“მაფშალია 2013”. ფესტივალის ორგანიზატორია შემოქმედთა ასოციაცია “რევერანსი” და მასთან არსებული ჯგუფი “მრავალჟამიერი”.
“გურია ნიუსი” ფესტივალის საორგანიზაციო კომიტეტის ერთ-ერთ წევრს, ბესო ლომსაძეს დაუკავშირდა.
_ ბატონო ბესო, კიდევ ვინ არის საორგანიზაციო კომიტეტის წევრი და რა მიზანი აქვს ფესტივალს?
_ ფესტივლის საორგანიზაციო კომიტეტის წევრები არიან თეა დავითაია და ხვიჩა გვალია. სწორედ ქალბატონი თეას ორგანიზატორობით და ინიციატორობით 2007 წლიდან საქართველოს სხვადასხვა კუთხეში ტარდება ხელოვნების ფესტივალები. მაგალითად, უკვე ყველასთვის ცნობილი ფესტივალები სიღნაღში _ “მზიანი საქართველო” და “ვანოობა”, ბაკურიანში _ “ფანტელი”, ურეკში _ “ზღაპრების ფესტივალი” და სხვა. წელს დიდი ქართველი მწერლის, კონსტანტინე გამსახურდიას დაბადებიდან 120 წლისთავი აღინიშნა და სწორედ ამიტომ გადავწყვიტეთ მის მშობლიურ სოფელში ჩატარებულიყო “მაფშალია”, რომელიც ყოველწლიურ ტრადიციულ ღონისძიებად ჩამოყალიბდება. ფესტივალის მიზანია ქართული ფოლკლორის პოპულარიზაცია, ხელშეწყობა და მომავალი თაობის ჩართვა ფოლკლორის განვითარებაში.
_ ვინ მონაწილეობს ფესტივალში?
_ ფესტივალში მონაწილეობას იღებენ საქართველოს სხვადასხვა კუთხის ფოლკლორული კოლექტივები _ ქორეოგრაფიული ანსამბლები, ხალხური საკრავების ანსამბლები, ქართული ხალხური სიმღერების შემსრულებელი გუნდები. მონაწილეები ფესტივალზე ერთი ან ორი ნომრით იქნებიან წარმოდგენილი.
_ დაჯილდოება როგორ მოხდება?
_ ყველა კოლექტივი დაჯილდოვდება ფასიანი საჩუქრით, ხოლო თითოეული მონაწილე საპატიო დიპლომს მიიღებს.
_ ვიცით, რომ ფესტივალი თვითდაფინანსებადია. თუ გამოთქვა ვინმემ დახმარების სურვილი?
_ დიახ, ფესტივალი თვითდაფინანსებადია, რაც ბუნებრივია ბევრ სირთულეს უქმნის ორგანიზატორებს. მაგრამ მინდა ვისარგებლო შემთხვევით და მადლობა გადავუხადო აბაშის მუნიციპალიტეტის საკრებულოს, რომელიც ფესტივალს უჭერს მხარს. ასევე შპს “აბაშელი ფერმერის” დირექტორმა გამოთქვა სურვილი მხარდაჭერის.
_ “მაფშალია” რას ნიშნავს?
_ “მაფშალია” მეგრული სიტყვაა და მგალობელ ფრინველს ეძახიან. ფესტივალზე მოსული სტუმრები იმ დღეს არა ერთ “მგალობელ ფრინველს” მოუსმენენ.
_ აბაშა პირველად მასპინძლობს ასეთ ფართომასშტაბიან ფესტივალს.
_ მიუხედავად ამისა, იმედი მაქვს, 8 ივნისი ძალიან ლამაზი და დასამახსოვრებელი დღე იქნება.
