ამასთან დაკავშირებით ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის ყოფილი მოადგილე, პოლიტოლოგი ელენე ხოშტარია “გური ნიუსთან” აცხადებს: _ აქციის არსია, რომ ჩვენი ყველაზე მაღალი სახელმძღვანელო დოკუმენტი არის კონსტიტუცია. კანონი ყველაზე თანაბრად უნდა აღსრულდეს.
დღეს პოლიციამ მოახერხა ჩვენი აზრის თავისუფლების გამოხატვის კონსტიტუციის უზრუნველყოფა. ეს ძალიან მნიშვნელოვანია. რადგან სახელმწიფო დგას, დემოკრატიის სადარაჯოზე.
_ პირადად თქვენი მოთხოვნა იყო დასჯილიყვნენ სასულიერო პირები, რომლებიც 17 მაისის აქციაში მონაწილეობდნენ. ხელისუფლებამ თქვენი მოთხოვნა დააკმაყოფილა _ სასულიერო პირებს ბრალი წაუყენეს. რამდენად მისაღებია თქვენთვის ხელისუფლების გადაწყვეტილება?
_ ალბათ, როდესაც სახელმწიფოში ასეთ მოვლენებთან გვაქვს საქმე, პირად აზრს მნიშვნელობა არ აქვს. ამ შემთხვევაში კანონის იმ აუცილებელ მოთხოვნებს ვახმოვანებდი, რაც ნებისმიერ დემოკრატიულ სახელმწიფოში არსებობს. ძალადობა კანონით ისჯება, მნიშვნელობა არ აქვს, ძალადობას რა ჯგუფი ახორციელებს. თუ მორალურ პასუხისმგებლობაზე ვისაუბრებთ, სასულიერო პირების მორალური პასუხისმგებლობა მაღალია. ძალიან დიდი ფარისევლობაა, როდესაც საუბრობენ, ვინც სასულიერო პირების პასუხისგებას ითხოვს, ისინი ცუდები არიან და ვინც ეკლესიის მოქმედების ფორმებს ვიცავთ, ჩვენ ვართ მართლმადიდებლებიო. რაც 17 მაისს ვნახეთ, აქ არანაირი კონფლიქტი არ არის რელიგიასა და დემოკრატიას შორის _ ეს არის დემოკრატიული სახელმწიფო მოწყობის და კონკრეტული ადამიანების ამბიციური ძალაუფლების კონფლიქტი. სახელმწიფო ვალდებულია, დასაჯოს, არ დაუშვას, კონსტიტუციაზე მაღლა გაჩნდეს რამე სახის დოკუმენტი, რომელიც ჩვენს ყოველდღიურ ცხოვრებას განსაზღვრავს.
_ “გურია ნიუსთან” თინა ხიდაშელმა 17 მაისის კონტრაქცია შეაფასა, როგორც სახელმწიფოს წინააღმდეგ მიმართული აქცია. რამდენად ეთანხმებით ხიდაშელის ამ შეფასებას?
_ აბსოლუტურად ვეთანხმები. ეს აქცია ჩვენს წინააღმდეგ კი არა, სახელმწიფოს, კონსტიტუციური წყობილების, დემოკრატიის წინააღმდეგ არის მიმართული. ჩვენ გვაქვს უფლება, ცალ-ცალკე და ერთად ნებისმიერი აზრის გამოხატვის, თუ ეს აზრი არ შეურაცხყოფს და არ ლახავს სხვის უფლებებს. ამის აღკვეთის უფლება ძალადობით, ჯვრით, ჯვრის გარეშე, ჯოხით, არავის აქვს. პირველ რიგში ეს არის გამოძახილი სახელმწიფოსთვის. ვფიქრობ, სახელმწიფომ ეს გამოწვევა მიიღო.
მე არ ვარ იურისტი და ვერ დავითვლი, რამდენი ადამიანი უნდა დაისაჯოს, არც სასულიერო პირების განსაკუთრებული ჯინი მაქვს, რომ მაინცდამაინც ისინი დაისაჯონ. კანონზე დაყრდნობით ყველა ადეკვატურად უნდა იყოს დასჯილი. ვფიქრობ, მოძალადეების _ სასულიერო პირების სასჯელი არ არის ადეკვატური იმ ძალადობისა, რაც იყო.
_ თქვენი აქციის პარალელურად, საპროტესტო აქცია მიმდინარეობდა შეძახილებით: “სირცხვილი! სირცხვილი!”. რას უპასუხებდით მათ?
_ ერთადერთი, რაც მექნება საპასუხო, მეტი პასუხისმგებლობით უნდა მოვეკიდოთ საზოგადოების აზრს. მესმის, შეიძლება, ვიღაცას არ მოსწონს მეორე ადამიანის საქციელი, ჩვენ გვინდა ჩამოვაყალიბოთ ცხოვრება, სადაც, სხვათა შორის, მათი უფლებებიც იქნება დაცული. ხვალ, თუ ვინმე მეტყვის, რომ ამ ადამიანებს ქუჩაში გამოსვლის უფლება არ აქვთ, მე მათ უფლებებს დავიცავ. რაც უფრო მეტად მოეკიდებიან სამოქალაქო როლს, არ იქნება ძალადობის ტირაჟირება, მით უკეთესი იქნება მათთვის და მათი შვილებისთვის. საბოლოო ჯამში, ჩვენ ყველა სამართალზე დაფუძნებული დემოკრატიული ქვეყნის შექმნაზე ვზრუნავთ. მეორე ადამიანური რჩევა მექნება _ ბევრი წიგნები წაიკითხონ.
