ბოლო დროს, “ქართულ პარტიასთან” დაკავშირებით რამდენიმე რეზონანსული ინფორმაცია გავრცელდა _ ერთ-ერთია პარტიის დაფინანსებასთან დაკავშირებით, მოსკოვში მოღვაწე ბიზნესმენის, კოტე გოგელიას გამოჩენა. “ქართულ პარტიაში” დაადასტურეს, რომ “საქტელერადიოს” ექს-შეფ არჩილ გოგელიას ძმისშვილი და მაკა ასათიანის მეუღლე მათ გვერდითაა. ჩვენმა წყარომ არანაკლებ საინტერესო ინფორმაციაც მოგვაწოდა _ “ქართული პარტიის” დაფინანსებას საქართველოს ფეხბურთის ფედერაციის ყოფილი თავკაცი მერაბ ჟორდანიაც აპირებს. “ვარდოსანი ხელისუფლების” მიერ ორჯერ დანაპატიმრები ადამიანისგან ასეთი ქმედება, თითქოს, გასაკვირი არ უნდა იყოს, მაგრამ ვინც ჟორდანიას იცნობს, იცის, რომ ქართული ფეხბურთის ექს-მესაჭე ძალიან ფრთხილი ადამიანია. მით უმეტეს, ამჟამად საკმაოდ მშვიდად ცხოვრობს უცხოეთში და ჰოლანდიური კლუბის მფლობელიცაა.
თუმცა, ჩვენი წყაროს ინფორმაციით, ჟორდანია არათუ პოლიტიკაში ჩადებს ფულს, არამედ საპარლამენტო არჩევნებშიც იყრის კენჭს!
ლანჩხუთში ის ერთხელ უკვე იყო კანდიდატი. ამჯერადაც მის ინტერესებს მშობლიურ რაიონთან მიმართებაში ასახელებენ. “ქართული პარტიის” ლანჩხუთის ოფისში ჟორდანიას მიერ მათი პარტიის შესაძლო დაფინანსების ინფორმაციას არ ფლობენ, თუმცა “წამოცდათ”, რომ ლანჩხუთის მაჟორიტარად სწორედ მას ისურვებენ: “უკეთეს კანდიდატურას ვერც ვინატრებთ. რაც მერაბ ჟორდანიას ლანჩხუთისთვის აქვს გაკეთებული და რასაც გაუკეთებს, უკეთესი რა უნდა ვინატროთ?! ლანჩხუთმა უნდა იოცნებოს ჟორდანიასნაირ მაჟორიტარზე. ამიტომაც რა გასაკვირია, თუ მის კანდიდატურას ვისურვებთ?” _ გვითხრეს ოფისში.
აშკარაა, რომ ჟორდანიას ქართულ პოლიტიკაში დაბრუნება მთლად ჭორი არ უნდა იყოს. თუმცა, საინტერესოა, რატომ უნდა გაირთულოს მშვიდი ცხოვრება მსოფლიოსა და ევროპის ფეხბურთის “მამების”, იოზეფ ბლატერისა და მიშელ პლატინის, ასევე მსოფლიო ფეხბურთში გავლენიანი მილიარდერის რომან აბრამოვიჩის მეგობარმა? პასუხი ერთია _ ჟორდანია, მართალია, ფრთხილი ადამიანია, მაგრამ ბოლომდე მებრძოლი _ მას მოქმედი ხელისუფლებისთვის “ვალი” აქვს დასაბრუნებელი.
ეს “ვალი” კი საკმაოდ დაუგროვდა _ ბოლოს ჟორდანია გასულ წელს აპირებდა საქართველოში დაბრუნებას, როცა კახა თარგამაძის მიერ წართმეული “დინამოს” დაბრუნებას ცდილობდა. აშკარა იყო, მის უკან რომელიღაც სახელისუფლო გუნდი იდგა. სხვანაირად, სფფ-ის ექს-შეფს “ვარდოსანი ხელისუფლებისთვის” “დინამოს” წართმევის ილუზია არ უნდა ჰქონოდა, და არც ის უნდა ეფიქრა, რომ კლუბს ნებით დაუბრუნებდნენ. თუმცა, ჟორდანია კვლავ მოტყუებული დარჩა, ისევე როგორც მაშინ, როცა წლების წინ, ერთმა სახელისუფლო გუნდმა გოკა გაბაშვილის “სასტავს” დაუპირისპირა _ ჟორდანიამ გაბაშვილს უფასო ბილეთი არ მისცა და სახალხოდ მოუწოდა, 50-ლარიანი ბილეთი შეეძინა. ეს მას მოგვიანებით მეორედ დაპატიმრებად დაუჯდა. მისმა “წამქეზებელმა” სამთავრობო გუნდმა კი ის მოახერხა, რომ სფფ-ის გადამდგარი პრეზიდენტი ციხიდან იოლად დაიხსნა.
ხელისუფლება დღეს ჟორდანიას ისეთივე კარგი თვალით რომ აღარ უყურებს, როგორც შარშან უყურებდა, ერთი ფაქტიდან ჩანს _ გასულ წელს, მისი “დინამოში” შესაძლო დაბრუნება სამთავრობო ორიენტაციის არხებმა ფართოდ გააშუქეს და ჟორდანია საფეხბურთო თოქ-შოუშიც მიიწვიეს. თუმცა, მოგვიანებით აღარავის უხსენებია, რომ ჟორდანია პირველი ქართველი და საერთოდ, პირველი უცხოელი იყო, ვინც ჰოლანდიური კლუბი იყიდა. ახლაც ქართულმა სამთავრობო არხებმა “ვიტესში” ქართველი ჭაბუკის გიორგი ჭანტურიას ტრანსფერის გაშუქებისას, ამ ტრანსფერის მთავარი შემოქმედი, ჟორდანია თითქმის “დამალეს”!
ინფორმაციის გადასამოწმებლად უშუალოდ მერაბ ჟორდანიასთან დაკავშირება ვეცადეთ, მაგრამ იმის გამო, რომ იგი არნემში გადასახლდა საცხოვრებლად, ქართული მედიისთვის მიუწვდომელია.
შემდეგ “ქართული პარტიის” თანათავმჯდომარეს სოზარ სუბარს დავუკავშირდით:
_ ბატონო სოზარ, გვაქვს ინფორმაცია, რომ თქვენი პოლიტიკური გუნდის გვერდით მერაბ ჟორდანია მოიაზრება.
_ ამაზე საუბარი არ ყოფილა. თუმცა, თუ სურვილს გამოთქვამს, ჩვენ ამას მხოლოდ მივესალმებით.
ასე რომ, ჟორდანიას გაპოლიტიკოსება გამორიცხული ნამდვილად არაა, მით უფრო, როგორც ზემოთ აღვნიშნეთ, მას ამ ხელისუფლებასთან “პირადი ანგარიშები” აქვს, რადგან, მასთან “ორივე ტაიმი” წააგო, ხოლო ვინც ჟორდანიას ახლოს იცნობს, იცის, რომ ქართველი საფეხბურთო მოხელე წაგებას ვერ ეგუება!
ეს ყველაზე მეტად ლანჩხუთის მოქმედმა გამგებელმა უწყის _ გიორგი გოგუაძე ჟორდანიას არჩევნებშიც ეხმარებოდა, ხოლო, როგორც ჩვენი წყარო ამბობს, გამგებელი მმართველი პარტიის ერთ-ერთი სავარაუდო კანდიდატი იქნება და იძულებული გახდება მერაბ ჟორდანიას დაუპირისპირდეს.
