განიხლილეს საკითხი “ოზურგეთის მუნიციპალიტეტის საჯარო მოხელეთა კონკურსისა და ატესტაციის ჩატარების, საკონკურსო _ საატესტაციო კომისიის დებულების დამტკიცების შესახებ“ და ასევე, “ ოზურგეთის მუნიციპალიტეტის საჯარო მოხელეთა საკონკურსო _ საატესტაციო კომისიის შექმნისა და კომისიის თავმჯდომარის დანიშვნის შესახებ”. ამ საკითხებთან დაკავშირებით, თავისი პოზიციები დააფიქსირეს საკრებულოს წევრებმა ლელა ნაცვალაძემ და დიმიტრი კვერღელიძემ. მათი განცხადებით, საკრებულოს თავმჯდომარეს არ აქვს მორალური უფლება უხელმძღვანელოს აღნიშნულ კომისიას.
აღნიშნულ საკითხთან დაკავშირებით, ოზურგეთის მუნიციპალიტეტის საკრებულოს თავმჯდომარემ ალეკო მამეშვილმა, დეპუტატებსა და დარბაზში მყოფ საზოგადოებას “საჯარო მოხელეთა კონკურსისა და ატესტაციის ჩატარების”, “საკონკურსო _ საატესტაციო კომისიის“ საქმიანობის დებულების პროექტი წარუდგინა და კონკურისის პრინციპები გააცნო. მისი განცხადებით, ობიექტურობა, გამჭვირვალობა, არადისკრიმინაციულობა, საჯაროობა, კოლეგიურობა და კორექტულობა, ეს ის ძირითადი პრინციპებია, რომელიც აუცილებელია კონკურსის ეფექტურობის წარმართვისათვის. მანვე მიაწოდა ინფორმაცია საკრებულოს, რომ სახალხო დამცველის აპარატმა გამოთქვა სურვილი, მიიღოს მონაწილეობა აღნიშნული კონკურსის მუშაობაში.
_აღნიშნულ საკითხთან დაკავშირებით თავისი აზრი ოზურგეთის მუნიციპალიტეტის გამგებელმა კოტე შარაშენიძემაც დააფიქსირა მისი განცხადებით, – ძალიან კარგია და მისაღები კონკურსის ჩატარება.
_ ეს არის აუცილებელი, რადგან პირველი კრიტერიუმი საჯარო სამსახურში დანიშვნისას არის ადამიანის პროფესიონალიზმი და პიროვნული თვისებები. მაგრამ აქ უბრალოდ რაღაც თავებია ჩადებული, რომლის გაანალიზებაც შემდეგ მოხდება, გაანალიზებენ რა და როგორ ხდება და მივიღებთ გადაწყვეტილებას, რა არის სასარგებლო დღევანდელი პოლიტიკისთვის.
საკრებულოს წევრმა დიმიტრი კვერღელიძემ სხდომაზე აღნიშნა, რომ ახალი ხელისუფლება ამას სხვა ხედვით უყურებს, მან პირადად ალეკო მამეშვილს მიმართა:
_ გადახედეთ თქვენს თავს, გაქვთ კი უფლება, რომ ჩაატაროთ კონკურსი? როგორ შეიძლება საზოგადოებამ თქვენ გამოგიცხადოთ ნდობა? როგორ შეიძლება იყოთ ობიექტური, როცა ნებისმიერ ადამიანს თანამდებობაზე ნიშნავდით პოლიტიკური ნიშნით. მართალია, თქვენი ბოლო მრჩეველი მერაბიშვილი უკვე აღარ გყავთ და მიკვირს, ახლა, თქვენ იქ რატომ არ ბრძანდებით მის მხარდასაჭერად! წინასაარჩევნოდ ეს ადმინისტრაციული შენობა გადაქცეული გქონდათ წინასაარჩევნო კამპანიად, ახლა კი ბოლო შანსი მიეცა “ნაციონალურ მოძრაობას” იმისა, რომ ამ კონკურსით ბოლო შანსი მიეცათ შეუნარჩუნდეთ ამ ადამიანებს სამსახური და კიდევ ერთხელ ფარულად დანიშნული იქნას ის ადამიანები, რომლებიც მომავალში კვლავ დარჩებიან „ნაციონალების“ მხარდამჭერებად.
ალეკო მამეშვილმა ამ დროს “გურია ნიუსის“ მისამართით რეპლიკაც ისროლა და კვერღელიძეს მიმართა:
_ წავიკითხე და მომეწონა თქვენი სტატია, სადაც ჩემზე და კონკურსის ობიექტურად ჩატარებაზე საუბრობთ, კონკურსი რამდენად ობიექტურად ჩატარდება? კი ბატონო, და უპასუხეთ ამ შეკითხვებს შენ და ლელა ნაცვალაძემ. თქვენი სიტყვებით რატომ უნდა იყოს საჯარო მოხელეები პოლიტიკის მსხვერპლნი, თუკი ის ადამიანები არიან გამოცდილი მუშაკები? თქვენ ყოფთ საჯარო მოხელეებს “ნაციონალებისა“ და თქვენს მომხრეებად, რაც არ შეიძლება. მე გეუბნებით ჩემს განწყობას, იმაზე რაც თქვენ სტატიაში დააფიქსირეთ.
დიმიტრი კვერღელიძე: თქვენი პოზიცია აქამდე უნდა დაგეფიქსირებინათ, ამ სამი წლის განმავლობაში, სასაცილოა ეს ყველაფერი. თურმე განწყობა გქონიათ, რაც ტყუილია, ეს არის კიდევ მორიგი დავალება თქვენი პარტიული ლიდერებისგან, რაც შეიძლება კონკურსი დაჩქარებული წესით ჩაატაროთ, თქვენ გაქვთ უკვე დღეები დათვლილი. თქვენი პოლიტიკურ წარსულიდან გამომდინარე არანაირი მორალური უფლება არ გაქვთ უხელმძღვანელოთ ამ კომისიას, იმიტომ რომ ვერანაირად ვერ იქნები ობიექტური. თუ ოზურგეთელებს უნდათ, რომ ბატონმა ალეკომ განსაზღვროს ბედი სამსახურში ვინ უნდა მიიღოს და ვინ არა, ეს თქვენზეა დამოკიდებული დეპუტატებო!
ალეკო მამეშვილი: _ გახდი დიმა, მაშინ საკრებულოს თავმჯდომარე! სხვა გზა არ არის დიმა და რა ვქნა! მოგეფინა მალამოდ! ვიცი დიმა, ძალიან გინდა, რა მოლაპარაკებებიც გაქვს, ისიც ვიცი!
დიმიტრი კვერღელიძე: “ნუ დამშვიდდები! “
ალეკო მამეშვილი: _ არა, რა დავმშვიდდები, სადაც შენ ხარ, იქ სიმშვიდე, როგორ შეიძლება იყოს, კაცის დაჭერა გინდა, დაჭერაზე ფიქრობ, ბევრი რამ გინდა და გეტყვი რაც გინდა და რასაც აკეთებ!
დიმიტრი კვერღელიძე: _ უმადური უნდა იყო მაგას რომ ამბობ! გადახედე შენს წარსულს! დათვლილი გაქვს დღეები!
ალეკო მამეშვილი: _ მაგარი მადლიერი უნდა ვიყო!
საკრებულოს სხდომაზე ოზურგეთის მაჟორიტარი დეპუტატის ბიუროს ხელმძღვანელმა მურთაზ ფოცხიშვილმა თავისი აზრი დააფიქსირა და საკრებულოს თავმჯდომარეს კომისიის წევრების შესახებ დეპუტატის მიერ ბიუროს თანამშრომლის, პრესასა და საზოგადოებასთან ურთიერთობის სპეციალისტის ნინო კუკულაძისა და დიმიტრი კვერღელიძის კანდიდატურები შესთავაზა.
სხდომაზე “ქართული ოცნების” დამფუძნებელმა ბესიკ მელუამ საკრებულოში შექმნილ ფრაქცია „ქართული ოცნების“ თავმჯდომარეს ლევან ნინიძეს აქტიურობისკენ მოუწოდა.
ლელა ნაცვალაძემ ალეკო მამეშვილს კი ფრაქცია “ქართული ოცნება -დემოკრატიული საქართველოს” თავმჯდომარის ლევან ნინიძესთვის ოთახის გამოყოფა მოსთხოვა.
ლელა ნაცვალაძე: _ ბატონი ალეკო, ამდენი წლის განმავლობაში წინა ხელისუფლებას ემსახურებოდით, “სახელის გატეხას თავის გატეხა ჯობია”, ამიტომ თქვენს ობიექტურობაში ეჭვი გვეპარება.
ალეკო მამეშვილი: _ კი თქვენი და ბატონ დიმიტრის თვალწინ გადაიარა ყველაფერმა!
დაპირისპირებისა და რეპლიკების მიუხედავადეს საკითხი ხმათა უმრავლესობით დაამტკიცეს. საკონკურსო _ საატესტაციო კომისიის თავმჯდომარედ საკრებულოს თავმჯდომარე ალეკო მამეშვილი დაინიშნა, მის დამტკიცებას ხმა მხოლოდ სამმა დეპუტატმა, დიმიტრი კვრეღელიძემ, ლელა ნაცვალაძემ და ავთანდილ ხინთიბიძემ არ მისცა.
საკრებულოს სხდომის დასრულების შემდეგ ალეკო მამეშვილმა “გურია ნიუსთან” კომენტარი გააკეთა:
_ სხდომაზე იყო არაობიექტური ბრალდება, ჩემს მიმართ ბრალდებები ფაქტებით უნდა მოხდეს, მათი მხრიდან რაც თქვენს სტატიაში ეწერა, ეს იყო სუფთა პოლიტიკური განცხადებები და უსაფუძვლო განწყობა, რაც დღესაც დამტკიცდა. აღმოჩნდა, რომ მხოლოდ სამი ადამიანი იყო ჩემი თავმჯდომარეობის წინააღმდეგი, მაგრამ მე ჩემი ობიექტურობის იმედი მაქვს, _ განაცხადა მამეშვილმა.
