დოლიძეს 30 მარტს საკუთარ სახლში, ღამით, ყაჩაღებმა ცეცხლსასროლი იარაღით რამდენიმე სასიკვდილო ჭრილობა მიაყენეს. სახლში იმ დროს ოჯახის სხვა წევრებიც იმყოფებოდნენ. როგორც შსს სამხარეო მთავარი სამმართველოს უფროსი გოჩა ფერსაშვილი აცხადებს, აღნიშნულ საქმეზე გამოძიება მიმდინარეობს და ოპერატიული სამუშაოების შედეგად საქმე მალე გაიხსნება.
თუმცა, ორი თვეა, ყაჩაღობა, რომელიც ოზურგეთის მუნიციპალიტეტის სოფელ ლიხაურში მოხდა, გაუხსნელია…
“გურია ნიუსის” ინფორმაციით, ამ საქმეს “გადააყოლეს” კიდეც ოზურგეთის პოლიციის უფროსი ალექსანდრე ჭანუყვაძეც.
_ პირადად უნდა შევხვდე შს მინისტრს ირაკლი ღარიბაშვილს, რაც არ უნდა დამიჯდეს, აუცილებლად უნდა ვნახო და გავესაუბრო. 21 -ე საკუნეში სახლში ნიღბიანები რომ შემოგიცვივდება და სიკვდილს თვალით განახებს, ესაა ცხოვრება? ოჯახის წევრების თვალწინ სასიკვდილოდ გიმეტებენ. ცხოვრებაში კარგის მეტი არაფერი გამიკეთებია… ადამიანს, რომ გაყაჩაღებენ, რაღაც დანაშაული უნდა გქონდეს, ერთი ხელოსანი კაცი ვარ, რა გამოდის, არ უნდა იმუშაოს ოზურგეთში ხელოსანმა ადამიანმა? პატიოსანი შრომით მივაღწიე დღემდე და ახლა სახლში ღამის გათევის უნდა მეშინოდეს? ავტომატით უნდა ვიდგე? რომელი ბიზნესმენი და ბანკირი მე ვარ? ან წარმოების მეპატრონე? ყველამ იცის ოზურგეთში, მე ვინ ვარ. ჩემი სახლის კარები და ეზო არ იკეტება, ყველასთვის ღიაა. დაკეტილში არასოდეს არ მიცხოვრია.
უძვირფასესი ხატი გავაკეთე, საქართველოში ერთადერთი იქნება, უნდა დავაბრძანო, “დედა ღვთისმშობლის ვედრება” უკვე დევს ოზურგეთის ეკლესიაში. ლიხაურის ტაძარში თუ ხართ ნამყოფი, ტაძართან მისასვლელი სულ ჩემი ხელით ნაკეთებია. ვის რას ვუშავებ?
მინდა შევხვდე ირაკლი ღარიბაშვილს, მაინტერესებს ვარ თუ არა მე დაცული? რატომ უნდა მეშინოდეს სახლში ღამის გათევის? შიშით როგორ ვიცხოვრო? ოჯახი მყავს, სადაც ყველა უმუშევარია, ჩემთან შემოსავლის არცერთი წყარო არაა სხვა გზიდან, თუ მე არ ვიმუშავე. როდის აღვიდგენ ჯანმრთელობას, ნახევარი კაცი დავრჩი, ღმერთმა გადამარჩინა, ორი წუთი რომ დაგვიანებოდათ ჩემი საავადმყოფოში მიყვანა, ახლა მკვდარი ვიქნებოდი. ისეთი ტყვიები მაქვს მაქვს ნასროლი სასიკვდილოდ, 100 კაცში მხოლოდ ერთი არ გადარჩებოდა, მაგრამ ღმერთმა მაჩუქა სიცოცხლე, გადაჭრილი ვარ მთელ სხეულზე, გაფატრული და კიდევ საოპერაციო ვარ, ტყვიები ჯერ არ მაქვს ამოღებული, კიდევ წასასვლელი ვარ თბილისში და რამდენი ათასი ლარი დამიჯდა ჩემი სიკვდილს გადარჩენა ვინ იცის, რა ჯდება დღეს ოპერაციები, რატომ? რა დავაშავე ასეთი?
ყველაზე მთავარი ისაა, რომ ჩემი მკვლელები, ყაჩაღები ქუჩაში ჩვეულებრივად დადიან, გულთან მაქვს ერთი ტყვია, ერთი მთავარ არტერიასთან. უკვე ორი თვეა, ყოველ დღე სამი პოლიციელი სახლში ღამეს მითევს. პოლიცია ეძებს, ვიცი, გაჩერებული რომ იყოს და ფეხებზე ვეკიდო, მართლა გავგიჟდებოდი, მაგრამ ბოლო ამ ყველაფრის?
