თუმცა მისთვის გაუგებარია, რატომ არის ჩვენი ქვეყანა წარმოდგენილი ავღანეთის სამშვიდობო მისიაში ყველაზე დიდი კონტინგენტით, მაშინ როდესაც ნატოს წევრი სახელმწიფოები, მაგალითად, დიდი ბრიტანეთი, საფრანგეთი, გერმანია მინიმალურ კონტიგენტს აგზავნიან იქ.
“წარმოუდგენელია, რომ დღეს საქართველოში ვინმე გულგრილი იყოს სამი ახალგაზრდის, სამი ვაჟკაცის გარდაცვალების გამო. ეს ჩვენთვის მართლა ძალიან დიდი ტრაგედიაა. უპირველეს ყოვლისა, მინდა მივუსამძიმრო ოჯახის წევრებს, ახლობლებს, თანამებრძოლებს და მივუსამძიმრო სრულიად საქართველოს. მინდა გამძლეობა ვუსურვო, იმ ბიჭებს, რომლებიც დარჩნენ ავღანეთში და ძალიან სახიფათო ვითარებაში აგრძელებენ სამხედრო სამსახურს.
ასევე მინდა აღვნიშნო, რომ, რა თქმა უნდა, საქართველო აუცილებლად უნდა მონაწილეობდეს მსოფლიო უსაფრთხოებისათვის ბრძოლაში, თუმცა ნამდვილად გაუგებარია, რატომ არის ჩვენი ქვეყანა წარმოდგენილი ავღანეთის სამშვიდობო მისიაში ყველაზე დიდი კონტინგენტით, მაშინ როდესაც ნატოს წევრი სახელმწიფოები, მაგალითად დიდი ბრიტანეთი, საფრანგეთი, გერმანია მინიმალურ კონტიგენტს აგზავნიან იქ. ყველასათვის ცნობილია, თუ რატომ აკეთებდა ამას ძველი მთავრობა, თუმცა გაუგებარია დღეს, ახალი მთავრობის პოზიცია ამ საკითხთან დაკავშირებით.
მე ღრმად ვარ დარწმუნებული იმაში, რომ საქართველომ უნდა გააკეთოს იგივე, რაც გააკეთა ნატოს სხვა სახელმწიფოებმა და ამით ჩვენ შევძლებთ დამატებითი შესაძლო ტრაგედიების თავიდან აცილებას. ჩვენმა ქვეყანამ საკმარისზე მეტი წვლილი,უფრო მეტიც, საკმარისზე მეტი მსხვერპლი გაიღო იმ ოპერაციაში, რომელშიც ჩვენი წვლილის შეტანა მიგვაჩნდა ჩვენს მოვალეობად,” _ აცხადებს ბურჯანაძე.
