პარლამენტარ ელისო ჩაფიძის განცხადებით, პროექტის მთავარი ნაწილი აჭარის ტელევიზიისთვის საზოგადოებრივი მაუწყებლის სტატუსის მინიჭებაა. ასევე, სამეურვეო საბჭოს ფორმირების საკითხი, რომელიც, საზოგადოებას ყველაზე მეტად აღელვებს. ჩაფიძე აღნიშნულ კანონპროექტს დადებითად აფასებს და აღნიშნავს, რომ იმედია ამ ცვლილებების შემდეგ, საქართველოში ისეთივე სტანდარტების საზოგადოებრივი მაუწყებელი იქნება როგორც ბრიტანეთში “BBC”-ია.
“ხვალ, სავარაუდოდ, დაიწყება კანონპროექტის განხილვა “მაუწყებლის შესახებ კანონში ცვლილებებისა და დამატებების შესახებ.” ეს გახლავთ 4 კანონისაგან შემდგარი პროექტი, რომელთაგან ორი არის ორგანული კანონი, ხოლო ორი _ ჩვეულებრივი, რომელიც აწესრიგებს მაუწყებელში არსებულ მდგომარეობას. მთავარი ნაწილი ამ კანონპროექტისა გახლავთ “აჭარის ტელევიზიისგან” საზოგადოებრივი მაუწყებლის შექმნა.მოგეხსენებათ, რომ ის ფუძნდება როგორც დამოუკიდებელი, საჯარო სამართლის ირიდიული პირი, რომელსაც ექნება თავისი განკერძოებული ქონება, რასაც აჭარის “ქონების მართვის სამინისტრო” უვადო სარგებლობაში გადასცემს. მაგრამ ის იქნება დაკავშირებული “საზოგადოებრივ მაუწყებელთან”. სამეურვეო საბჭო ერთობლივად გაუწევს მეთვალყურეობას, როგორც პირველ არხს, მეორე არხს, ასევე “საზოგადოებრივი მაუწყებლის” აჭარის ტელევიზიას.
მთავარი ამაღელვებელი საკითხი გახლავთ სამეურვეო საბჭოს რეფორმირების პროცესი. კონკრეტულად, საუბარია იმაზე, რომ საზოგადოებრივი მაუწყებლის სამეურვეო საბჭოს წევრთა შემადგენლობა შემცირდეს 9 ადამიანამდე და მათი დანიშვნა მოხდეს არა მხოლოდ პრეზიდენტის წარდგინებით და პარლამენტის თანხმობით, არამედ პარლამენტთან, როგორც საზოგადოების მიერ არჩეულ წარმომადგენლობით ორგანოსთან, შეიქმნას საზოგადოებრივი კომისია, რომელიც განიხილავს კანდიდატურებს,” _ განაცხადა ელისო ჩაფიძემ.
