ლანჩხუთში ნაციონალების მაჟორიტარობის კანდიდატის და მუნიციპალიტეტის ყოფილი გამგებლის გიორგი გოგუაძის დამარცხების შემდეგ, მის მოვალეობას ოქტომბრიდან 2013 წლის იანვრამდე კახა ასკურავა ასრულებდა. ამავე პერიოდში გადადგომის შესახებ განცხადება გააკეთა ლანჩხუთის მუნიციპალიტეტის საკრებულოს თავმჯდომარე რევაზ ჩიტიძემ. იანვარში კი საკრებულოს წევრებმა თავმჯდომარედ არასამთავრობო ორგანიზაციების _ “კივიტას გეორგიკას” წევრი და “ლანჩხუთის საინფორმაციო ცენტრის” ხელმძღვანელი, ასევე “ნაციონალების” სიით წარდგენილი დეპუტატი, ამირან გიგინეიშვილი აირჩიეს. იმავე დღეს, ახალარჩეულმა თავმჯდომარემ საკრებულოს წევრებს გამგებლის მოვალეობის შემსრულებლის ახალი კანდიდატი, ზაზა ურუშაძე წარუდგინა, რომლის დანიშვნაზე დეპუტატებმა გიგინეიშვილს ერთხმად მისცეს დასტური.
მოსვლის დღიდანვე, ზაზა ურუშაძე აცხადებდა, რომ აუცილებლად განახორციელებდა გამგეობაში სტრუქტურულ რეორგანიზაციას და კვალიფიციურ, გამოცდილების მქონე და პროფესიონალ კადრებზე გააკეთებდა აქცენტს: “ცვლილებები იქნება, მაგრამ კანონის ფარგლებში. მთავარია, კვალიფიციური და გამოცდილი კადრი… არ მოხდება პარტიული ნიშნით კადრების შერჩევა,” _ ამბობდა ურუშაძე.
რეორგანიზაცია გამგეობაში მართლაც გახორციელდა და დღემდე მიმდინარეობს. ჩვენი შეკითხვის პასუხად, რომელ სამსახურებში გახორციელდა რეორგანიზაცია, გამგეობის აპარატში გვიპასუხეს, რომ ამ ეტაპზე გაუქმდა ადმინისტრაციული და საზოგადოებასთან ურთიერთობისა და ინფორმაციის სამსახურები; შეიქმნა გამგეობის აპარატი, ხოლო საზოგადოებასთან ურთიერთობის სამსახური განყოფილების სახით შევიდა ხსენებულ აპარატში. ასევე, შეიქმნა ადამიანური რესურსების მართვის და შიდა აუდიტის სამსახურები; გაუქმდა ზედამხედველობის სამსახური და ის აუდიტის სამსახურში შევიდა, როგორც განყოფილება. რეორგანიზაცია განიცადა ასევე ეკონომიკური განვითარების, სტატისტიკისა და ქონების მართვის სამსახურებმა და მათ ბაზაზე შეიქმნა ეკონომიკისა და საინვესტიციო გარემოს განვითარებისა და ქონების მართვის სამსახურები; განათლების, კულტურის, ძეგლთა დაცვის, ტურიზმის, სპორტისა და ახალგაზრდულ საქმეთა სამსახურის ბაზაზე ორი სამსახური ჩამოყალიბდა: სპორტისა და ახალგაზრდულ საქმეთა და განათლების, კულტურის, ძეგლთა დაცვისა და ტურიზმის სამსახურები.
ამჟამინდელი მონაცემებით, გამგეობის სამსახურებში (გარდა რწმუნებულებისა) დასაქმებულია 80 ადამიანი, მაშინ, როცა 2013 წლის იანვრის მონაცემებით დასაქმებულთა რაოდენობა 67-ს შეადგენდა.
თუ რა განათლების არიან ლანჩხუთის საკრებულოსა და გამგეობაში დასაქმებული საჯარო მოსამსახურეები, ამის შესახებ აპარატის მიერ მოწოდებული ინფორმაციით ირკვევა, რომ საკრებულოს წევრთაგან მხოლოდ ოთხს აქვს საშუალო და ტექნიკური განათლება. რაც შეეხება საკრებულოს აპარატს, აქ უმაღლესდამთავრებული 19 ადამიანი მუშაობს, რამდენიმეს ავტობიოგრაფიაში უწერია _ “სტუდენტი”, “დაუმთავრებელი უმაღლესი”. ანალოგიური მდგომარეობაა გამგეობაშიც.
იმის შესახებ, თუ რამდენად კვალიფიციური კადრებით არის დაკომპლექტებული სამსახურები, ჩვენ გამგებლის მოვალეობის შემსრულებელს ზაზა ურუშაძეს ვერ ვესაუბრეთ, მისი უკრაინაში ვიზიტის გამო, მანამდე კი გვინდა შემოგთავაზოთ ის კომენტარი, რომელიც მან მაშინ გააკეთა “გურია ნიუსთან”, როცა ცვლილებები ხორციელდებოდა: “მე კადრებს ვნიშნავ ერთი თვით, გამოსაცდელი ვადით. თუ გაართმევს თავს, დავტოვებთ, თუ არა, კეთილს ინებებს და წავა. მე კანონი არ მავალდებულებს, რომ კადრს, რომელსაც ავიყვან, უმაღლესი განათლება უნდა ჰქონდეს. თუ ასეა, მაშინ მე ამას არ გავაკეთებ.”
კანონის მიხედვით, ადგილობრივი თვითმმართველობის მოხელედ შეიძლება მიღებულ იქნეს საქართველოს ქმედუნარიანი მოქალაქე, რომელმაც მიაღწია 18 წლის ასაკს, აქვს საშუალო განათლება მაინც და ფლობს საქართველოს სახელმწიფო ენას.
მიუხედავად ამ კანონისა, დასაქმებულთა მიერ საკრებულოსა და გამგეობაში წარდგენილი ავტობიოგრაფიები, ე. წ. CV ბევრ კითხვას ბადებს. ჩვენ რამდენიმე მაგალითს მოვიტანთ, გვარ-სახელთა მითითების გარეშე (ამ შემთხვევაში, ანონიმურობა დაცულია, მიუხედავად იმისა, რომ საჯარო მოხელის ყველა მონაცემი ღია და საჯაროა):
CV #1 _ განათლება: სტუდენტი; სამუშაო გამოცდილება: 2012 წლიდან დღემდე საკრებულოს აპარატის მთავარი სპეციალისტის მოვალეობის შემსრულებელი.
CV #2 _ განათლება: უმაღლესი, ფარმაცია, საოფისე პროგრამები; სამუშაო გამოცდილება: 2012 წლის წინასაარჩევნო პერიოდში ვიყავი უბნის კოორდინატორი;
CV #3 _ განათლება: დაუმთავრებელი უმაღლესი; სამუშაო გამოცდილება: მაქვს კერძო ბიზნესი; არჩევნებში საუბნო კომისიის წევრი.
ახალ საკადრო ცვლილებებს არ ეთანხმება საკრებულოს წევრი და ფრაქცია “რეალური თვითმმართველობისთვის” თავმჯდომარე, დავით წულაძე: “ხალხის დანიშვნას ვიღაცის რეკომენდაციით არ ვეთანხმები. უმეტესად, კარგად ჩაიარა რწმუნებულების დანიშვნამ, სხვა შემთხვევაში კი _ არა. ამ კოალიციაში ათასი უმაღლესდამთავრებულია, შენ რომ ადგები და უმაღლესდაუმთავრებელს დანიშნავ, ეს უკვე იმის თქმის საფუძველს მაძლევს, რომ ამ საკადრო ცვლილებებს ვინც ახორციელებს, არ ვგულისხმობ მარტო ბატონ ზაზა ურუშაძეს, მალე მიხვდება, რომ ასეთი რაღაც დაუშვებელია და ძველ ცხოვრებაში ვბრუნდებით. ვიღაცის და რაღაცის ხათრით ბატონი ზაზაც არ უნდა აკეთებდეს ამას. შეიძლება ვინმემ გირჩიოს და გითხრას, რომ ეს კარგი პიროვნებაა, ან შეიძლება მრჩეველიც თვლის, რომ ეს კომპეტენტური პიროვნებაა. მაგრამ რომ გაიგებს ჩვენი ხელისუფლება, კანდიდატს უმაღლესი არ დაუმთავრებია, თვითმმართველობის ერთი სერთიფიკატი არ აქვს, არ უნდა ნიშნავდეს. ეს პრობლემა აწუხებს მოსახლეობას, მესმის უკმაყოფილება, სწორად კითხულობენ, შე ოჯახაშენებულო, თვითმმართველობა საერთოდ არ იცის და სად მოგყავს? თუმცა, იმედი მაქვს, ყველა ნახავს საკუთარ ადგილს”.
ჩვენ ამ თემაზე კომენტარი დეპუტატის ბიუროს ხელმძღვანელს, გიორგი გეგიაძესაც ვთხოვეთ: “დავიწყოთ იქედან, რომ გამგებლის მოადგილედ დაინიშნა ვახტანგ ზენაიშვილი, რომელიც კვალიფიციური კადრია; კადრების სამსახურში დაინიშნა ლევან ჩხაიძე, რომელიც ძალიან შრომისმოყვარე ენერგიული კაცია; კარგი კადრია ლადო ნანაძე _ იგი “ქართული ოცნების” ერთ-ერთი დამფუძნებელია. რწმუნებულები ძირითადად ყველა ჩვენი პარტიიდანაა და ნორმალური კადრები არიან.
მე არ მომწონს შიდა დანიშვნები. დღეს უმაღლესი განათლება რომ გაქვს, სატირალია და ისიც რომ არ გექნება, საშინელებაა. მე კადრების საკითხებში არ ვერევი. არც ის მიკადრებია, რომ ვინმესთვის მეთქვა, ეს ადამიანი აქ დანიშნე,-მეთქი. კანონმდებლობის მიხედვით, უნდა იყოს საკონკურსო წესით დანიშვნა. ამ კანონს დაწერა კი ეწერა ბედად , მაგრამ შესრულება არ უწერია. საერთოდ, მომხრე ვარ, რომ კადრი თუ არის ნიჭიერი, განათლებული, ხელი არ უნდა კრა _ არ აქვს მნიშვნელობა, “ნაციონალია” თუ სხვა პარტიის წევრი. ბევრ “ნაციონალს” არ უნდოდა გაეკეთებინა ცუდი რაღაცეები, მაგრამ აიძულებდნენ. ეს რაიონში დიდ რეზონანსს იწვევს და მოქმედებს ჩვენს იმიჯზე. კიდევ ერთხელ ვიმეორებ _ არ მომწონს ზოგიერთი კადრი, მაგრამ გეუბნებიან, მხოლოდ სამი თვით დაინიშნენო და ვერაფერს ეტყვი. მე ვფიქრობ, ბატონი ზაზა რომ ჩამობრძანდება უკრაინიდან, სერიოზულად ვისაუბრებ ამ საკითხზე დეპუტატთან ერთად.”
