თუმცა, როგორც გაირკვა, აღნიშნული ათიათასები ამ მიმართულებით არ დახარჯულა. როგორც ექსპერტი ოთარ კონჯარია აცხადებს, ამ ქმედებით ლანჩხუთის მუნიციპალიტეტის გამგეობამ “სახელმწიფო შესყიდვების შესახებ” კანონი უხეშად დაარღვია; ლევან ხინთიბიძის თქმით კი, სახეზე გვაქვს ტიპიური არამიზნობრივი ხარჯვა და კანონების უგულებელყოფა.
ლანჩხუთის მუნიციპალიტეტის გამგეობიდან მიღებულ ოფიციალურ დოკუმენტებში, რომელიც 2010 წელს გახორციელებულ სახელმწიფო შესყიდვებს შეეხება, ვკითხულობთ, რომ “შსს გურიის სამხარეო მთავარი სამმართველოს ლანჩხუთის რაიონული სამმართველოს ეზოში ასფალტ-ბეტონის საფარის მოწყობაზე” 27 000 ლარი დაიხარჯა. სამუშაოები, ერთ პირთან მოლაპარაკების გზით, შპს “გზამშენი -18”-მა შეასრულა. ხელშეკრულება 08.02.10 წელს გაფორმდა.
ოფიციალური დოკუმენტების გაცნობის შემდეგ, “გურია ნიუსმა” შინაგან საქმეთა სამინისტროს ლანჩხუთის რაიონული სამმართველოს ეზოში ფოტოები გადაიღო. ფოტოებზე ნათლად ჩანს, რომ აქ არანაირი სამუშაოები არ არის შესრულებული.
ამის შემდეგ, “გურია ნიუსმა” 2011 წლის 18 აპრილს, ლანჩხუთის მუნიციპალიტეტის გამგებელს წერილობით მიმართა და მოითხოვა, დედანში გაცნობოდა “შსს გურიის სამხარეო მთავარი სამმართველოს, ლანჩხუთის რაიონული სამმართველოს ეზოში ასფალტ-ბეტონის საფარის მოწყობაზე 08.02.10 წელს გაფორმებულ ხელშეკრულებას. “გურია ნიუსს” ლანჩხუთის მუნიციპალიტეტის საფინანსო სამსახურში ხელშეკრულების გაცნობის საშუალება მიეცა, თუმცა, როგორც გაირკვა, ხელშეკრულების საგანი არა შსს გურიის სამხარეო მთავარი სამმართველოს ლანჩხუთის რაიონული სამმართველოს ეზოში ასფალტ-ბეტონის საფარის მოწყობაა, არამედ, ოზურგეთში, ჭავჭავაძის ქუჩა #3-ში შსს გურიის სამხარეო მთავარი სამმართველოს ეზოში ავტოსადგომის ასფალტ-ბეტონის საფარით მოწყობა.
ლანჩხუთის მუნიციპალიტეტის გამგეობის შესყიდვების სამსახურის უფროსი მაია აფხაზავა “გურია ნიუსთან” საუბარში ამბობს, თუ მსგავსი საკითხები გვაინტერესებს, ინფრასტრუქტურისა და საფინანსო სამსახურს უნდა მივმართოთ.
_ ქალბატონო მაია, თქვენ ხართ შესყიდვების სამსახურის უფროსი და სხვა სამსახურს რატომ უნდა მივმართოთ?
_ ჩვენთან მხოლოდ ხელშეკრულებები ფორმდება. კონკრეტულად სად და რა სამუშაო გაკეთდა(?!) ამას ზედამხედველობას ინფრასტრუქტურის სამსახური უწევს. ჩემი მოვალეობაა, ვადები არ დაირღვეს და თუ დაირღვა, ჯარიმა უნდა დავუწესოთ. რაც შეეხება “შსს გურიის სამხარეო მთავარი სამმართველოს, ლანჩხუთის რაიონული სამმართველოს ეზოში ასფალტ-ბეტონის საფარის მოწყობაზე” 08.02.10 წელს გაფორმებულ ხელშეკრულებას საფინანსო სამსახურში უნდა გაეცნოთ, _ ასეთია შესყიდვების სამსახურის უფროსის პასუხი.
საფინანსო სამსახურში ხელშეკრულების გაცნობის და შესყიდვების სამსახურის უფროსისგან მიღებული ოფიციალური პასუხების შემდეგ, ლანჩხუთის მუნიციპალიტეტის საზოგადოებასთან ურთიერთობისა და ინფორმაციის სამსახურის უფროსს, ეთერ ჭყონიას მივმართეთ და ვთხოვეთ, გაერკვია აღნიშნული საკითხი და განმარტება გაეკეთებინა. იქვე პასუხის მისაღებად, დაახლოებით, ნახევარ საათზე მეტი ველოდეთ. ვინაიდან, ჭყონიამ ვერ უპასუხა ჩვენს კითხვას, 20 აპრილს ელექტრონული ფოსტის მეშვეობით წერილი გავუგზავნეთ, თუმცა, პასუხი დღემდე არ მიგვიღია, მან ასევე არ უპასუხა ჩვენს სატელეფონო ზარსაც. ლანჩხუთის მუნიციპალიტეტის ოფიციალურ ვებ-გვერდზე მითითებულ ნომერზე, რომელიც ჭყონიას ეკუთვნის, გვიპასუხეს, რომ ის სამსახურში არ იმყოფებოდა.
“გურია ნიუსმა” საქართველოს ახალგაზრდა ეკონომისტთა ასოციაციას 2010 წელს ლანჩხუთის მუნიციპალიტეტის მიერ გახორციელებული შესყიდვების შესახებ მოწოდებული დოკუმენტაცია და იმ ხელშეკრულების ფოტომასალა გააცნო, რომელსაც საფინანსო სამსახურში, დედანში გაეცნო.
როგორც ექსპერტი ოთარ კონჯარია აცხადებს, ლანჩხუთის მუნიციპალიტეტის გამგეობამ, “სახელმწიფო შესყიდვების შესახებ” კანონი უხეშად დაარღვია.
“ლანჩხუთის მუნიციპალიტეტის მიერ, 2010 წლის 8 თებერვალს გაფორმებული შესყიდვების შესახებ ხელშეკრულების საგანი არის “ოზურგეთში ჭავჭავაძის ქუჩა #3-ში შსს გურიის სამხარეო მთავარი სამმართველოს ეზოში ავტოსადგომის ასფალტ-ბეტონის საფარით მოწყობა”. უნდა აღინიშნოს, რომ აღნიშნული შესყიდვის ობიექტი 2010 წლის ლანჩხუთის მუნიციპალიტეტის შესყიდვების გეგმაში განსაზღვრული არ ყოფილა, რაც საქართველოს კანონის “სახელმწიფო შესყიდვების შესახებ” უხეში დარღვევაა. კანონის მე-9 მუხლი განმარტავს, რომ “შემსყიდველი ორგანიზაცია შესყიდვებს ახორციელებს წინასწარ განსაზღვრული და დამტკიცებული წლიური გეგმის შესაბამისად”, _ გვითხრა ოთარ კონჯარიამ.
მისივე თქმით, “ლანჩხუთის მუნიციპალიტეტის 2010 წლის შესყიდვების გეგმით გათვალისწინებული იყო შსს გურიის სამხარეო მთავარი სამმართველოს, ლანჩხუთის რაიონული სამმართველოს ეზოში ასფალტ -ბეტონის საფარის მოწყობა და არა ოზურგეთში, ჭავჭავაძის ქუჩა #3-ში შსს გურიის სამხარეო მთავარი სამმართველოს ეზოში ავტოსადგომის ასფალტ-ბეტონის საფარით მოწყობა. აღნიშნული ქმედება ასევე, არის საქართველოს ორგანული კანონის “ადგილობრივი თვითმმართველობის შესახებ” დარღვევა. ლანჩხუთის მუნიციპალიტეტი გასცდა უფლებამოსილების ფარგლებს და დააფინანსა ისეთი ობიექტის ეზოს ასფალტ – ბეტონის საფარის მოწყობა, რომელიც სხვა მუნიციპალიტეტის ტერიტორიაზე მდებარეობს. მუნიციპალიტეტმა ადგილობრივი საბიუჯეტო სახსრები, ადგილობრივი მოსახლეობის საჭიროებებისა და პრობლემების მოგვარებას უნდა მოახმაროს”.
“საქართველოს დემოკრატიული განვითარების კავშირის” აღმასრულებელი დირექტორი ლევან ხინთიბიძე “გურია ნიუსთან” საუბარში აცხადებს, რომ თვითმმართველობებისთვის ამოუწურავი პრობლემატიკაა ე.წ. “პოლიციის დაფინანსების” თემა: _ პირველ რიგში, კვლავაც ხაზგასასმელია თვითმმართველობებისთვის ამოუწურავი პრობლემატიკა, რაც ეხება ე.წ. “პოლიციის დაფინანსების” თემას ადგილობრივი ბიუჯეტის საკუთარი შემოსულობებიდან. სამწუხაროდ, ეს პრობლემატიკა არა მხოლოდ ლანჩხუთის თვითმმართველობის ბიუჯეტს ახასიათებს. ამ საკითხზე ჩვენი დამოკიდებულება არაერთგზის დავაფიქსირეთ _ თვითმმართველობის ორგანოებს ვურჩევთ ადგილობრივი მნიშვნელობის პრობლემების მოგვარებისთვის იზრუნონ და არა ისეთი სტრუქტურების დასაფინანსებლად, რომელთა საქმიანობაც ცენტრალური ხელისუფლების კომპეტენციის სფეროში შედის, სამინისტროების სახით, ამისთვის ისინი სერიოზულ ფინანსურ რესურსებს იღებენ მათივე ბიუჯეტიდან, _ გვითხრა ლევან ხინთიბიძემ.
მისი თქმით, “ბიუჯეტის შესრულების თანმიმდევრობასა და წესრიგს განსაზღვრავს საქართველოს საბიუჯეტო კოდექსი, რომლის საფუძველზეც მტკიცდება ბიუჯეტი საკრებულოს მიერ (რომ არაფერი ვთქვათ ორგანულ კანონზე “ადგილობრივი თვითმმართველობის შესახებ”, სახელმწიფო შესყიდვების შესახებ საქართველოს კანონზე და სახელმწიფო შესყიდვების დებულებაზე), რომლის მიხედვით ხორციელდება ბიუჯეტიდან დასაფინანსებელი ნებისმიერი დაგეგმილი ღონისძიება. ხოლო თუ ლანჩხუთის 2010 წლის მუნიციპალური ბიუჯეტით განსაზღვრული იყო ერთი რომელიღაც საქმიანობის გახორციელება (მაგალითად, პოლიციის რაიონული სამმართველოს ეზოს კეთილმოწყობა), მაგრამ მის მაგივრად გახორციელდა სხვა რამ საკრებულოს მიერ ამავე ბიუჯეტში ადექვატური ცვლილებების გარეშე, მაშინ, რა თქმა უნდა, სახეზე გვაქვს ტიპიური არამიზნობრივი ხარჯვა და ზემოაღნიშნული კანონების უგულებელყოფა; ეს, პირველ რიგში, ლანჩხუთის საკრებულოს მსჯელობის საგანი უნდა გახდეს, რადგანაც აღმასრულებელმა რგოლმა შესაძლოა, დაუშვა წლის ძირითადი საფინანსო გეგმის გარკვეულწილ შეუსრულებლობა, რომელიც მის მიერ იქნა დამტკიცებული. რამდენადაც ჩემთვის ცნობილია, 2010 წლის ლანჩხუთის მუნიციპალიტეტის ბიუჯეტის შესრულების განხილვა და დამტკიცება საკრებულოს მიერ ამ უახლოეს პერიოდში უნდა მოხდეს
ამავდროულად, შესაძლოა ამ საქმესთან დაკავშირებით დამატებით გამოიკვეთოს სხვა კანონდარღვევა, რაც ეხება ყალბი საჯარო ინფორმაციის გაცემას, ანუ როცა ნებისმიერი პირის მიერ მოთხოვნილი საჯარო ინფორმაცია სხვა ტიპისაა, ხოლო დედანში არსებული კი სულ სხვა. ეს, თავისთავად, პასუხისმგებელი საჯარო მოსამსახურის ადმინისტრაციულ პასუხისმგებლობას იწვევს, რაც ასევე კიდევ უფრო ბუნდოვანს ხდის ამ საქმის გარშემო არსებულ ვითარებას. ზოგადად კი, სიმართლის დადგენა კომპეტენტური საგამოძიებო ორგანოების პრეროგატივაა”, _ ამბობს საქართველოს დემოკრატიული განვითარების კავშირის აღმასრულებელი დირექტორი.
