და უკრაინაში ვიზიტის დეტალებზე ისაუბრა. ურუშაძე 10 დღის წინ უკრაინას ლანჩხუთის “გურიას” სპონსორის საპოვნელად ესტუმრა.
ზაზა ურუშაძე: _ შევხვდი საქართველოს ელჩს უკრაინაში, მიხეილ უკლებას და ვთხოვე, რომ შუამავლობა გაეწია ორგანიზაციებთან; ისიც ჩაერთო თავიდან ბოლომდე ამ პროცესში. ელჩი ხვდება სავაჭრო პალატის პრეზიდენტს, ვისთანაც შუამავლობას გაგვიწევს. ასევე, შეხვედრა მქონდა ფომენკოსთან უკრაინის ნაკრებისა და კიევის დინამოს ბაზებზე. ის გულიანად მოეკიდა ამ საკითხს და მის ძალებში რაც იქნება, დახმარებას გაგვიწევს.
ასევე შევხვდი ახალგაზრდა ბიზნესმენს, სერგეი კურჩენკოს, რომელიც ფეხბურთის დიდი ფანია. ინტერესი გამოიჩინა იმ მხრივ, რომ ბაზა გვაქვს ზღვის პირზე. სამწუხარო ისაა, რომ საქართველოს ჩემპიონატს ფეხბურთად დიდად არავინ აღიქვამს. კურჩენკო გამოუშვებს თავის წარმომადგენლებს და ადგილზე ნახავენ სიტუაციას. სიმართლე გითხრათ, ჩვენი ქონების გამხელა ვერ გავბედე…
_ თუ ჩემი ხალხი ჩამომიტანს ინფორმაციას, რომ თქვენთან ფეხბურთის განვითარება შეიძლება და ფულის ჩადება ფეხბურთში, მე ამას გავაკეთებო, _ დამპირდა კურჩენკო.
მეგობრის მეშვეობით შევხვდი ალექსანდრ გუზენკოს, ფედერაციის დეპარტამენტის უფროსის მოადგილეს. მან შემახვედრა უკრაინის ერთ-ერთი დიდი ბანკის პრეზიდენტს, რომელიც დაინტერესებულია ფეხბურთით და შემპირდა, რომ წარმომადგენლებს გამოგზავნის ადგილზე გასაცნობად.
გურზენკოს ბავშვთა ფეხბურთის განვითარებაზეც ვესაუბრე, კერძოდ, გაცვლის პროგრამაზე , მაგრამ ჩვენ ჯერ სასტუმროც კი არ გაგვაჩნია, რომ სტუმარი მივიღოთ. ასევე შევხვდი ვიქტორ ხლუსს, რომელიც ფედერაციაში მუშაობს და ვეტერან ფეხბურთელთა კლუბის წევრია. იგი შეგვპირდა, რომ პროფკავშირები მოიძიებს სახსრებს, კიევის დინამოს ვეტერანი ფეხბურთელების მგზავრობის დასაფინანსებლად და შესაძლოა, ჩატარდეს ამხანაგური თამაში.
მთავარია, დაიძრა ყინული, რაღაცის გაკეთება შეიძლება, იმედი დიდია. სპონსორის ძებნა არ არის ადვილი; უკრაინის გუნდებიც კი არის, რომელსაც სპონსორი არ ჰყავს. ამიტომ, თანადაფინანსებაც კი მიღწევა იქნება….
სამწუხაროდ, საქართველოზე ცუდი ფიარია, რომ აქ ხალხს იჭერენ, ხვრეტენ. ერთ-ერთ უკრაინულ ჟურნალში წერილია გამოქვეყნებული სათაურით “შაგ ნაზად” მას ქართველი ავტორი _ ვახტანგ ყიფიანი წერს, რომელიც ავტორია პროექტისა “ისტორიული სიმართლე”. საშუალება მქონდა, ამავე ჟურნალის მეშვეობით პასუხი გამეცა.
სტადიონს რაც შეეხება, ამ საკითხზე თვის ბოლოს უნდა ჩამოსულიყვნენ და სტადიონის შეკეთების საკითხი უნდა დაძრულიყო, მაგრამ მომიწევს ამ საკითხზე თბილისში წასვლა, _ თქვა პრესკონფერენციაზე ზაზა ურუშაძემ.
