პოლიციის მიერ გაკეთებული კორდონი, საპროტესტო აქციის მონაწილეებმა სასულიერო პირების მოწოდების შემდეგ გაარღვიეს და ჰომოფობიისა და ტრანსფობიის დღის აღნიშვნის საშუალება არ მისცეს აქციის ჩატარების მსურველებს.
იყო თუ არა ეს, როგორც საზოგადოების ერთმა ნაწილმა დაარქვა, კონტრაქცია, სახელმწიფოს წინააღმდეგ მიმართული, ამასთან დაკავშირებით ყოფილი პოლიტპატიმარი, გიორგი გაბედავა, რომელმაც აქციის ჩატარების ნებართვა თბილისის მერიისგან მიიღო “გურია ნიუსთან” აცხადებს:
_ ფორმულირება _ “კონტრაქცია”, არასწორია. რადგან, მათ აქცია არ ჩაუტარებიათ. 17 მაისი იყო მსოფლიოში მიმდინარე გლობალიზაციის პროცესებზე ქართველი ხალხის გამარჯვების დღე. ამ პროცესმა ძალიან ბევრი ჩვენნაირი ქვეყნები დააჩოქა და დაამარცხა. სანამ ეკლესია იქნება, სანამ ქართველი ხალხი ზნეობას არ დაკარგავს, ჩვენ ისინი ვერ დაგვაჩოქებენ და ვერ მოგვერევიან. ეს აქცია არც ერთი ორგანიზაციის პიარისთვის არ იყო გაკეთებული _ ეს იყო ქართველი ხალხის ნება. ჩვენ არ გვინდა და არ გვსურს აღვირახსნილი საქართველო.
_ თინა ხიდაშელმა “გურია ნიუსთან” განაცხადა, რომ ეს იყო სახელმწიფოს წინააღმდეგ მიმართული აქცია.
_ სახელმწიფოს წინააღმდეგ მიმართული აქცია იგეგმებოდა “იდენტობის” მიერ. ჩვენ ვართ ქვეყანა, რომელიც დემოგრაფიული კატასტროფის წინაშე დგას. ამბობენ, თუ ასე გაგრძელდა 50 წელიწადში ქართველები საერთოდ აღარ ვიარსებებთ. ეს დასკვნა მათი “საყვარელი” გაეროს მიერ დადებული დასკვნაა, რომელსაც ისინი პატივს უნდა სცემდნენ.
პროპაგანდა, რომელიც ქვეყანაში გამრავლებას ეწინააღმდეგება _ სწორედ ეს არის სახელმწიფოს წინააღმდეგ მიმართული. თინა ხიდაშელი რას იტყვის, ჩემთვის ნაკლებად მნიშვნელოვანია. მიუხედავად იმისა, რომ პარლამენტარია და ბევრ რამეს წყვეტს, მოვუწოდებ, იყოს ეროვნული, დააფასოს ის ხმები, რომელიც 1 ოქტომბერს მიიღო. იგი პარლამენტში ხალხის ხმებით მოვიდა და თუ ასე გააგრძელებს, ისევ ხალხი გადაირჩევს.
_ თქვენ რა სტატუსით იყავით აქციაზე?
_ მე ვარ ყოფილი პოლიტპატიმარი, უფლებადამცველი. მაგრამ მე, როგორც რიგითი მოქალაქე, ისე ვიყავი აქციაზე.
_ თქვენ აქციის ერთ-ერთ ორგანიზატორი იყავით.
_ რა მნიშვნელობა აქვს? მე დავიწყე აქცია “რედისონთან”, მაგრამ ეს არ ნიშნავს იმას, რომ მე ვიყავი ორგანიზატორი. მე ვიყავი რიგითი მოქალაქე, რომელიც დავდექი იქ. უბრალოდ, ხომ შეიძლება ადამიანმა მოუწოდოს, აქედან იქეთ წავიდეთო? ეს იყო, მეტი არაფერი. ამ აქციის ორგანიზება არ მომხდარა. აქციის ორგანიზება როცა ხდება, იხარჯება ფული, კეთდება ბანერები, რეკლამები. ჩვენ არაფერი გაგვიკეთებია _ უბრალოდ პრესკონფერენციაზე ვთქვით, მოვდივართ აქ, აქედან ვიწყებთ, მივდივართ იქ. ერთადერთი, რის გამოც ჟურნალისტები და ტელევიზიები ამბობენ, რომ მე ვარ ორგანიზატორი, ალბათ, ის არის, რომ მერიაში მე შევიტანე განცხადება და ნებართვა მომცეს, ჩაგვეტარებინა აქცია. მე გავაკეთებდი ამას თუ სხვა, მნიშვნელობა არ ჰქონდა. ახლა ამ თემით აპელირებენ, რადგან სხვა გამოსავალი არ აქვთ. ალბათ, გახსოვთ სხვა აქციები, რომელიც მცირერიცხოვანი იყო, სადაც მეტი დაზარალებულები იყვნენ. დაახლოებით 80 ათასი ადამიანი იყო გამოსული. რატომ უკვირთ ასეთი რამე? მით უმეტეს, როცა ხედავ, ამდენი ადამიანია გამოსული, ამდენი ათასი ადამიანის წინაშე გამოდიხარ, ხედავ, რომ არ უნდა ხალხს შენი გამოსვლა. ელემენტარულია, რომ დაიმალო, წახვიდე, გაერიდო სიტუაციას. პოლიციით ნუ გვაშინებენ _ თუ დავაშავებ, დამაპატიმრონ. მაგრამ, თუ ჩემი შვილების ზნეობის და მომავლის დაცვას ვითხოვ, ამიტომ ვარ დამნაშავე? პირიქით _ ჩვენ ყველას მოვუწოდებდით, რომ უზნეობას ზნეობით ეპასუხათ.
კორექტულობისკენ მოვუწოდებ ჟურნალისტებს, ტელევიზიებს, რომლებიც სკანდალის გაშუქებაში ერთმანეთს ეჯიბრებიან. იმ დღეს მეუფე იაკობმა თქვა: ჟურნალისტებისთვის ქვეყნის ღირსების დაცვა მეათე ხარისხოვანიაო. ეს სამარცხვინოა. მათ არ ეზრდებათ შვილები, არ უნდათ ნორმალური მომავალი?
_ მიუხედავად იმისა, რომ მათ განსხვავებული ორიენტაცია აქვთ, ისინი საქართველოს მოქალაქეები არიან.
_ ნამდვილად ჩვენი მოქალაქეები არიან. მაგრამ, მათთან რესტორანში დავჯდები,-მეთქი, რომ ვთქვა, მოვიტყუები. ხშირად მხვდებიან ქუჩაში, მაგრამ არასდროს არაფერი დამიშავებია მათთვის. პირიქით მეცოდება. მაგრამ, როცა გამოდის და იძახის, ეს მაგარიაო, ამას ვეწინააღმდეგებით, ჩვენ ვებრძვით ამ ცოდვას და მის გავრცელებას.
_ შესაძლოა სასულიერო პირები დააკავონ, რომლებიც აქციაზე აგრესიით გამოირჩეოდნენ…
_ ღმერთმა ნუ ქნას! სასულიერო პირებს თუ დააკავებენ, 4-ჯერ მეტი ადამიანი გამოვა. დააკავონ “იდენტობის” წევრები, რომლებიც ამ ხალხს იწვევდნენ. ვურჩევ, ცოტა აზრზე მოვიდნენ. 2010 წელს, როდესაც ჩვენ დაგვაკავეს, მაშინაც უნდოდათ სასულიერო პირების დაკავება, მაგრამ ვერ გაბედეს. ახლა ამათ თუ გაბედეს, სააკაშვილის რეჟიმი მიმიქარავს. ვინც ეკლესიას დაუპირისპირდა, ყველაფერი თავზე დაემხო.
