“1 ოქტომბერს ქართველი ხალხისა და საზოგადოების არჩევანი გახლდათ ქვეყანაში სამართლიანობის აღდგენა და არა კვლავ წინა რეჟიმთან “თანამშრომლობა”. სამართლიანობის აღდგენა კი პირველ რიგში დამნაშავე რეჟიმის კანონის ძალით გასამართლებას მოითხოვს. უკვე ყბადაღებული ტერმინი “კოაბიტაცია” ზოგად ასპექტში მისაღებია, მაგრამ არის ზღვარი, რომლის გადალახვაც არ ეგების,” _ ნათქვამია რეზოლუციაში, რომელიც აქციის ყველა მონაწილეს დაურიგდა.
ყოფილი პოლიტპატიმრები, მწერლები, მსახიობები და პოლიტიკოსები _ ასეთი იყო დღეს შეკრებილი საზოგადოების სპექტრი. აქციას რამდენიმე წუთით შემოუერთდა “დემოკრატიული მოძრაობის” ლიდერი ნინო ბურჯანაძე, რომელმაც სამართლიანობის აღსადგენად ხელისუფლებას უფრო ქმედითი ნაბიჯების გადადგმა ურჩია: “პრობლემები, რომლებიც აქ დაისვა, უნდა მოაგვაროს არა რომელიმე არასამთავრობო ორგანიზაციამ, როგორი ავტორიტეტულიც უნდა იყოს ის, არამედ, უპირველეს ყოვლისა, ხელისუფლებამ. დღეს აქ ადამიანები იმისთვის მოვიდნენ, რომ ახალ ხელისუფლებას უთხრან, ჩვენ არ მიგვიცია 1 ოქტომბერს ხმა დამნაშავე რეჟიმთან კოჰაბიტაციისთვის, ჩვენ ხმა მოგეცით იმიტომ, რომ ეს ადამიანები და ათასობით სხვა ადამიანი ელოდება სამართლიანობის აღდგენას,” _ განაცხადა ნინო ბურჯანაძემ.
საპარლამენტო უმრავლესობის წევრი კობა დავითაშვილი აქციას მოწვეული სტუმრის სტატუსით დაესწრო. დავითაშვილი ფიქრობს, რომ საქართველოში სამართლიანობის აღდგენა დაიწყო, მაგრამ პროცესი ძალიან ნელი ტემპით მიმდინარეობს. ამის მიზეზად ის სასამართლო რეფორმის შეფერხებას ასახელებს და აცხადებს, რომ მთავარი პროკურორი არჩილ კბილაშვილი გაცილებით ეფექტური იქნებოდა, სასამართლო რომ არ უშლიდეს ხელს.
” მიმაჩნია, რომ ქვეყანაში უნდა ჩამოყალიბდეს კანონი, რომელიც შეუძლებელს გახდის ავტორიტარული რეჟიმების არსებობას ქვეყანაში. არა მხოლოდ არსებული რეჟიმების გასამართლება, არამედ მომავალში ამის არდაშვება არის მთავარი ამოცანა. ამიტომ ერთი პოლიტიკური ორგანიზაციის გასამართლება საკმარისი არ არის, საჭიროა ჩამოყალიბდეს კრიტერიუმები, რას ეფუძნება ეს ორგანიზაცია, რომ ის ტოტალიტარულად ჩაითვალოს,” _ განაცხადა დავითაშვილმა.
აქციაზე მისვლა ცნობისმოყვარეობით ახსნა კოალიციის კიდევ ერთმა წევრმა გედეონ ფოფხაძემ, რომელიც ფიქრობს, რომ ქვეყანაში სამართლიანობის აღდგენა დაწყებულია. იგივე პოზიცია აქვს სახალხო დამცველ უჩა ნანუაშვილს, რომელიც აცხადებს, რომ სამართლიანობის აღდგენის საქმეში ხელისუფლება უმოქმედოდ არ არის: “გათავისუფლებულია არა ერთი პოლიტპატიმარი, არა ერთ კანონპროექტზე მიდის მუშაობა, რომელიც დაამკვიდრებს ერთგვარ მექანიზმს, რომ მოხდეს უკანონოდ მიღებული გადაწყვეტილებების გადასინჯვა”.
სიტყვით გამომსვლელები ხელისუფლების კრიტიკისგან გარკვეულად თავს იკავებდნენ და ხაზგასმით აღნიშნავდნენ, რომ ბიძინა ივანიშვილის იმედი აქვთ.
“ღმერთკაციც რომ იყოს ბიძინა ივანიშვილი, მარტოს ის ვერაფერს შეძლებს. სრულიად საქართველო უნდა დაუდგეს მას გვერდით, რათა რეჟიმი გასამართლდეს,” _ განაცხადა მსახიობმა დიმა ჯაიანმა.
აქციის ორგანიზატორმა არასამთავრობო ორგანიზაცია “ყოფილი პოლიტპატიმრები ადამიანის უფლებებისთვის” ხელმძღვანელმა ნანა კაკაბაძემ ახალი სამოქალაქო მოძრაობის შექმნა დააანონსა, რომელიც თავისი არსებობით ხელისუფლებას უმთავრეს წინასაარჩევნო დაპირებას შეახსენებს. ამავე დროს შეიქმნება კომისია, რომელშიც დაზარალებული ჯგუფიდან თითო წარმომადგენელი შევა. კომისია ითანამშრომლებს პარლამენტთან და პარალელურად აღმასრულებელ და საკანონმდებლო ხელისუფლებას სამართლიანობის აღდგენის პროცესთან დაკავშირებით საკუთარ რეკომენდაციებს შესთავაზებს.
გავრცელებული ინფორმაციით, ახალ სამოქალაქო მოძრაობას უკვე ჰყავს ფავორიტი საპრეზიდენტო კანდიდატი _ ნინო ბურჯანაძე.
