სულიკო ვაშალომიძე დაიბადა 1931 წლის 7 აპრილს ოზურგეთის რაიონის სოფელ მთისპირში. 1949 წელს დაამთავრა ასკანის საშუალო სკოლა და იმავე წელს ჩააბარა ბათუმის შოთა რუსთაველის სახელობის სახელმწიფო უნივერსიტეტის ისტორიის ფაკულტეტზე. რომლის წარჩინებით დამთავრების შემდეგ, ქედის სკოლაში გაანაწილეს ისტორიის მასწავლებლად. 1955 წლიდან ქალბატონი სულიკო ჩოხატაურში მოღვაწეობს. წლების განმავლობაში მუშაობდა გაზეთ “კომუნიზმის განთიადის” რედაქციაში, ბავშვთა სახლში. 1960 წელს მუშაობა დაიწყო მხარეთმცოდნეობის მუზეუმში მეცნიერ-მუშაკად, შემდეგ კი მუზეუმის დირექტორად. ქალბატონმა სულიკომ აქტიური მონაწილეობა მიიღო მუზეუმის პირველი სტაციონარული ექსპოზიციის მოწყობაში, რომელიც 1961 წლის 5 აგვისტოს გაიხსნა; 1976 წელს მისი უშუალო ხელმძღვანელობით გაიხსნა მეორე ექსპოზიცია. შემდეგ იგი რაიკომში, მესამე მდივნის თანამდებობაზე გადაჰყავთ.
ნაყოფიერი მოღვაწეობისთვის მას მრავალი სიგელი და ჯილდო აქვს მიღებული. ქალბატონ სულიკო ვაშალომიძეს საიუბილეო თარიღი მიულოცეს და მის ღვაწლზე ვრცლად ისაუბრეს ბათუმის არქეოლოგიური მუზეუმის თანამშრომელმა გურამ ლობჟანიძემ, ჩოხატაურის მხარეთმცოდნეობის მუზეუმის დირექტორმა ნათია კალანდაძემ, ადგილობრივი ხელისუფლების წარმომადგენლებმა ანტონ ხუნდაძემ და ზაურ ოსეფაიშვილმა, კულტურის სამსახურის უფროსმა დოდო მამალაძემ, სამუსიკო სკოლის პედაგოგმა ნატო ბერაძემ, მეგობრებმა _ რევაზ თედორაძემ, რევაზ დოლიძემ, მარინე შარაშიძემ, დალი ჩხიკვაძემ, ლიანა თოდუამ და სხვებმა.
_ პირველ რიგში, დიდი მადლობა ყველას, ვინც დღეს მობრძანდა ჩემს საიუბილეო საღამოზე. ყველანი ძალიან მიყვარხართ. მე ოზურგეთში დავიბადე და გავიზარდე, მაგრამ ჩოხატაური უსაზღვროდ მიყვარს, მე ხომ მეუღლესთან, ვილენ კიკვაძესთან ერთად აქ გავზარდე ჩემი ორი შვილი. ლევანი, ტექნიკურ მეცნიერებათა დოქტორია; მეორე შვილი, როგორც მოგეხსენებათ, შემოქმედის ეპარქიის ეპისკოპოსია _ მეუფე იოსები. თუმცა, მე არ გახლდით მორწმუნე და თავიდან არ ვიყავი მომხრე, ჩემი შვილი ამ გზას გაჰყოლოდა, მაგრამ ახლა ძალიან ბედნიერი და ღვთის მადლობელი ვარ, რომ ასეთ დიდ საქმეს ემსახურება.
ყოველთვის უნდა გვახსოვდეს ჭეშმარიტება _ “კაცისთვის შეუძლებელი, ღმერთისთვის შესაძლებელ არს.” კიდევ ერთხელ მოგახსენებთ მადლობას ჩემი დაფასებისთვის, გაიხარეთ, გამრავლდით, გიყვარდეთ ერთმანეთი, სიძნელეების ნუ შეგეშინდებათ. ღვთის წყალობა არ მოგკლებოდეთ თქვენ და სრულიად საქართველოს, _ ბრძანა ქალბატონმა სულიკომ ჩვენთან საუბრისას.
