_ ასე შეაფასა დავით ბერძენიშვილმა პრეზიდენტის ადმინისტრაციის დღევანდელი მიმართვა მთავრობისადმი.
ბერძენიშვილი “გურია ნიუსთან” აგვისტოს ომის გამოძიების მიზანს განმარტავს. მისი თქმით, თუ ომში ბრძანებებს გასამხედროებული სამოქალაქო პირები იძლეოდნენ, ამაზე პასუხი გასაცემი იქნება.
_ რაც უფრო ხშირად გამოთქვამენ შეშფოთებას ყოფილი ხელისუფლების ესა თუ ის წარმომადგენლები, მით უმეტეს იმ ხელისუფლების ხელმძღვანელი, რომ ვაიმე, ვაიმე გამოძიება არ გვინდა, მით უფრო მყარდება საზოგადოებაში იმის მოლოდინი, რომ ფაქტი ნამდვილად გამოსაძიებელია. გამოძიება არ იკვლევს ომის დაწყების პერიპეტიებს და ბრალეულობას. პოლიტიკურად გარკვეულია ეს საკითხი “ტალიავინის კომისიითაც”, ჩვენი დამოკიდებულებითაც საერთო პოლიტიკური კონსესუსით. ეს ფაქტებია _ ორჯერ ორი ოთხია, ომი დაიწყო რუსეთმა. მან დაარღვია საქართველოს საზღვარი. ეს საკითხი არ არის გამოძიების საგანი. გამოძიების საგანია, ომის დროს ვინ როგორ იქცეოდა. იქნება ეს მომხდური თუ დამხდური. როგორც ჩანს, სააკაშვილს და მის კამპანიას აშფოთებს რაღაც ისეთი ფაქტების გამომზეურების საფრთხე, რაც, როგორც ჩანს, მათ უკეთ იციან. მე არ შეიძლება ეს ვიცოდე მყარად. მე მაქვს გონივრული ეჭვი, რომ მთლად კარგად და ადეკვატურად არ იქცეოდა მაშინდელი ხელისუფლება. ბრძანებებს რომ სამოქალაქო პირები იძლეოდნენ, ეს თუ დადასტურდა და სამხედრო პირები თუ მათ სრულიად არაკომპეტენტურ და არაკვალიფიციურ ბრძანებებს ასრულებდნენ, მაშინ ამაზე პასუხი გასაცემი იქნება.
_ ვის გულისხმობთ სამოქალაქო პირებში?
_ გიგი უგულავას ვანო მერაბიშვილს და ა.შ, რომლებიც საკუთარი კომპეტენციების ფარგლებს მიღმა შესაძლოა იღებდნენ გადაწყვეტილებებს, რაც უნდა მიეღოთ სამხედროებს. აი, ეს საკითხი თუ დადასტურდება, მაშინ ამაზე პასუხი იქნება გასაცემი, _ განაცხადა დავით ბერძენიშვილმა “გურია ნიუსთან” საუბრისას.
შეგახსენებთ რომ პრეზიდენტის ადმინისტრაციამ დღეს მთავრობას ღია წერილით მიმართა, სადაც საუბარია იმაზე, რომ 2008 წლის ომის გამოძიებაზე მუდმივი აპელირება ზრდის ოკუპირებული რეგიონების სხვადასხვა ქვეყნების მხრიდან აღიარების რისკს.
