“ამასთან დაკავშირებით დეტალურ კომენტარს არ გავაკეთებ, იმიტომ რომ როდესაც ეს ინფორმაცია გავრცელდა, ჩემთან არ მოსულა არცერთი ჟურნალისტი და არ უკითხავს როგორი იყო რეალური ვითარება. ელემენტარულად, სამართლებრივი კითხვა არავის დაუსვამს. უზენაესმა სასამართლომ ჩემს დიპლომთან დაკავშირებით არაერთი განმარტება გააკეთა, მაგრამ მე კიდევ მქონდა სათქმელი. სამსახურიდან გამოსვლისას, მანქანაში ჩაჯდომამდე სულ აქეთ-იქეთ ვიხედებოდი, ყოველდღე ველოდი რომ ჩასაფრებული ჟურნალისტი დამხვდებოდა და კომენტარს მთხოვდა, მაგრამ არავინ დამხვედრია.
შეგროვებული მაქვს არაერთი ინფორმაცია და მასალა, რომელიც მიუთითებს ჩემი განათლებისა და დიპლომის კანონთან შესაბამისობაზე, ასევე იმ პირების არაკეთილსინდისიერებაზე, რომლებიც ჩემს საწინააღმდეგო ინფორმაციას ავრცელებდნენ. არ ვთვლი საჭიროდ ამ დოკუმენტების გამოქვეყნებას, თუმცა ვიმეორებ, მაქვს კონკრეტული მტკიცებულებები, რომლებიც სულ სხვა კუთხით წარმოაჩენენ სურათს
_დიპლომის გამცემმა უნივერსიტეტმა ოფიციალურად დაადასტურა, რომ თქვენ მეორადი ფაკულტეტი დაამთავრეთ, რაც არ გაძლევდათ იურისტის კვალიფიკაციას.
_ არ მინდა თავი ვიმართლო, ჩემს განათლებას და კვალიფიკაციას წარმოაჩენს ერთის მხრივ კანონმდებლობა, ანუ ჩემი განათლების ხარისხი რამდენად არის შესაბამისობაში კანონთან, მეორეს მხრივ კი ჩემს მიერ მიღებული და დაწერილი გადაწყვეტილებები. თუ მე არ მაქვს სათანადო განათლება და კვალიფიკაცია, როგორ ვწერ გადაწყვეტილებებს? არ შევეხები უნივერსიტეტის კეთილსინდისიერებას, ცალკე საკითხია რამდენად იყო ეს უნივერსიტეტის ოფიციალური პოზიცია. არსებითად ეს იყო ერთი კონკრეტული თანამდებობის პირის წერილობითი განმარტება, რომელიც იცვლებოდა სხვადასხვა სიტუაციებში და შეკითხვის სხვადასხვა ადრესატებთან . იმის დასამტკიცებლად, რომ ეს პირი სხვადასხვა შინაარსის განმარტებებს აკეთებდა, მაქვს არაერთი მტკიცებულება, თუმცა ახლა ამის გამომზეურებას არ ვაპირებ. მოვა დრო და ჟურნალისტებთან ერთად შევაფასებ, რამდენად შესაძლებელია ადამიანი მუშაობდეს უზენაეს სასამართლოში, იღებდეს გადაწყვეტილებებს, აწარმოებდეს პროცესს და მეორეს მხრივ მის მიმართ აღძრული იყოს სისხლის სამართლის საქმე, ვრცელდებოდეს ასეთი ინფორმაცია მტკიცებით ფორმაში ყოველგვარი პრეზუმპციის დარღვევით. შეიძლება, ისე რომ არ მაქვს უფლებამოსილება შეჩერებული და შეწყვეტილი, ვიღებდე გადაწყვეტილებას?
_ ხომ არ აპირებთ ვინმეს ცილისწამებისათვის უჩივლოთ?
_არ ვაპირებ ჯერჯერობით, ყველამ თავის სინდის-ნამუსში ჩაიხედოს, თუმცა ვნახოთ. მაქვს მტკიცებულებები ვინ რას ავრცელებდა და რამდენად სწორი იყო ეს ინფორმაცია. იყო პერიოდი, როდესაც ეს ინფორმაციები ვრცელდებოდა, მხარეები რეკავდნენ და მეკითხებოდნენ, თქვენ კიდევ ხართ თანამდებობაზეო? როგორ წარმოგიდგენიათ, ირღვეოდა თუ არა ჩემი უფლებები? როდესაც ჯერ დადასტურებული არ იყო და მაღიარეს უდიპლომოდ?
_ ე. წ უდიპლომო მოსამართლეების საქმით პროკურატურა დაინტერესდა. რა ხდება ამ საქმესთან დაკავშირებით და ხომ არ დადგება თქვენი პასუხისმგებლობის საკითხი?
_ მე არაფრის მეშინია, იმისთვისაც კი ვამზადებდი საკუთარ თავს რომ შესაძლებელი იყო ერთ დღესაც საპატიმროში აღმოვჩენილიყავი, ისეთი მიმართულებით განვითარდა მოვლენები, რომ ყველაფრისთვის მზად ვიყავი. ისეთი შთაბეჭდილება დამრჩა, რომ თითქოს ყველა მოვატყუე და თაღლითურად დავიკავე მოსამართლის თანამდებობა. ამ საქმესთან დაკავშირებით რა ხდება არ ვიცი, პროკურატურიდან პირადად არავინ შემომხმიანებია, არავის არსად დავუბარებივარ. ახლა შედარებით მშვიდად ვარ, რადგან აღარ ვრცელდება ჩემს უდიპლომობაზე ინფორმაცია. ყველაზე მეტად ის მაწუხებდა რომ ვიხილავდი საქმეებს, მოდიოდა მხარე და მან იცოდა რომ მე უდიპლომო ვიყავი, ეს ძალიან დიდი შეურაცხყოფაა.
