_ თანამედროვე ენაზე რომ ვთქვა, არსებობს ჟურნალისტიკის განვითარების რამდენიმე კონცეფცია: ერთი მათგანი ეს გახლავთ ე.წ. დაბალანსებული ჟურნალისტიკა. ის გულისხმობს ჟურნალისტის მხრიდან ყველა მხარის კომენტარების ჩაწერას, მომზადებას და გადმოცემას და დიახ, ასეთ შემთხვევაში ჟურნალისტი თამაშობს ფოსტალიონის, დიქტოფონის და ასე შემდეგ როლს. ეს არის ერთი გაგება ჟურნალისტიკის და ეს არის რეპორტიული ჟურნალისტიკა, როდესაც ჟურნალისტის პერსონა და პიროვნება არ ჩანს და ის მხოლოდ გადმოსცემს ანუ ახალ ამბებს აწოდებს საზოგადოებას და აცნობს მოსაზრებებს ვინ რა თქვა, ესეც თავისებური ტიპის ჟურნალისტიკაა, მაგრამ როდესაც ჩვენ მივდივართ მაღალ განვითარებული ჟურნალისტიკის სახეობებისაკენ, მაგალითად ეს გახლავთ ანალიტიკური, საგამომძიებლო ხასიათის ჟურნალისტიკა და ა.შ. თუ კი მე-17 მე-18 საუკუნეში განვითარებული იყო ე.წ. დაბალანსებული ჟურნალისტიკა, 20-21 საუკუნემ, განსაკუთრებით 70-იანმა წლებმა ჟურნალისტიკას მიანიჭა ახალი დატვირთვა ანუ ჟურნალისტი ამ შემთხვევაში არა მხოლოდ ჩამწერის ან ინფორმაციის გადმოცემის როლში გამოდის, არამედ ის საკუთარ მოსაზრებებსაც გამოთქვამს და კვლევა-ძიების შედეგად აჩვენებს, რომელ მხარეს არის სიმართლე და რა მოხდა რეალობაში. კიდევ ერთი განვითარებული ამ ბოლო პერიოდში არის სამოქალაქო ჟურნალისტიკა, რომლის შესახებ თქვენ კარგად იცით, როდესაც მოქალაქეები ძალიან აქტიურად არიან ჩართულები ინფორმაციის მოპოვებისა და გადმოცემის პროცესში, ასევე საკუთარი კომენტარებით გამოთქვამენ თავიანთ მოსაზრებებს. მაგრამ, როგორც ასეთი, საგამომძიებლო ჟურნალისტიკა და ანალიტიკური ჯერჯერობით ვერაფერმა შეცვალა ანუ ჩემის აზრით, ის სიტყვები, რომლებიც ჟურნალისტებმა საწყენად მიიღეს, რომ თქვენ არა ხარ მხოლოდ ფოსტალიონები და თქვენ უნდა გქონდეს თქვენეული ვერსია სიმართლისა, სწორედ იმაზე მიუთითებს, რომ ბიძინა ივანიშვილს ჟურნალისტიკის როლი საზოგადოებაში, როგორც მეოთხე ხელისუფლებისა, ესმის უფრო ფართოდ და რეალურად მოუწოდებს ადამიანებს, იგრძნონ საკუთარი ძალა და გქონდეს საკუთარი პოზიცია. ის თვლის, რომ ჟურნალისტი ღირებულია იმდენად, რამდენადაც ეძებს სიმართლეს. აი ეს არის ჩემს ენაზე გადმოთარგმნილი ის დამოკიდებულება, რაც პრემიერ მინისტრმა განაცხადა.
_ მსგავსი ტონით საუბარი ჟურნალისტებთან ცუდ შედეგს ხომ არ გამოიღებს? როგორც გვახსოვს, წინა ხელისუფლების დროს ხშირად იყო ჟურნალისტების შეურაცხყოფის ფაქტები.
_ მე, ვერ დაგეთახმებით! ბიძინა ივანიშვილი მედიის წარმომადგენლებისთვის არის ძალიან გახსნილი, ძალიან გულახდილი რესპოდენტი.
_ ჟურნალისტები ფაქტებითაც საუბრობდნენ…
_ როდესაც ბიძინა ივანიშვილი ესაუბრება ჟურნალისტებს და შედის მასთან დებატებში, პოლემიკაში, მე ვფიქრობ, რომ ეს ნიშნავს ამ ჟურნალისტების აღიარებას და იმას, რომ ბიძინა ივანიშვილი მათ თანასწორებად თვლის და არგუმენტებით ეკამათება. დარწმუნებული ვარ, რომ ის ძალიან კარგად გაეცნობა ჟურნალისტების მიერ წარმოდგენილ არგუმენტაციას.
