან შეთანხმებული, მაგრამ შეუსრულებელი პროექტების გამო, დისკვალიფიკაცია მიეცა.
ლანჩხუთის საკრებულოს სესიაზე, ჯერ კიდევ თვის დასაწყისში გაჟღერდა ინფორმაცია, რომ ახალი კომპანია საავადმყოფოში მაღალ ფასებს აწესებს _ როგორც ოპოზიციური ფრაქციის თავმჯდომარემ მარიკა თურნავამ აღნიშნა, ფასები ლამის გასამმაგებულია.
ლანჩხუთის სამედიცინო ცენტრს კომპანია “ადიტტი”-ს რეგიონული მენეჯერი ზურაბ დანელია სტუმრობდა. იგი კომპანიასთან დაკავშირებული მითქმა-მოთქმის შესახებ ამბობს: _ ჩვენი კომპანია საკმაოდ წარმატებულია სამედიცინო სფეროში. ჩვენი დონორია ებრაული კომპანია, რომელიც, მთელი ქვეყნის მასშტაბით, 9 რეგიონულ სამედიცინო ცენტრს ააგებს. ბუნებრივია, ყველა რეფორმას თან ახლავს თავისი დადებითი და უარყოფითი მხარეები. როცა რეფორმა იწყება, დასაწყისში, შესაძლოა, ბევრი რამ იყოს უარყოფითი, მაგრამ შემდეგ ვითარება უმჯობესდება. ჩვენი კომპანია კერძოა და ბუნებრივია, ბიზნესის თვალით უყურებს ყველაფერს. ლანჩხუთში მომუშავე მედპერსონალს იმ დონეზე ვიცნობ უკვე, რომ გარკვეული ანალიზის გაკეთება შეიძლება. ვფიქრობ, ამ ეტაპზე შტატები შენარჩუნდება, მომავალში კი რა იქნება, წინასწარ ვერ გეტყვით. მხოლოდ ერთი რამის თქმა შემიძლია: არსებული პერსონალი აუცილებლად უნდა გადამზადდეს. საერთოდ, რეგიონებში, მედიცინის მუშაკების მენტალიტეტიც არის შესაცვლელი. ლანჩხუთში ვინც კარგი სპეციალისტია, ბუნებრივია, იმუშავებს, ვისაც სერთიფიკატი არ აქვს, მასთან თანამშრომლობა, ალბათ, არ შედგება.
პირობას გაძლევთ, ლანჩხუთში იქნება კომფორტული საავადმყოფო, რომელიც დღევანდელს ბევრად აჯობებს. კლიენტს, რომელსაც ფულს ახდევინებ, შესაბამისი პირობები უნდა შეუქმნა.
გავიგე, რომ ჩვენი ფასები მაღალი იყო, რამაც უკმაყოფილება გამოიწვია. გიდასტურებთ, რომ თავდაპირველად მართლაც მაღალი ფასები იყო. შემდეგ შევისწავლეთ არსებული ბაზარი, არსებული რეალობა და გადავწყვიტეთ, მომსახურება გაგვეიაფებინა. შემიძლია გითხრათ, რომ დღეს არსებულ ფასებთან მიმართებაში ჩვენი შემოთავაზება არათუ გაზრდილი, უმეტეს შემთხვევაში, დაბალიც კია.
როგორც მენეჯერი ამბობს, ყველა სადაზღვევო კომპანიასთან ითანამშრომლებენ: _ გვექნება გარკვეული სოციალური პროექტებიც. ვითანამშროლებთ ყველა სადაზღვევო კომპანიასთან და კლინიკებთანაც. ბენეფიციარს არჩევნის საშუალება უნდა ჰქონდეს და თავად წყვეტდეს, რომელ კლინიკას მიმართოს. ლანჩხუთში ჩამოვიტანთ თანამედროვე დანადგარებს. გამოკვლევები, რომლის ჩატარება ადგილზე არ იქნება შესაძლებელი, ალბათ, ქუთაისში ჩატარდება. თუ პაციენტთა რიცხვი იქნება მაღალი, ჩვენ შეგვეძლება სპეციალისტები მოვიწვიოთ თბილისიდან ან ქუთაისიდან. ამით მოსახლეობას ზედმეტი ხარჯებისგანაც დავიცავთ. მაგალითად, ჩოხატაურში არის საკმაოდ მაღალკვალიფიციური ენდოკრინოლოგი, რომელიც გარკვეულ დღეებში ლანჩხუთში ჩამოვა. ჩვენ ქსელში დასაქმებული ექიმები გარკვეულ როტაციას აუცილებლად გაივლიან.
ახალი შენობა აუცილებლად აიგება. საავადმყოფო 35 საწოლზე იქნება გათვლილი და ვფიქრობთ, რომ ბენეფიციარები მომსახურებით კმაყოფილი გვეყოლება.
ისიც გავარკვიეთ, რომ “ადიტტი” ადგილობრივი ხელმძღვანელის შეცვლას არ აპირებს: _ ქალბატონი თინიკო გოგუაძე ძალიან კარგი მენეჯერია. ჩემი შეფასებით, რეგიონებში ის ყველაზე საუკეთესოა. ის დარჩება ხელმძღვანელად და ჩვენთან ერთად გააგრძელებს მუშაობას.
მასალა დასაბეჭდად მზად გვქონდა, როცა ჩვენმა წყარომ გვაცნობა, რომ ახალმა მფლობელმა მომსახურე პერსონალს ხელფასები შეუმცირა, რის გამოც, ექიმები სამედიცინო ცენტრიდან წასვლაზე ფიქრობენ. მათ შორის, ასახელებენ პროფესორ მალხაზ მირცხულავას, რომლის მაღალი კვალიფიკაცია საქვეყნოდ არის ცნობილი.
ინფორმაციის გადასამოწმებლად ზურაბ დანელიას ტელეფონით დავუკავშირდით:
_ მართალია თუ არა ინფორმაცია, რომ ექიმებს ხელფასები შეუმცირდებათ?
_ ჩვენი კომპანია კერძოა და ამ შეკითხვას არ ვუპასუხებ. ვის რა ხელფასი ექნება, ეს ჩვენი შიდა საქმეა. რაც საჭირო იყო, ყველაფერი ვუთხარი კორესპონდენტს. დაინტერესების შემთხვევაში, თქვენი კონსტიტუციური ნებაა, ექიმებს ჰკითხოთ ამის შესახებ, თუ, რა თქმა უნდა, გიპასუხებენ.
_ გასაგებია, გმადლობთ.
_ ერთი რაღაც მინდა გითხრათ _ როცა კორესპონდენტი რაიმეს იკითხავს, ჯერ უნდა გაარკვიოს, რას კითხულობს. ჩვენ შესახებ არის ინფორმაცია ინტერნეტში და ვინც ინტერნეტში მუშაობა იცის, ნახავს, რომ ჩვენ ვართ კერძო კომპანია. შევთანხმდით ამაზე? რაც კითხვა გექნებათ, დამიკავშირდით და გიპასუხებთ(?!).
რედაქციისგან: კითხვამ “კერძო კომპანიის” მენეჯერი, რომელიც ჯერ ფასებს აწესებს და მერე სწავლობს ბაზარს, აშკარად გააღიზიანა და “ჭკუის დარიგება” დაგვიწყო _ თურმე, სანამ კითხვას დავსვამდეთ, მანამდე “ინტერნეტში მოვიძიოთ”, შეიძლება თუ არა ამ კითხვის დასმა. ამასთან, “ინტერნეტში მუშაობაც უნდა ვიცოდეთ”! ალბათ, ბატონი დანელია ფიქრობს, რომ ჩვენისთანა “სოფლელებისთვის” ინტერნეტი საკმაოდ უცხო ხილია. თუმცა, ამ შემთხვევაში მენეჯერი შეცდა _ ინტერნეტის ცოტა რაღაცა გაგვეგება და ამ ” ADITTI “-ს (კომპანიის სახელი სწორედ ასე ეწერა დანელიას სავიზიტო ბარათზე) შესახებ ინფორმაციის მოპოვება ბატონი ზურაბის მიერ “ნასწავლი გზით” ვცადეთ, თუმცა, უშედეგოდ: თავიდან მენეჯერის ელფოსტის მისამართის _ zdanelia@aditti.ge, მიხედვით, ბრაუზერში www.aditti.ge (საერთოდ, ელფოსტის, თუ ის უფასო სერვერზე არ არის განთავსებული, მისამართის ბოლო ნაწილი სწორედ კომპანიის ვებმისამართს ნიშნავს) ავკრიფეთ, მაგრამ მსოფლიო ქსელმა უარი გვტკიცა, რა დაგკარგვიათ, რას ეძებთო! მერე ცნობილი საძიებო სისტემებით ვცადეთ ADITTI -ს მოძებნა _ ეს სახელი ქართულად, ინგლისურად, გერმანულად, ფრანგულად და თქვენ წარმოიდგინეთ, ებრაულადაც კი ავკრიფეთ, მაგრამ ისევ არაფერი გამოგვივიდა _ ინტერნეტში ორი-სამი ADITTI კი ვნახეთ, მაგრამ ჩვენ რომ გვაინტერესებდა, იმის მსგავსი არაფერი _ მაგალითად, საინფორმაციო ტექნოლოგიების და მომსახურების ფირმა ინდოეთში; Aditti Chopra _ ინდოელი მომღერალი; დოღის ცხენი გერმანიაში… რაც ამ კომპანიას მივამსგავსეთ, ის იყო, რომ ვიღაც ADITTI, თბილისში ვაკანსიას აცხადებს, თუმცა, განცხადებაში არ არის მითითებული, სად მდებარეობს ვაკანსიის გამომცხადებელი ან რას წარმოადგენს ის.
ასე რომ, ჩნდება საკმაოდ საფუძვლიანი ეჭვი _ ADITTI იგივე “აიჰოპი” ხომ არ არის, რომელიც “100 საავადმყოფოს” პროგრამაში მონაწილეობდა და ვალდებულებების შეუსრულებლობისთვის, საქართველოს მთავრობამ, 2010 წელს, პროგრამიდან “გამოთიშა”?!
