„ერთობის“ მიმართულების კოორდინატორი ლაშა გეგეჭკორი, ამბობს, რომ ხადურს უკვე მესამეჯერ მიწერეს შეკითხვები, თუმცა უშედეგოდ _ ფინანსთა მინისტრი ამ დრომდე თავს იკავებს პასუხისგან.
_ ბატონო მინისტრო! კიდევ ერთხელ შეგახსენებთ 2012 წლის 17 მაისის შეხვედრაზე ბატონ ბიძინა ივანიშვილის მიერ გაცემულ დაპირებას და გთხოვთ საჯაროდ გაგვცეთ პასუხი შემდეგ კითხვებზე: როდის გაიმართება „სახელმწიფო საშინაო ვალის პრობლემათა შემსწავლელი სახელმწიფო კომისიის“ სხდომა, სადაც მოსმენილ უნდა იქნას იმ „სამუშაო ჯგუფის“ მიერ შესრულებული სამუშაოს ანგარიში, რომელიც ემსახურება კოოპერატიული ბინათმშენებლობის დაუსრულებლობით გამოწვეული პრობლემის შესწავლას; რა ოდენობისაა „სახელმწიფო საშინაო ვალის“ ეს ნაწილი; რამდენი დაზარალებულია საქართველოს, და თბილისის მასშტაბით; რამდენი კოოპერატიული ს/სახლია დასამთავრებელი; რა მექანიზმით (წესით) აპირებს ფინანსთა სამინისტრო ვალის გასტუმრებას; როდიდან, რომელი წლის სახელმწიფო ბიუჯეტში აისახება ს/ს კოოპერატივების წევრთა ვალის გასტუმრება და დაიწყება დასასრულებელი ს/სახლების დასრულება;რა სახის, და ვის მიერაა ჩადენილი ის დარღვევები, რომელიც ჩვენი ინფორმაციით აღმოჩენილია „სამუშაო ჯგუფის“ მუშაობის პერიოდში; რატომ არ არის უზრუნველყოფილი ფინანსთა სამინისტროსა და ამ პრობლემაზე მომუშავე არასამთავრობო სექტორს შორის კომუნიკაცია, _ აღნიშნულია ხადურისთვის მესამეჯერ მიწერილ წერილში.
_ უკმაყოფილო ვართ ამ პრობლემაზე მუშაობის ტემპით, კომუნიკაციის არ არსებობით, „სამუშაო ჯგუფის“ ზოგიერთი წევრის არაკომპეტენტური პასუხებით, რასაც ვიღებთ მათთან სატელეფონო საუბრებით, _ აღნიშნავს ლაშა გეგეჭკორი.
_ როცა ჩვენ ხელისუფლებაში მოვალთ, ამ საკითხს უახლოეს პერიოდში გადავწყვეტთ. მე კონკრეტულ დროს ვერ ვპირდები, ელემენტარული მიზეზის გამო, რადგან მე არ ვიცი როგორი ბიუჯეტი დამხვდება, როცა მოვალ. ერთ რამეში ვარ დარწმუნებული, რომ ჩვენ ისეთ უმსგავსობებს არ გავაკეთებთ, რასაც დღევანდელი ხელისუფლება აკეთებს. პრეზიდენტმა ახალი სასახლე აიშენა, აშენებს ახალ პარლამენტს, იუსტიციის სახლებს, ეს ყველაფერი კარგია და საწინააღმდეგო არაფერი მაქვს, მაგრამ ამ ხალხის ხარჯზე ეს არ უნდა ხდებოდეს. ჩემი აზრით, არც პრეზიდენტის სასახლის და არც პარლამენტის ქუთაისში გადატანის აუცილებლობა არ იყო, – ამბობდა ივანიშვილი 2012 წლის 17 მაისს, კოოპერატიული ბინათმშენებლობის დაზარალებულთა ცენტრ “ერთობის” წარმომადგენლებთან შეხვედრისას.
ჩვენ შევეცადეთ ამ საკითხზე ფინანსთა სამინისტროს კომენტარიც მოგვეპოვებინა, თუმცა, სამინისტროს პრესსამსახურში ჩვენს სატელეფონო ზარს არ უპასუხეს.
