ამ განცხადების შემდეგ, საბერძნეთში მცხოვრებმა ქართველმა ემიგრანტებმა შექმნეს საპრეზიდენტო კანდიდატის, სალომე ზურაბიშვილის მხარდამჭერთა ჯგუფი. ჯგუფის წევრები აცხადებენ, რომ მათ
სჯერათ და სწამთ, სალომე ზურაბიშვილის კანდიდატურის ღირსეულობა. ჯგუფში წევრიანდებიან არა მარტო საბერძნეთში მცხოვრები ქართველები, არამედ მსოფლიოს სხვადასხვა ქალაქებში და საქართველოში მცხოვრები ის ადამიანებიც, რომლებიც ჯგუფის იდეას იზიარებენ.
“გურია ნიუსი” ამ ჯგუფის რამდენიმე წევრს დაუკავშირდა.
ირაკლი დადიანი, თბილისი: “პირადად არ ვიცნობ, მაგრამ უდიდეს პატივს ვცემ ქალბატონ სალომეს და მჯერა მისი! მერწმუნეთ, თუ არჩევნები არ გაყალბდა, სალომეს ყველაზე მეტი შანსი აქვს, რომ გაიმარჯვოს და იქნებ დაადგეს საშველი ამ ჩვენს გაუკუღმართებულ ცხოვრებას! ქართულ პოლიტიკურ სივრცეში მე მასზე უკეთეს პიროვნებას ვერ ვხედავ! სწორი ხედვაა და პრაგმატული! დღეს სწორედ ასეთი პრინციპული და პატრიოტი ადამიანი სჭირდება ქართულ პოლიტიკურ ელიტას!”
ელიზა ადელაშვილი, ემიგრანტი, აშშ, პენსილვანია: “ჯერ კიდევ პრეზიდენტობის კანდიდატის დასახელებამდე ვწერდი და ახლაც მინდა გავიმეორო: თუ სალომე ზურაბიშვილი იქნება პრეზიდენტობის კანდიდატი, თამამად შემიძლია ვთქვა, რომ ამერიკის ქართული ემიგრაცია მას დავუჭერთ მხარს! ჩვენ გვაქვს ძალიან მკაფიოდ გამოკვეთილი მიზეზები, რის გამოც თავს უფლება მივეცი მეთქვა ის, რაც ვთქვი! სალომე ზურაბიშვილის დიდ დამსახურებაა ნიუ-ორკში არჩევნების დროს ჯერ არნახული აქტივობა “ქართული ოცნების” სასარგებლოდ. სალომეს ერთგულმა და მკაფიოდ ჩამოყალიბებულმა პოზიციამ კიდევ მეტი მხარდამჭერი შესძინა ,,ოცნების “რიგებს. ქ-ნ სალომესგან ემიგრანტების პრობლემების მიმართ არა ერთხელ გამოხატული მისი გულისხმიერება და პრობლემების გაშუქება-მოგვარების მცდელობაც დიდი დივიდენდი იქნება ყველა იმ ემიგრანტისთვის, ვინც მოვლენებს ყურადღებით ადევნებს თვალს.”
მამუკა გუნცაძე, ემიგრანტი, საბერძნეთი: “ქალბატონი სალომე სუფთა წარსულით, სუფთა სულითა და სუფთა ხელებით იყო მუდამ ქართულ პოლიტიკაში. ათასი წელი რომ ვიცოცხლო, ერთი წუთითაც კი არ შემეცვლება ამ ღვთისნიერი ქალბატონის მიმართ ჩემი მოკრძალებული შეხედულება. მილიონი ხმა რომ მქონდეს, მილიონსავე მივცემდი.”
თემო გვალია, თბილისი: “დიახ, მე ამ ჯგუფის წევრი ვარ და ვთვლი, რომ ქალბატონი სალომე ზურაბიშვილი იქნება პრეზიდენტობის ღირსეული კანდიდატი. უნიჭიერესი და გამოცდილი პოლიტიკოსია. დროა გამოვფხიზლდეთ და მხარი დაუჭიროთ
პროფესიონალიზმს, გამოცდილებას, სიკეთეს, ადამიანობას და პრინციპულობას. ქალბატონ სალომეს ეს ყველა თვისება უხვად გააჩნია. არ მიმაჩნია სწორად, რომ პრეზიდენტი აუცილებლად უმრავლესობის გუნდის წევრი უნდა იყოს. ეს ჩემი აზრია და ვფიქრობ დროა შევეჩვიოთ სხვის დაუხმარებლად გადაწყვეტილებების მიღებას.”
