სტუმრები ოფიციალურად იყვნენ მოპატიჟებულნი, რომლებმაც შეხვედრის დაწყების წინ რეგისტრაცია გაიარეს.
მაჟორიტარის მიერ შექმნილი საზოგადოებრივი დარბაზის წევრებს შორის შეხვედრას დაპირისპირება მოჰყვა.
კოალიცია “ქართული ოცნების” რამდენიმე მხარდამჭერმა, ოზურგეთის მუნიციპალიტეტის გამგებელი “ნაციონალური მოძრაობის” წევრებთან გარიგებაში დაადანაშაულეს. მათი განცხადებით, ოზურგეთის მუნიციპალიტეტის გამგებელი კოტე შარაშენიძე ყოფილი ხელისუფლების მხარდამჭერებს მფარველობს, მათ შორის არის შესაშური კოაბიტაცია, ოზურგეთში ჩავარდა სოფლის პროგრამაც.
რესპუბლიკელმა მარინე სუნგულიამ შეხედრაზე განაცხადა, “საქართველოს პრემიერ-მინისტრის ინიციატივით ამუშავებული გლეხებისთვის ხელშემწყობი პროგრამა, ოზურგეთში ჩავარდა, რადგან მოსახლეობის 25%-ს საერთოდ არ მიუღია სასოფლო-სამეურნეო ბარათი, ნუგზარ გიორგაძის განცხადებით კი, გლეხებს 1000 მეტრი საყანე ფართობის დათესვაში 12 ლარს ახდევინებენ.
“გარდა ამისა, დღემდე არ მოწესრიგებულა ინფრასტრუქტურული და სოციალური პრობლემები. ვითხოვთ ოზურგეთში ჩამოვიდეს საქართველოს პრემიერ–მინისტრი და ნახოს რა ხდება ჩვენს მუნიციპალიტეტში. ჩვენ იმისთვის არ გვიბრძოლია, რომ ისევ ის მდგომარეობა ყოფილიყო ოზურგეთში, რაც “ნაციონალების“ მმართველობის დროს იყო“, _ განაცხადა შეხვედრაზე ნუგზარ გიორგაძემ.
გამგებელს ბრალი წაუყენა კომპანია “საქართველოს თაიგულის” დირექტორმა ილია ბასილაშვილმა. მისი თქმით, “გამგებლის დეიდის გამო ოთხი დღეა მის საწარმოს ელექტროენერგია არ მიეწოდება.
“გამგებელი დაუკავშირდა სამართალდამცავებს და უთხრა, რომ არ მომხდარიყო ჩაჭრილი სადენების აღდგენა. მე ხელი მეშლება საწარმოს მუშაობაში! სირცხვილია ოზურგეთს ეს კაცი მართავდეს! ეს უნდა გაიგოს ბატონმა ბიძინამ!” _ აღნიშნა შეხვედრაზე ჩაის გადამამუშავებელი საწარმოს ხელმძღვანელმა ილია ბასილაშვილმა.
ასევე, პრეტენზიები გამოთქვა და დევნაში დასდო ბრალი ოზურგეთის გამგებელს “რესპუბლიკური პარტიის” წევრმა მარინე სუნგულიამ. მისი თქმით, სოფლის მეურნეობის ოზურგეთის სამსახურის უფროსის თანამდებობაზე გამოცხადებულ კონკურსში, მისი კანდიდატურა ოზურგეთის გამგებელმა დაბლოკა.
“მე ამის დამადასტურებელი დოკუმენტაცია გამაჩნია. სამართლიანობის აღდგენის მიზნით ოზურგეთის რაიონულ სასამართლოს მივმართე. პროცესი 17 ივნისს არის ჩანიშნული და ამ ეტაპზე თავს შევიკავებ სხვა განცხადებების გაკეთებისგან, თუმცა, ვიტყვი ერთს, რომ ოზურგეთში ჯერ არ დაწყებულა სამართლიანობის აღდგენის პროცესი“, _ აღნიშნა სუნგულიამ.
პრემიერ-მინისტრის მრჩევლის, ირაკლი მელაშვილის განცხადებით, შეხვედრაზე ბევრი პრობლემა გაჟღერდა და ძალიან კარგია, როცა საზოგადოება აქტიურია.
“პრობლემების ნაწილი, რომელიც შეიძლება ადგილობრივ დონეზე მოგვარდეს, მოგვარდება, ხოლო რომელიც ცენტრალურ დონეზეა გადასაწყვეტი, შევეცდებით დროულად მოვაგვაროთ“, – აღნიშნა მელაშვილმა.
ოზურგეთის მაჟორიტარი დეპუტატის, ზვიად კვაჭანტირაძის განცხადებით, მნიშვნელოვანია, რომ ასეთი შეხვედრა შედგა.
“მე დღეს მოვისმინე უამრავი პრობლემა, რაც ჩემს თანამოქალაქეებს აწუხებს. შევეცდებით, რომ ყველა პრობლემის მოგვარება ეტაპობრივად დაიწყოს. _ აღნიშნა ზვიად კვაჭანტირაძემ.
საზოგადოების წევრების შეკითხვებს, გარდა ზვიად კვაჭანტირაძისა, საქართველოს პრემიერ-მინისტრის მრჩეველი ირაკლი მელაშვილი და ოზურგეთის მუნიციპალიტეტის გამგებელი კოტე შარაშენიძე პასუხობდნენ.
კოტე შარაშენიძის განცხადებით, ყველას ეხმარებიან, ხალხი მადლობელია.
_ ჩვენ ყველა ის ადამიანი გვყავს დასაქმებული, ვისაც გააჩნია შესაბამისი ცოდნა-განათლება, ოზურგეთის მუნიციპალიტეტის გამგეობა არ არის დასაქმების ბიურო, დასაქმების პროგრამის განმახორციელებელი, მუნიციპალიტეტმა უნდა აკეთოს საქმე, მე იმიტომ ვარ გამგებელი და იმიტომ გავხვდი გამგებელი, იმიტომ ამირჩიეს საკრებულოში, ვთხოვე იმ ადამიანებს, რომ თუ მე რამე შემეშლება და რამეს გავაფუჭებ, მაშინ გადამირჩიეთ მეთქი. მაქვს ხედვა, ვარ მენეჯერი და ვიცი რა როგორ უნდა გავაკეთო, მივიღებ იმას, ვისაც შეუძლია საქმის კეთება _ განაცხადა შარაშენიძემ.
