ჩემპიონატში მონაწილეობას იღებდნენ 17 ქალაქის ნორჩი სპორტსმენები. ჩემპიონატი ჩატარდა აბაშის მუნიციპალიტეტის ფინანსური მხარდაჭერით. წელს აბაშა მესამედ მასპინძლობს მსგავს ჩემპიონატს _ შარშან ამავე დარბაზში საერთაშორისო ჩემპიონატი ტურნირი, სადაც აზერბაიჯანის ნაკრებიც იყო ჩამოსული.
ჩვენ სამეგრელო ზემო-სვანეთის ძიუდოს ფედერაციის პრეზიდენტს, ბადრი გახოკიძეს ვესაუბრეთ: _ აბაშაში უკვე მესამედ ტარდება რესპუბლიკური ტურნირი ძიუდოში ორ ასაკობრივ ჯგუფში, წელს 200-ზე მეტი სპორტსმენი მონაწილეობს ამ ჩემპიონატში, გუნდები ჩამოსულები არიან ქუთაისიდან, წყალტუბოდან, სამტრედიიდან, ზესტაფონიდან, ბათუმიდან, სენაკიდან, ხობიდან, ზუგდიდიდან, ოზურგეთიდან, ქობულეთიდან და სხვა ქალაქებიდან. ტურნირის სიახლეა ის, რომ წელს ჩემპიონატში პირველად ჩავსვით გოგონების გუნდები 29 და 46 კილოგრამ წონაში. ასეთი სპორტული ღონისძიებები ხელს უწყობს ძიუდოს განვითარებას და ნიჭიერი სპორტსმენების აღმოჩენას. ტურნირს ფინანსური დახმარება გაუწია აბაშის მუნიციპალიტეტის საკრებულომ და გამგეობამ, მათ შეიძინეს თასები და მედლები, რომლითაც გამარჯვებულები დაჯილდოვდებიან. პირველ ადგილზე გასულებს გადაეცემათ თასები, ხოლო მეორე-მესამე ადგილის მფლობელებს მედლები და დიპლომები.
საკმაოდ დაძაბული ორთაბრძოლის შემდეგ ფინალში 40 მონაწილე გადავიდა. ტურნირის ბოლოს კი გამარჯვებულები გამოვლინდნენ. გოგონებში ადგილები ასე გადანაწილდა:
44 კილოგრამ წონით კატეგორიაში: 1 _მარიამ ჭანტურია, აბაშა; 2 _ ანა მაღლაკელიძე, აბაშა, 3 _ მარიამ ბახტიძე, ზესტაფონი;
29 კილოგრამიანებში გამარჯვება არავის დაუთმო მარიამ გოგილაძემ და პირველი ადგილი დაიკავა. მეორე ადგილზე აბაშელი მარიკა ინჯია გავიდა.
ჩვენ პირველი ადგილის მფლობელ გოგონებს გავესაუბრეთ.
მარიამ ჭანტურია: “ძიუდოზე უკვე ორი წელია დავდივარ. დღეს არ ვნერვიულობ, რადგან შევეჩვიე ჩემპიონატებზე და ტურნირებზე გასვლას, ბოლოს საქართველოს ჩემპიონატი მოვიგე. დღეს ზესტაფონის წარმომადგენელს შევხვდი, დარწმუნებული ვიყავი აუცილებლად გავიმარჯვებდი. გაისად მსოფლიო ჩემპიონატში ვიღებ მონაწილეობას და ძალიან ბევრს ვვარჯიშობ, მინდა გავიმარჯვო და ჩემი ქვეყანა ვასახელო.”
მარიამ გოგილაძე: “მე ზესტაფონიდან ვარ. ძიუდოზე ორი წელია დავდივარ. ზოგი ამბობს, რომ ეს სპორტი გოგონას საქმე არაა, მაგრამ მე ასე არ ვფიქრობ. ძალიან მიხარია, რომ გავიმარჯვე. წინ კიდევ სხვა შეჯიბრებები მელოდება და ამიტომ კიდევ უფრო მეტს ვიმუშავებ საკუთარ თავზე. ყოველი ახალი შეჯიბრი, ჩემთვის ახლის შეცნობის საშუალებაა, რომელიც მანახებს სად მიჭირს და სად უნდა გავძლიერდე.”
