ბერძენიშვილი უხერხულ ფაქტს უწოდებს იმას, რომ არჩევნების დროს საუბარი ძირითადად მოსამართლეთა ხელფასებზე, საბჭოს მუდმივ წევრობაზე იყო და არა მოსამართლის პატიოსნებაზე. საპარლამენტო უმრავლესობის წევრის თქმით, მიუხედავ მისი მოსაზრებებისა, პარლამენტი ვალდებულია პატივი სცეს იმ სისულელეს, რაც გიშინდელ იუსტიციის საბჭოს არჩევნებზე მოხდა.
“ჩვენ მათ ყველანაირად მივეცით საშუალება კანონით, რომ ყოფილიყვნენ თავისუფალნი და გაეკეთებინათ თავისუფალი არჩევანი. ჩვენ მეტი არ შეგვეძლო მოსამართლეებმა ამ თავისუფლებით არ ისარგებლეს ბოლომდე. ახლა ჩვენ გავაკეთებთ იმას, რომ ის 6 წევრი რომელიც ჩვენი ასარჩევია, ავირჩევთ. მეტის გაკეთება ჩვენ არ შეგვიძლია. მათი თავისუფლება არის მათ ხელში. ამ არჩეულ ხალხში ისეთი აირჩიეს, რომელიც ჩემი წარმოდგენით, არ უნდა აერჩიათ. იმედი ვიქონიოთ, რომ ეს არჩევნები მათ მისცემთ საშუალებას იმის წარმოდგენის, რომ ნაკლებად არიან აღმასრულებელ ხელისუფლებაზე დამოკიდებული. მიუხედავად იმისა რომ, მათი წარსული მეტ -ნაკლებად ცნობილია. იმედი ვიქონიოთ, რომ აწი მეტად თავისუფლები იქნებიან.
მე მეჩვენება, რომ მოსამართლეებმა გუშინ ფაქტობრივად უარი თქვეს იმაზე, რასაც ჩვენ ვთავაზობდით, მეტ თავისუფლებაზე. ამიტომ ეს არჩევნები მთლად თავისუფალ არჩევნებს არ ჰგავდა. ეს გამოვლინდა იმაში, რომ მოსამართლეებისთვის კითხვის დასმა არ ისურვეს, იმაში განმოვლინდა, რომ თავმჯდომარე ამასთანავე სხდომის თავმჯდომარეც იყო. ყველაფერში გამოვლინდა საბჭოთა კავშირი იყო, გარედან ასე ჩანდა.
შიგნით შეიძლება დიდი დემოკრატები არიან. მიუხედავად ამისა, მაინც გადაიდგა ნაბიჯი წინ. ისინი ახლა არჩეულები არიან. ჩვენ მოგვეწონა არ მოგვეწონა, ასეა. ვთვლით რომ თუ დღეს არა, ეგებ ხვალ ისარგებლონ იმ თავისუფლებით, რასაც ჩვენ ვთავაზობთ. ძალზე მომაბეზრებელი იყო ლაპარაკი ხელფასებზე, ყველაფერზე იყო ლაპარაკი გარდა მოსამართლის პატიოსნებისა.ის რომ მუდმივად უნდა იყვნენ, ხელფასები ქონდეთ და ეს იყო პირდაპირ ნათქვამი და ძალიან უხერხულად ჩანდა. მე ვიცნობ კუბლაშვილს, ადრეც ვიცნობდი და ამ წლების განმავლობაში ის რასაც მე ვიცნობდი, სხვა კაციც გამხდარა, რაც მართალია მართალია. ჩვენ ვართ სხვა ხელისუფლება. ეს პირადად ჩემი აზრია და არ შეიძლება პარლამენტის აზრად ჩაითვალოს, თუმცა ჩვენ იძულებულები ვართ, პატივი ვცეთ იმ სისულელეს რაც გუშინ მოხდა”_ განაცხადა საპარლამენტო უმრავლესობის წევრმა ლევან ბერძენიშვილმა “გურია ნიუსთან” საუბრისას.
