როგორც პაატა მანჯგალაძე აცხადებს, ამ განცხადებების გამო ოზურგეთის მაჟორიტარის დეპუტატის გულისწყრომა დაიმსახურა, რომელმაც, იუსტიციის მინისტრ თეა წულუკიანს და შს მინისტრს ირაკლი ღარიბაშვილს “ფეისბუკზე” მოუწოდა: მანჯგალაძე დაკავებას ითხოვს და მიხედეთო.
“ამის შემდეგ, სულ რამდენიმე დღეში მოხდა რეაგირება და პროკურატურაში დამიბარეს, სხვა სამსახურში საქმიანობისას არსებულ საკითხზე მოწმედ გამოცხადების საბაბით. არაფერს ვამტკიცებ, მაგრამ საეჭვოდ ემთხვევა ეს ორი ფაქტი ერთმანეთს” _ აცხადებდა პაატა მანჯგალაძე “გურია ნიუსთან”.
რატომ დაიბარეს ვიცე-გუბერნატორი გურიაში და მისი საქმიანობის რომელ პერიოდს უკავშირდებოდა დაკითხვა? იყო თუ არა ეს ყველაფერი კავშირში მის მიერ გამოთქმულ ვარაუდთან და რაზე ისაუბრეს 4 საათის განმავლობაში? ამის გარკვევა პაატა მანჯგალაძესთან ვცადეთ.
_ ბატონო პაატა, რა საკითხთან დაკავშირებით დაგიბარეს ქალაქის პროკურატურაში?
_ თქვენი ინტერესი ბუნებრივია და მეც სიამოვნებით ვისაუბრებდი მაგ დეტალებზე, მაგრამ სამწუხაროდ, გამოძიების ამ ეტაპზე მისი ინტერესებიდან გამომდინარე, არსებულ დეტალებზე მინიშების გაკეთებაც არ შემიძლია.
_ რამდენად იყო კავშირი თქვენს ვარაუდსა (ვგულისხმობ მაჟორიტარი დეპუტატის განცხადებას) და იმ საკითხს შორის, რომლის გამოც დაგიბარეს?
_ ასე პირდაპირ დაკავშირება დეპუტატის განცხადებასა და პროკურატურაში დაბარებას შორის რთულია, მაგრამ მხედველობაში თუ მივიღებთ იმას, რომ ამ განცხადებას (სადაც დეპუტატი იუსტიციის მინისტრსა და შინაგან საქმეთა მინისტრს უთითებს, თითქოს დაჭერას ვიხვეწები) ,დროში საეჭვოდ დაემთხვა პროკურატურაში დაბარებას. ბუნებრივია, ჩნდება მაღალი ალბათობის ვარაუდი, რომ შესაძლებელია კავშირიც არსებობდეს, რამაც უბრალოდ მიმდინარე პროცესის ფორსირება მოახდინა. თუმცა, ყველაფერს დრო მოჰფენს ნათელს.
_ ანუ, თქვენი ამ განცხადების გაგება ისე შეიძლება, რომ ეს დაბარება პოლიტიკურად მოტივირებული იყო?
_ მე ვამბობ, რომ დროში ამ ორი საკითხის ძალიან უცნაურად ერთმანეთთან დამთხვევამ გააჩინა აბსოლუტურად ლეგიტიმური კითხვის ნიშნები..
_ უკავშირდება ეს ყველაფერი თქვენს ბოლოდროინდელ პოლიტიკურ აქტივობას და განცხადებებს?
_ ეს იგივე კითხვაა სხვა შეფერილობით. მეც იგივეს გეტყვით, პირდაპირი მტკიცებულებების მოტანა ძნელია, მაგრამ მოვლენათა განვითარების ჯაჭვი მას გარკვეულ პოლიტიკურ ელფერს აძლევს.
_ ქვეყნიდან გაუსვლელობის ხელწერილიც ხომ არ დაგაწერინეს?
_ არა, ნამდვილად არა. ისე, გურიაში ჩემი შემოუსვლელობის ხელწერილი ალბათ უფრო სასურველი იქნებოდა ბევრისთვის. აი, იმ ხალხს ვგულისხმობ, ვისაც მონური წარსული აქვს, მონურ აწმყოში ცხოვრობს და მონურ მომავალზე ოცნებობს.
_ ვის გულისხმობთ ამ ხალხში?
_ იმ ხალხს ნამდვილად არ ვგულისხმობ, რომლებიც ფერად-ფერადი დაპირებებით შეცდომაში შევიდნენ, არც იმათ, ვისაც გულწრფელად სჯერა ახალი მთავრობის. ამაში ვიგულისხმე ყველა ის ადამიანი, მაგალითად ყოფილი “გაიშნიკი”, ძველი დროის დაბრუნებაზე რომ ოცნებობს და ამას სამართლიანობის აღდგენით ნიღბავს, ასვე კრიმინალები, რომლებიც ხალხს ატერორებდნენ და ახლა იმავე მიზეზით, როგორც გაიშნიკი, ვითომ სამართლიანობას შენატრის. ვგულისხმობ ასევე შევარდნაძის მთავრობის ყველა იმ კორუმპირებულ ჩინოვნიკებს, რომელთა ხელფასიც 100 ლარს არ აღემატებოდა, მაგრამ ძალიან უზრუნველად ცხოვრობდნენ ხალხის ხარჯზე. ვითომ სამართლიანობის აღდგენას ემხრობიან, მაგრამ გულში სააკაშვილის ხელისუფლების ანგარიშსწორების ბოღმა ახრჩობთ. მეტს აღარ გავაგრძელებ, მგონი საკმარისია…
_ ეს ფაქტი რამდენად აისახება თქვენს საქმიანობაზე, როგორც ვიცე–გუბერნატორის?
_ ზოგადად, სამართალდამცავ ორგანოებთან ურთიერთობა გარკვეული დისკომფორტის მატარებელია, მაგრამ ვინც კარგად მიცნობს და ეს იციან ჩემმა მეგობრებმა, ვერანაირი დისკომფორტი ვერ გადაგვახვევინებს იმ გზიდან, რასაც ქვეყნის თავისუფლების და მისი ძლიერების იდეა ქვია.
_ და ეს იდეა “ნაციონალური მოძრაობის“ მხარდაჭერაა?
არსებობს საკითხები, რაც პარტიულ ინტერესებზე მაღლა დგას. ეს ზოგად ეროვნული და ზოგად სახელმწიფოებრივი საკითხებია და პარტიაც მ ამ მიზნის მიღწევის საშუალებაა მხოლოდ. ჩემი გაგებით, პარტია არსებობს ხალხისათვის და არა ხალხი პარტიისა და ბელადისთვის. ანუ ჩვენთვის იდეაა მთავარი და არა ბელადი, ანდა მისგან ფინანსური სარგებლის მიღების მოლოდინი.
მოკლედ გეტყვით, ჩემი სურვილია ისეთ თავისუფალ ქვეყანაში ცხოვრებაა, სადაც სიმართლის თქმა ან საკუთარი განსხვავებული აზრის გამოხატვა ჰეროიკასთან არ იქნება კავშირში.
_ მოვლენების განვითარებას როგორს ელოდებით? როგორ ფიქრობთ, ეს იყო უბრალოდ დაშინების მიზნით დაკითხვა თუ გაგრძელდება ძიება, რადგან რეალური ფაქტებია?
_ მოდით, დღეს თავს შევიკავებ ამ კითხვაზე პასუხის გაცემისგან, რადგან არ შემიძლია გამოძიების დეტალებზე საუბარი.
