უამინდობის დროს, ოჯახის წევრებს ღამის გათენება პირველ სართულზე უწევთ. პირველი სართული კი საცხოვრებლად უვარგისია…
ოჯახის დიასახლისის, ეთერ მექვაბიშვილის თქმით, პენსია არც მას აქვს და არც მის მეუღლეს, სოციალური დახმარება კი თებერვალში შეუჩერეს.
ეთერ მექვაბიშვილი: _ სანიტრად ვმუშაობ ბათუმის რესპუბლიკურ საავადმყოფოში ნახხევარ განაკვეთზე. დიდი ხანი ნაქირავებში ვცხოვრობდი ჩემს ოჯახთან ერთად და იქ ვიღებდით სოციალურ დახმარებას 8 წლის განმავლობაში. ას ლარს ქირაში ვიხდიდით, ვეღარ შევძელით გადახდა და გადმოვედით სოფელში საცხოვრებლად. აქ როგორც კი გადმოვედით, სოციალური დახმარება მალევე, თებერვლის თვეში შემიჩერეს. ხელფასი 150 ლარს ზემოთ არ მაქვს, ესაა მხოლოდ ჩვენი შემოსავალი. ცოტა თხილი მაქვს, არც ძროხა გვყავს და არც ქათამი; სახლს კი ხედავთ რა მდგომარეობაშია, წვიმაში წყალი ჩამოგვდის, ყველგან ტაშტებს ვუდგამთ, ქარს ვერ ვაკავებთ… შემოსავალი რომ არ გვაქვს, მაღაზიაში 280 ლარი პურის ვალი დაგვედო და სირცხვილით ვერ გავდივართ, გარეთ…ერთი თვეა მჭადს ვჭამთ, ეხლა კიდევ კიტრი შემოვიდა და იმით გაგვაქვს თავი. სამსახური ბათუმში მაქვს და იქ დავდივარ, გზაში დღეში 4 ლარი კი მეხარჯება, მაგრამ ესეც რომ არ იყოს, რა გვეშველებოდა?! აღარ ვიცი რა ვქნათ, რა გავაკეთოთ, ძალიან გვიჭირს ცხოვრება.
ოჯახის უფროსის გიორგი ჯორბენაძის თქმით, შემოწმების შემდეგ, თბილისიდან 79 000 ქულა ჩამოვიდა.
“სახლი თავზე გვენგრევა, როდის წაიქცევა არ ვიცი… როცა ქარი ამოიჭრება, აკვანივით არწევს სახლს… გარდა ამისა, არანაირი შემოსავალი ჩვენ არ გვაქვს…“
“გურია ნიუსის“ ჯორბენაძეების ოჯახში სტუმრობისას, ადგილზე იმყოფებოდნენ ლესის რწმუნებული და ინფრასტრუქტურის სამსახურის წარმომადგენლები. როგორც ლესის თემის რწმუნებულმა, დავით ლომაძემ გვითხრა, ჯორბენაძეების ოჯახს, სახლის სახურავის თხოვნით დახმარების შესახებ განცხადება აქვს შეტანილი.
ინფრასტრუქტურის მთავარი სპეციალისტი დავით შეიზაშვილი ადასტურებს, რომ ადგილზე მოსვლისა და დათვალიერების შემდეგ, დაიწერა დასკვნა: სახლი საცხოვრებლად საშიშია, დაზიანებულია როგორც სახურავი, ასევე საძირკველი.
“მე პირადად ვარ დაინტერესებული ამ ოჯახის ბედით. როგორც სოციალურ სამსახურში მითხრეს, რამდენჯერმე ყოფილან და მხოლოდ ოჯახის უფროსი დახვედრიათ სახლში… შეუჩერეს დახმარება; ამის შემდეგ ეუბნებიან, რომ მხოლოდ ოჯახის უფროსს დაენიშნება დახმარება, ცოლს და შვილს _ არა, რადგან გიორგი ჯორბენაძემ ვერ მოახერხა იმის დამტკიცება, რომ ის მარტოხელა არ არის! რა დაწერა სოცაგენტმა, ჩემთვის გაუგებარია… 79 000 ქულა ჩამოუვიდათ, მე მიდევს კაბინეტში, არ ვაგდებ სპეციალურად… ამ ქულის რა ნახეს ამ სახლში, არ ვიცით. მაგრამ დახმარების შეჩერების თავი და ბოლო ის არის, რომ ეს ქალბატონი მუშობს ბათუმში სანიტრად, აქვს 15-დღიანი განაკვეთი. ერთ თვეს მოხდა ისე, რომ მეორე ცვლა გასულა შვებულებაში და მოუწია სრულ განაკვეთზე მუშაობა. დაუფიქსირდა ხელფასი 300 თუ 350 ლარი. ეს მოხდა მხოლოდ ერთ თვეს, თან ლესიდან ბათუმში დადის. რა ქნას, ხომ ვერ დატოვებს სამსახურს, რაღაცის იმედად მაინც არის. იმ ერთი თვიდან გამომდინარე მოუხსნეს დახმარება. ლანჩხუთის სოციალური დაცვის სამსახურში უწერიათ, რომ ეს ოჯახი უკიდურესად ღატაკია. ლანჩხუთის სოციალური სამსახურის თანამშრომლებიც შეწუხებულები არიან ამის გამო. მე მთხოვეს, იქნებ გამგებელთან უშუამდგომლოო. ვიცი, რომ ოჯახის უფროსს 27-ლარიანი დახმარება დაენიშნება, მაგრამ უშველის ამ ოჯახის გასაჭირს 27 ლარი?! _ გვითხრა დავით ლომაძემ.
ჯორბენაძეების ოჯახი ავარიულ სახლში აგრძელებენ ცხოვრებას სოციალური დახმარების გარეშე.
